ફરિયાદ / ટ્રાફિક પોલીસના જવાનોએ ચલાવી 'લૂંટ?' અમદાવાદમાં ટેક્સીમાં બેઠેલા પેસેન્જર પાસેથી 60 હજાર રૂપિયા પડાવ્યા હોવાની ફરિયાદ

• ભક્ષક બન્યા ટ્રાફિક પોલીસકર્મીઓ 
• એરપોર્ટથી આવતી ટેક્સી રોકી ખંડણી માગી
• ફરિયાદી પાસે 60 હજાર પડાવ્યા 
• સોલા પોલીસમાં 3 જવાનો સામે ફરિયાદ 

અમદાવાદમાં પોલીસ જ લૂંટ અને ખંડણી જેવા ગુનાને અંજામ આપવા લાગી છે. એવામાં હવે સામાન્ય માણસ પોલીસ પર વિશ્વાસ કરશે કે નહીં તેવા સવાલો ઉભા થયા છે. વાસ્તવમાં અમદાવાદના સોલા પોલીસ સ્ટેશનમાં 3 ટ્રાફિક પોલીસકર્મી સામે ખંડણીની ફરિયાદ નોંધાઈ છે. આ ત્રણેય પોલીસકર્મીએ ફરિયાદી પાસેથી 60 હજાર રૂપિયા પડાવ્યા હોવાનું ફરિયાદમાં જણાવવામાં આવ્યું છે. મહત્વનું છે કે, સોલા પોલીસ સ્ટેશનમાં છેલ્લા 3 દિવસમાં પોલીસ સામે આ બીજી ફરિયાદ નોંધાઈ છે. 

પેસેન્જર પાસેથી માંગ્યા પૈસા
પ્રાપ્ત વિગતો અનુસાર, અમદાવાદના સાઉથ બોપલ વિસ્તારમાં રહેતા મિલનભાઈ કેલા અને તેમના પત્ની ઉબેર કારમાં એરપોર્ટથી ઘરે આવવા નીકળ્યા હતા. આ દરમિયાન ઓગણજ સર્કલ નજીક ટ્રાફિક પોલીસે તેમની ટેક્સીને રોકી હતી. જે બાદ ટ્રાફિક પોલીસે ઉબેર કારમાં બેઠેલા પેસેન્જર પાસેથી પૈસાની માંગણી કરી હતી. 

40 હજાર રોકડા પડાવ્યા અને 20 હજાર ટ્રાન્સફર કરાવ્યા
ઓગણજ સર્કલ નજીક એરપોર્ટથી આવતી ટેક્સીને રોકી ટ્રાફિક પોલીસ કર્મીએ કારમાં બેસેલા પેસેન્જર પાસેથી 2 લાખની માંગણી કરી હતી અને તેમને ધમકી આપી હતી. જે બાદ તેઓ ફરિયાદી પાસેથી 40 હજાર રોકડા પડાવ્યા હતા. જ્યારે ફરિયાદીના પત્નીના ફોનમાંથી ઉબેરના ડ્રાઈવરના ફોનમાં 20 હજાર ટ્રાન્સફર કરાવ્યા હતા. 

3 ટ્રાફિક જવાન સામે ફરિયાદ
આ ઘટનાની જાણ કોઈને ન કરવાની પણ ધમકી આપી હતી. જે બાદ મિલનભાઈ કેલા સોલા પોલીસ સ્ટેશન ખાતે પહોંચ્યા હતા. જ્યાં તેઓએ 3 ટ્રાફિક જવાન સામે ફરિયાદ નોંધાવી હતી. આપને જણાવી દઈએ કે, ગત 25મી ઓગસ્ટે સાબરમતી પોલીસ સ્ટેશનના પોલીસ કોન્સ્ટેબલ આકાશ પટેલ સહિત 4 સામે સોલા પોલીસ સ્ટેશનમાં ફરિયાદ નોંધાવવામાં આવી હતી. 

25મી ઓગસ્ટે પણ નોંધાઈ હતી ફરિયાદ
ગોલ્ડન ટ્રિપ ટૂર્સ એન્ડ ટ્રાવેલ્સના માલિસ સંજય પટેલે સોલા પોલીસ સ્ટેશનમાં સાબરમતી પોલીસ સ્ટેશનમાં ફરજ બજાવતા પોલીસ કર્મચારી આકાશ પટેલ સહિત 4 સામે અપહરણ અને લૂંટની ફરિયાદ નોંધાવી હતી. ફરિયાદમાં જણાવ્યું હતું કે, ટુર એન્ડ ટ્રાવેલ્સના વેપારીનું ધોળા દિવસે ગાડીમાં હથકડી પહેરાવીને ક્રાઇમ બ્રાન્ચના અધિકારીની ઓળખ આપી અપહરણ કર્યું. એટલું જ નહીં વેપારી પાસેથી રૂપિયા 35 લાખની પણ લૂંટી લીધા હતા. ત્યારે છેલ્લા 3 દિવસમાં જ પોલીસ સામે 2 ફરિયાદ નોંધાતા પોલીસબેડામાં ખળભળાટ મચી ગયો છે.