સાયક્લોન ઈફેક્ટ / જ્યાં વાવાઝોડું ટકરાયું તે જખૌમાં તારાજી: બિપોરજોય વાવાઝોડાએ સર્જ્યો વિનાશ, ગ્રાઉન્ડ ઝીરોથી VTV પર જુઓ ભયાનક દ્રશ્યો

 

• નલિયા જખૌ વચ્ચે વાવાઝોડાની હજુ પણ અસર 
• તેજ પવન સાથે ભારે વરસાદ યથાવત 
• ભારે વરસાદના કારણે વિઝિબ્લિટી પણ ઘટી
• રસ્તા પર ભારે પવન સાથે વરસાદ 

અતિ વિનાશક બિપોરજોય વાવાઝોડાથી કચ્છમાં ભારે તારાજી સર્જાઈ હોવાના સમાચાર પ્રકાશમાં આવી રહ્યા છે.  આ વાવાઝોડાના પગલે સૌરાષ્ટ્ર-કચ્છમાં અતિ ભારે વરસાદ વરસી રહ્યો છે. જેના કારણે નદી-નાળા છલકાઈ ઊઠ્યાં છે. ગાંધીધામમાં અનરાધાર વરસાદ નોંધાયો છે. છેલ્લા 24 કલાકમાં 8 ઈંચ વરસાદ ખાબકી ચૂક્યો છે. જેના કારણે લોકો તોબા પોકારી ઉઠ્યા છે. કચ્છના કેટલાક વિસ્તારોમાં હજુ પણ ભારે પવન સાથે ધોધમાર વરસાદ વરસી રહ્યો છે. ભારે વરસાદના કારણે ગ્રામ્ય વિસ્તારોમાં પાણી ભરાઈ ગયા છે. 

VTV ન્યૂઝની ટીમ પહોંચી જખૌ પોર્ટ પર
ભારે પવન ફૂંકાતા કચ્છમાં વૃક્ષો ધરાશાયી થયા છે, વીજપોલ ઉખડી ગયા છે, લોકો ઘરના છાપરા પણ ઊડી ગયા છે. તો જ્યાં ગઈકાલે વાવાઝોડું ત્રાટક્યું હતું તે જખૌ પોર્ટ પર બધું તહેશનહેશ થઈ ગયું છે. ત્યારે આજે VTV ન્યૂઝની ટીમ જખૌ પોર્ટ પર પહોંચી હતી. 

જખૌ પોર્ટ પર ફૂંકાઈ રહ્યો છે ભયંકર પવન
નલિયા જખૌ વચ્ચે વાવાઝોડાની હજુ પણ વવાઝોડાની અસર જોવા મળી રહી છે. તેજ પવન સાથે ભારે વરસાદ વરસી રહ્યો છે. ભારે વરસાદના કારણે વિઝિબ્લિટી પણ ઘટી છે. જખૌ પોર્ટ પર હજુ પણ ભયંકર સ્થિતિ જોવા મળી રહી છે. પોર્ટ પર ભારે પવન ફૂંકાઈ રહ્યો છે. અહીં જે ઘર અને ઓફિસના છાપરા પણ ઉડી ગયા છે. અનેક દિવાલો તૂટી ગઈ છે. હજુ પણ ભયંકર પવન ફૂંકાઈ રહ્યો છે. એક બાજુ મીઠાના અગર છે અને બીજી બાજુ જખૌ પાર્ટ છે. 

ઓફિસોના છાપરા ઉડી ગયા છે
દ્રશ્યોમાં જોઈ શકાય છે કે અહીં આવેલા પેટ્રોલ પંપના મશીન પણ તૂટી ગયા છે. તો પેટ્રોલ પંપ પરનો શેડ પણ ઉડી ગયો છે. પેટ્રોલ પંપની ઓફિસના કાચ પણ તૂટી ગયા છે. આ સાથે જ પોર્ટ પર આવેલી ઓફિસોના છાપરા ઉડી ગયા છે. વાવાઝોડાએ જખૌ પોર્ટ પર ભારે તારાજી સર્જી છે.