જળબંબાકાર / ભારે વરસાદને લઈને કેન્દ્ર સરકાર એલર્ટઃ અમિત શાહે CM ભૂપેન્દ્ર પટેલને ફોન કરી મેળવી માહિતી, આપી સંપૂર્ણ મદદની ખાતરી

 

• રાજ્યના અનેક જિલ્લામાં પૂર જેવી સ્થિતિ
• કેન્દ્રીય ગૃહમંત્રીએ CM સાથે કરી વાતચીત
• પૂરથી અસરગ્રસ્ત વિસ્તારની મેળવી માહિતી

રાજ્યના અનેક જિલ્લામાં પૂર જેવી સ્થિતિ સર્જાઈ છે. ખાસ કરીને સૌરાષ્ટ્રમાં ભારે વરસાદ વરસી રહ્યો છે. વિસાવદર અને જૂનાગઢમાં વરસાદના પાણી ભરાઈ જવાથી જનજીવન ખોરંભાયુ છે. તેમજ નદીનાળા પાણીથી છલકાઈ ગયાં છે. નદીઓ પણ હવે બે કાંઠે વહેતી થઈ ગઈ છે. ત્યારે કેન્દ્રીય ગૃહમંત્રી અમિત શાહે CM ભૂપેન્દ્ર પટેલ સાથે ટેલિફોનિક વાતચીત કરી છે.  કેન્દ્રીય ગૃહમંત્રી અમિત શાહે પૂરની સ્થિતિ અંગે માહિતી મેળવી છે. મુખ્યમંત્રી સાથે વાતચીત કર્યા બાદ કેન્દ્રીય ગૃહમંત્રીનું નિવેદન સામે આવ્યું છે.

કેન્દ્રીય ગૃહમંત્રીએ કર્યું ટ્વિટ
આ અંગે કેન્દ્રીય ગૃહમંત્રી અમિત શાહે ટ્વિટ કર્યું છે. જેમાં તેઓએ લખ્યું છે કે, ગુજરાતમાં ભારે વરસાદને કારણે અનેક જગ્યાએ સર્જાયેલી પૂર જેવી પરિસ્થિતિથી પ્રભાવિત લોકોને શક્ય તમામ મદદ પૂરી પાડવા સરકાર સખત મહેનત કરી રહી છે. મુખ્યમંત્રી ભૂપેન્દ્ર પટેલજી સાથે વાત કરી અને પરિસ્થિતિ વિશે જાણકારી મેળવી. NDRF અને SDRFની ટીમો તેમજ સ્થાનિક વહીવટીતંત્ર આ વિસ્તારોમાં લોકોને મદદ કરવામાં વ્યસ્ત છે. કેન્દ્ર અને રાજ્ય સરકાર આ મુશ્કેલ સમયમાં લોકોની સાથે ખડેપગે છે.

ગુજરાતમાં ભારે વરસાદને કારણે અનેક જગ્યાએ સર્જાયેલી પૂર જેવી પરિસ્થિતિથી પ્રભાવિત લોકોને શક્ય તમામ મદદ પૂરી પાડવા સરકાર સખત મહેનત કરી રહી છે. મુખ્યમંત્રીશ્રી @Bhupendrapbjp જી સાથે વાત કરી અને પરિસ્થિતિ વિશે જાણકારી મેળવી. NDRF અને SDRFની ટીમો તેમજ સ્થાનિક વહીવટીતંત્ર આ…

— Amit Shah (@AmitShah) July 2, 2023

CM ભૂપેન્દ્ર પટેલ પહોંચ્યા હતા જામનગર
ગુજરાતમાં ભારે વરસાદના કારણે જળબંબાકારની સ્થિતિ સર્જાઇ છે. જેના કારણે સીએમ ભૂપેન્દ્ર પટેલ ગઈકાલે જામનગર પહોંચ્યા હતા. ભૂપેન્દ્ર પટેલે જામનગરમાં અસરગ્રસ્ત વિસ્તારોની મુલાકાત લઇ સ્થિતિ અંગે ચર્ચા કરી છે. સીએમ ભૂપેન્દ્ર પટેલે ભારે વરસાદના કારણે અસરગ્રસ્ત થયેલ વિસ્તારોની મુલાકાત લઈ સ્થાનિક નાગરિકો સાથે વાતચીત કરીને વરસાદી પાણીથી થયેલ નુકસાન અને સ્થિતિનો તાગ મેળવ્યો હતો. 

જામનગરના ભારે વરસાદના કારણે અસરગ્રસ્ત થયેલ વિસ્તારોની મુલાકાત લઈ સ્થાનિક નાગરિકો સાથે વાતચીત કરીને વરસાદી પાણીથી થયેલ નુકસાન અને સ્થિતિનો તાગ મેળવ્યો. વહીવટીતંત્ર દ્વારા અસરગ્રસ્તો માટે કરવામાં આવેલી વ્યવસ્થાની વિગતો મેળવી. pic.twitter.com/38KNozb7yN

— Bhupendra Patel (@Bhupendrapbjp) July 1, 2023

મુશળધાર વરસાદના કારણે લોકો પરેશાન 
ગુજરાતમાં છેલ્લા 4-5 દિવસથી વરસાદી માહોલ જામ્યો છે. કેટલીક જગ્યાએ તો મેઘરાજા ધમાકેદાર બેટિંગ કરી રહ્યા છે. તો કેટલીક જગ્યાએ ધીમીધારે વરસાદ વરસી રહ્યો છે. આ વરસાદને કારણે કહી ખુશી કહી ગમ જેવી સ્થિતિ સર્જાઈ છે. ભારે વરસાદના કારણે ખેડૂતોમાં ખુશી જોવા મળી રહી છે. તો કેટલીક જગ્યાએ વરસાદી પાણી ભરાતા નુકસાની પણ થઈ છે. ગુજરાતમાં જુનાગઢથી જામનગર સુધી મુશળધાર વરસાદના કારણે લોકો પરેશાન થઈ રહ્યા છે અને ભારે વરસાદને પગલે રસ્તાઓ તેમજ ઘરોમાં પાણી ભરાઈ ગયા છે. 

અત્યાર સુધીમાં 275 મીમી વરસાદ નોંધાયો
રાજ્યમાં સિઝનનો 31.40% વરસાદ નોંધાયો છે. ચોમાસાના પ્રારંભ બાદ અત્યાર સુધીમાં 275 મીમી વરસાદ નોંધાયો છે. ગુજરાતના 1 તાલુકામાં 40 ઈંચથી વધુ વરસાદ નોંધાયો છે. જ્યારે 35 તાલુકામાં 20થી 40 ઈંચ, 61 તાલુકામાં 10થી 20 ઈંચ, 14 તાલુકામાં 5થી 10 ઈંચ, 37 તાલુકામાં 2થી 5 ઈંચ અને 3 તાલુકામાં 2 ઈંચ જેટલો વરસાદ નોંધાયો છે.