- બાળકો રમવાના મામલે પાડોશીઓ વચ્ચે બબાલ
- મહિલા તેમજ યુવકે વૃદ્ધાને ફેટ મારતા વૃદ્ધાનું સારવાર દરમ્યાન મોત
- સવિતાબહેનની પુત્રવધુએ પોલીસ સ્ટેશને ફરિયાદ નોંધાવી
અમદાવાદ શહેરના સરસપુર વિસ્તારમાં હાલ રથયાત્રાની તડામાર તૈયારીઓ ચાલી રહી છે ત્યારે મોડી રાતે બાળકો રમવાના મામલે એક વૃદ્ધાની હત્યા થઇ જતાં ચકચાર મચી ગઇ છે. બંને પરિવારે સામસામે મારામારી કરી હતી, જેમાં વૃદ્ધાને વધુ ઇજા થતાં તેમનું સારવાર દરમિયાન મોત થયું છે. મોડી રાતે બાળકો રમી રહ્યાં હતાં ત્યારે મામલો બીચક્યો હતો. શહેરકોટડા પોલીસે વૃદ્ધાની હત્યા કરનાર મહિલા અને તેના દિયરની ધરપકડ કરી છે.
બાળકોએ વરસાદમાં પલળતાં તોફાન-મસ્તી કરતા હતા
બિપરજોય વાવાઝોડાના કારણે શહેરમાં ઠેરઠેર વરસાદ પડી રહ્યો હતો, જેના કારણે લોકો વરસાદમાં મન મૂકીને નાહ્યા હતા, જ્યારે બાળકોએ વરસાદમાં પલળતાં તોફાન-મસ્તી કરી હતી. ગઇ કાલે બાળકો રમતાં હતાં ત્યારે એક વૃદ્ધાની હત્યા થઇ હોવાની ઘટના સામે આવી છે. સરસપુર વિસ્તારમાં આવેલી શારદાબહેન હોસ્પિટલની બાજુમાં મંગલ પ્રભાત સોસાયટી આવેલી છે, જ્યાં ૬૪ વર્ષીય સવિતાબહેન રહે છે, જેમની મોડી રાતે હત્યા થઇ છે.
સવિતાબહેનની પુત્રવધુએ પોલીસ સ્ટેશને ફરિયાદ નોંધાવી
સવિતાબહેનનાં પુત્રવધૂ ક્રિષ્નાબહેને શહેરકોટડા પોલીસ સ્ટેશનમાં કૃણાલ અને તેની ભાભી અંજલી વિરુદ્ધ હત્યાની ફરિયાદ કરી છે. પોલીસસૂત્રોના જણાવ્યા અનુસાર ગઇ કાલે મોડી રાતે શહેરમાં વરસાદ પડ્યો હોવાના કારણે મંગલ પ્રભાત સોસાયટીમાં બાળકો રમી રહ્યાં હતાં. બાળકો રમતાં રમતાં ઝઘડ્યાં હતાં, જેના કારણે બે પરિવારો આમનેસામને આવી ગયા હતા. સવિતાબહેનનો પરિવાર અને કૃણાલનો પરિવાર સામસામે આવી ગયા હતા, જ્યાં પહેલાં તો એકબીજાએ ગાળો બોલવાનું શરૂ કરી દીધું હતું. બંને પરિવાર બાખડતાં આસપાસના લોકો ભેગા થઇ ગયા હતા અને સમાધાન કરાવ્યું હતું. સમાધાન થઇ ગયા બાદ પણ બંને પરિવારો આમને સામને આવી ગયા હતા અને મારામારી કરવાનું શરૂ કરી દીધું હતું. બંને પરિવારે સામસામે મારામારી કરતાં સવિતાબહેનનું મોત થયું છે.
ઈજાગ્રસ્ત સવિતાબહેનનું સારવાર દરમ્યાન મોત નિપજ્યું
કૃણાલ અને તેની ભાભી અંજલીએ સવિતાબહેનને ફેંટો મારી હતી. જેથી તે જમીન પર પડી ગયાં હતાં. બે પરિવારો વચ્ચે થયેલી મારામારી જોતાં આસપાસના લોકો ભેગા થઇ ગયા હતા અને ઇજાગ્રસ્ત સવિતાબહેનને તરત જ સારવાર માટે શારદાબહેન હોસ્પિટલ લઇ ગયા હતા. સવિતાબહેનની ટૂંકી સારવાર બાદ તબીબોએ તેમને મૃત જાહેર કર્યાં હતાં. સવિતાબહેનના મોતની જાણ પોલીસને થતાં તેઓ તાત્કાિલક ઘટનાસ્થળે પહોંચી ગયા હતા. મોડી રાતે પોલીસના ઉચ્ચ અધિકારીઓ પણ દોડી આવ્યા હતા, જ્યારે સવિતાબહેનના મોતના કારણે સોસાયટીમાં સન્નાટો વ્યાપી ગયો હતો.
શહેર કોટડા પોલીસ સ્ટેશને અઠવાડિયામાં બીજી હત્યાનો ગુનો દાખલ થયો
પોલીસે સવિતાબહેનની લાશને પોસ્ટમોર્ટમ માટે હોસ્પિટલ મોકલી આપી હતી, જ્યારે કૃણાલ અને અંજલી વિરુદ્ધ હત્યાનો ગુનો દાખલ કરીને તપાસ શરૂ કરી છે. પોલીસે મહિલા અને તેના દિયરની અટકાયત કરી છે. ઉલ્લેખનીય છે કે શહેરકોટડા પોલીસ સ્ટેશનમાં એક જ અઠવાડિયામાં આ બીજી હત્યાનો ગુનો દાખલ થયો છે. થોડા દિવસ પહેલાં મેઘાણીનગર વિસ્તારમાં એક યુવકની છરીના ઘા ઝીંકીને હત્યા કરવામાં આવી હતી, જ્યારે ગઇ કાલે મોડી રાતે સવિતાબહેનની હત્યા કરવામાં આવી છે. સવિતાબહેન પર કોઇ તીક્ષ્ણ હિથયાર વડે હુમલો નહીં, પરંતુ મૂઢ માર મારવામાં આવ્યો હતો, જેના કારણે તેમનું મોત થયું છે.
