NULL / કોંગ્રેસે ઉર્મિલા માતોંડકરને મુંબઇ ઉત્તરથી આપી ટિકિટ, બેઠકનું આ છે સમીકરણ..

મહારાષ્ટ્રની મુંબઇ ઉત્તર લોકસભા બેઠક પરથી કોંગ્રેસે હાલમાં જ જોડાયેલી બોલિવુડની અભિનેત્રી ઉર્મિલા માંતોડકરને ઉમેદવાર જાહેર કરી છે. ઉલ્લેખનીય છે કે હાલમાં થોડા દિવસ પહેલા જ ઉર્મિલા માતોંડકર કોંગ્રેસમાં સામેલ થઇ છે. આ દરમિયાન ઉર્મિલા માતોંડકરે જણાવ્યું હતું કે મોદી સરકારમાં અસહિષ્ણુતા વધી છે.



ભાજપનો ગઢ માનવામાં આવતી આ બેઠક પરથી ઉત્તર પ્રદેશના રાજ્યપાલ રામ નાઇક 5 વખત સાંસદ રહી ચૂક્યાં છે. 2014ની લોકસભા ચૂંટણીમાં ભાજપના ગોપાલ શેટ્ટી જીત્યાં હતા. એવામાં સવાલ એ થાય છે કે શું ઉર્મિલા માતોંડકર ભાજપના ગઢમાં કોંગ્રેસને વિજય અપાવી શકશે. 



ઉલ્લેખનીય છે કે હાલમાં થોડા દિવસ અગાઉ જ બોલિવુડની અભિનેત્રી ઉર્મિલા માતોંડકર કોંગ્રેસમાં સામેલ થઇ હતી. જો કે ત્યારબાદથી અટકળો સામે આવી રહી હતી કે કોંગ્રેસ ઉર્મિલા માતોંડકરને મુંબઇ ઉત્તર બેઠક પરથી ચૂંટણી લડાવી શકે છે. આ અગાઉ પણ આ બેઠક પરથી 2004ની લોકસભા ચૂંટણીમાં અભિનેતા ગોવિંદાએ ભાજપના રામ નાઇકને હરાવ્યાં હતા.



જો કે ત્યારબાદ ગોવિંદાએ રાજકારણને અલવિદા કહી દીધું. 2009 પર આ બેઠક પરથી કોંગ્રેસના સંજય નિરૂપમ સાંસદ બન્યા. જ્યારે 2014માં ભાજપના ગોપાલ શેટ્ટીએ કોંગ્રેસના સંજય નિરૂપમને અંદાજે 4.5 લાખ મતથી હાર આપી હતી. 

મુંબઇ ઉત્તર બેઠક પર ગુજરાતી-મરાઠી મતદાતાઓની જનસંખ્યા અંદાજે 60 ટકા છે, જ્યારે ઉત્તર ભારતીય તેમજ મુસ્લિમની અંદાજે 40 ટકા છે. ગુજરાતી મતદાતાઓ ભાજપને મત આપે છે. આમ કોંગ્રેસે ઉર્મિલા માતોંડકરને આ બેઠકના ઉમેદવાર બનાવી મરાઠીની સાથે-સાથે મુસ્લિમ તેમજ ઉત્તર ભારતીય મતદાતાઓના મત પોતાના તરફ કરવાનો પ્રયત્ન કર્યો છે.