કોવિડ 19 / લોકડાઉન જેવા જ પ્રતિબંધો છતાંય આ બે રાજ્યોમાં કાબૂમાં નથી આવી રહ્યો કોરોના, સરકારની ચિંતા વધી

• કોરોનાના કેસ સતત વધી રહ્યા છે 
• દિલ્હી-મહારાષ્ટ્રમાં કેસ વધી રહ્યા છે 
• આ બંને રાજ્યોમાં લોકડાઉન જેવા જ પ્રતિબંધો લાગૂ છે

હાલમાં  હોસ્પિટલોમાં ઓક્સિજન, દવાઓ અને તબીબી ઉપકરણોની અછતનો સામનો કરવો પડી રહ્યો છે. સંકટ સમયે, લગભગ 40 દેશો ભારતની મદદ માટે આગળ આવ્યા છે. છેલ્લા 24 કલાકમાં દેશમાં રેકોર્ડ 3.80 લાખ નવા કોરોના દર્દીઓ મળી આવ્યા છે અને ચેપને કારણે 3,645 થી વધુ લોકોએ પોતાનો જીવ ગુમાવ્યો છે.

દિલ્હીમાં કોરોના બેકાબૂ

કોરોનાએ દિલ્હીમાં હાહાકાર મચાવ્યો છે. છેલ્લા 24 કલાકમાં, કોરોનાના 24235 નવા કેસો આવ્યા છે અને 395 લોકોનાં મોત નીપજ્યાં છે.

મહારાષ્ટ્રમાં કોરોનાનો હાહાકાર 

છેલ્લા 24 કલાકમાં મહારાષ્ટ્રમાં 66159 કેસ સામે આવ્યા છે અને 771 લોકોનાં મોત નીપજ્યાં છે. રાજ્યમાં કુલ સક્રિય કેસ 6,70,301 છે.મહત્વનું છે કે મહારાષ્ટ્રમાં પહેલાથી જ મિની લોકડાઉન જેવા કડક નિયમો લાગૂ કરી દેવાયેલા છે, જેને આજે રાજ્ય સરકારે વધુ 15 દિવસ લંબાવવાનો નિર્ણય કર્યો હતો. 

ચંદીગઢમાં ગુરુવારે 801 નવા કોરોના કેસ

ગુરુવારે, પંજાબ અને હરિયાણાની રાજધાની ચંદીગઢ માં કોરોનાના 801 કેસ નોંધાયા હતા અને 8 લોકોનાં મોત થયાં હતાં. મહત્વનું છે કે ચંદીગઢમાં પણ સરકાર દ્વારા અમુક પ્રતિબંધો લાગૂ કરી દેવાયા છે. 

હરિયાણામાં 31 મે સુધી તમામ શૈક્ષણિક સંસ્થાઓ બંધ રહેશે

હરિયાણાની મનોહરલાલ ખટ્ટર સરકાર દ્વારા નિર્ણય લેવામાં આવ્યો હતો કે હાલ પૂરતું રાજ્યની તમામ કોલેજો, કોચિંગ સંસ્થાઓ, આઈટીઆઈ, પુસ્તકાલયો, સરકારી અથવા ખાનગી તાલીમ સંસ્થાઓ 31 મે સુધી બંધ રહેશે. મહિલા અને બાળ વિકાસ વિભાગ હેઠળના તમામ આંગણવાડી કેન્દ્રો પણ 31 મે સુધી બંધ રહેશે.