બોટાદ / સાળંગપુરનું મંદિર અલૌકિક, વ્યવસ્થાનો અભાવ: ભક્તો તાપમાં તપ્યા, ધક્કે ચડ્યા, છતાં દાદાના યોગ્ય દર્શનથી રહ્યા વંચિત

• કષ્ટભંજન દાદાના દર્શન માટે ભક્તોની ભારે ભીડ
• દર્શનની સુવિધાના આભાવે ભક્તોમાં નિરાશા
• ભક્તો વ્યવસ્થિત દર્શન કરી શકે તેવુ આયોજનનું સંપૂર્ણ અભાવ: ભક્ત સુબેન્દ્ર પાંડા

બોટાદના સાળંગપુરમાં હનુમાન જયંતિ બાદ પ્રથમ શનિવારે ભક્તોની ભારે ભીડ જોવા મળી છે. કષ્ટભંજન દાદાના દર્શન માટે મોટી સંખ્યામાં ભક્તો ઉમટી પડ્યા છે. વહેલી સવારથી જ ‘પવનપુત્ર હનુમાન કી જય, જય શ્રી રામ’ ના નારાથી પરિસર ગુંજી ઉઠ્યું છે. આજે શનિવારે સાળંગપુર મંદિરે અનેક ભક્તો દાદાના દર્શને આવ્યા છે અને દર શનિવારે ભારે ભીડ પણ જોવા મળે છે, પરંતુ કેટલીક સુવિધાના અભાવે ભક્તોને મુશ્કેલી વેઠવાનો પણ વારો આવ્યો છે. વ્યવસ્થાના અભાવે કેટલાક દર્શનાર્થીઓ સરખા દાદાના દર્શન કર્યા વગર જ પાછા ફર્યા છે. 

'દાદાના દર્શન સરખા કરી શકાતા નથી'
દાદાના દર્શને ભક્તો અનેક કિલોમીટર કાપીને આવતા હોય છે પરંતુ કેટલીક વ્યવસ્થાના અભાવે ભક્તોને મુશ્કેલી ઝીલવી પડી રહી છે. મંદિરના પ્રવેશ દ્વારાની બહાર જ છાયડાની વ્યવસ્થાના અભાવે ધગધગતા તાપનો ભક્તોને સામનો કરવો પડી રહ્યો છે તો બીજી તરફ ભક્તો માટે યોગ્ય લાઈન પણ નથી કરાવાતી અથવા તો કોઈ એવા સ્વંયમ સેવક ખડેપગે ઉભા રહેતા નથી કે, ભક્તોને વ્યવસ્થિત લાઈન કરાવી સંતોષ જનક દર્શન કરાવી શકે. યોગ્ય સુવિધા ન હોવાથી ધક્કા મુકીમાં દર્શન કરવા પડી રહ્યાં છે. ધક્કામુકીના કારણે વૃદ્ધો અને બાળકો અને મહિલાઓ દાદાના દર્શન સરખા કરી શકતા નથી. મંદિર સરસ અને ભવ્ય બનાવ્યું છે ત્યારે અન્ય તિરૂપતિ, બાલાજી, વૈષ્ણદેવી જેવા ભવ્ય મંદિર પાસેથી કઈ રીતે ભક્તોને દર્શન કરાવવા તેની શીખ લેવા જેવી છે.  

'મુખ્ય વ્યવસ્થા દર્શનની એ જરા પણ યોગ્ય નથી'
સાળંગપુર દાદાના દર્શને આવેલા ભક્તોઓમાં ચર્ચા છે કે, દાદાનો પરચો ભારી છે અને મંદિર ખૂબ જ સરસ છે અને ઘણી વ્યવસ્થા સારી પણ છે પરંતુ મુખ્ય વ્યવસ્થા દર્શનની એ જરા પણ યોગ્ય નથી કારણ કે, મંદિરની બહાર છાયડાની વ્યવસ્થા નથી જેના કારણે ઉનાળામાં તાપમાં પણ તપવું પડે છે. ભક્તોમાં ચર્ચા છે કે, વીઆઈપી આવે તો ક્ષણભરમાં જ દર્શન થઈ જતા હોય છે. 

ભુવનેશ્વરથી આવેલા ભક્તએ શું કહ્યું? 
ભુવનેશ્વરથી આવેલા ભક્ત સુબેન્દ્ર પાંડાએ જણાવ્યું કે, મંદિર સરસ છે પણ સુવિધાના અભાવે દર્શનાર્થીઓમાં નિરાશા જોવા મળી છે. ભક્તો દુર દુરથી દાદાના દર્શને આવ્યા પણ દર્શન સરખા ન થતા નિરાશા જોવા મળી છે. ભક્તો વ્યવસ્થિત દર્શન કરી શકે તેવુ આયોજનનું સંપૂર્ણ આભાવ જોવા મળી રહ્યું છે. તેમણે કહ્યું કે, ભક્તો મંદિરના પ્રવેશ દ્વાર આગળ ધગધગતા તાપમાં તપે છે. તેમજ કોઇ સ્વંયમ સેવક હાજર ન રહેતા હોય કે, પછી એમની નજર ભક્તોની આ મુશકેલી પર ન પડતી હોય તેવું જણાઈ રહ્યું છે. 

વહીવટ કર્તાનું નિવેદન
આ સમગ્ર બાબતે સાળંગપુર મંદિરના વહીવટ કર્તા વિવેક સાગર કોઠારી સ્વામી સાથે VTVએ સવાલ કરતા તેમણે કહ્યું કે, એવું કંઈજ નથી એકદમ સરસ ચાલે છે, દર્શન થાય જ છે. અહીં કામ ચાલે છે એટલે ધીરે ધીરે બધુ જ યોગ્ય થઈ જશે.