નિર્ણય / ખોટા CCC સર્ટિફિકેટ મેળવનારાઓની હવે ખેર નહીં, ગુજરાતના તમામ પ્રાથમિક શિક્ષકોના પ્રમાણપત્ર ચેક કરાશે

• ગુજરાતના તમામ શિક્ષકોના ચેક કરાશે CCC સર્ટિફીકેટ
• રાજ્યના 49 શિક્ષકોએ CCCના ખોટા સર્ટિફિકેટ મેળવ્યા
• તમામે તમામ 49 શિક્ષકો સામે કરાશે શિક્ષાત્મક કાર્યવાહી

ગુજરાતની બિનસરકારી અનુદાનિત માધ્યમિક અને ઉચ્ચતર માધ્યમિક શાળાના શૈક્ષણિક કર્મચારીઓને ઉચ્ચ પગાર ધોરણ મેળવવા માટે CCC કોમ્પ્યુટરની પરીક્ષા પાસ કરવી ફરજીયાત છે. ત્યારે તાજેતરમાં રાજ્યમાં 49 શિક્ષકોએ CCC ના ખોટા સર્ટિફિકેટ મેળવ્યા હોવાનું સામે આવ્યું છે. આથી રાજ્યના તમામ પ્રાથમિક શિક્ષકોના CCC સર્ટિફિકેટની ચકાસણી કરાશે. તદુપરાંત ઉચ્ચ પગારનો લાભ મેળવવા CCCના ખોટા સર્ટિફિકેટ મેળવનારા તમામે તમામ 49 શિક્ષકો સામે શિક્ષાત્મક કાર્યવાહી કરાશે. જેમાં ઉચ્ચતર પગાર ધોરણના લાભો રદ કરવા સહિત ચૂકવેલી રકમ પણ પરત લેવા માટેનો આદેશ કરવામાં આવ્યો છે.

ગુજરાતના 49 શિક્ષકોએ ખોટા CCC સર્ટિફિકેટ મેળવ્યા હોવાનું સામે આવતા તમામ પ્રાથમિક શિક્ષકોના CCC સર્ટિફિકેટની ચકાસણી કરાશે, 49 શિક્ષકો સામે કરાશે શિક્ષાત્મક કાર્યવાહી#Gujarat #Teachers #vtvgujarati

— VTV Gujarati News and Beyond (@VtvGujarati) October 12, 2022

આજે AMC શિક્ષકોના ગ્રેડ પેને લઇને પણ લેવાયો મહત્વનો નિર્ણય

આ સિવાય ગુજરાત સરકાર દ્વારા તાજેતરમાં AMC શિક્ષકોના ગ્રેડ પેને લઇને મહત્વનો નિર્ણય લીધો છે. દિવાળી પહેલા શિક્ષકોના પરિવારમાં આનંદનો માહોલ ઊભો કરી દીધો છે. કારણ કે રાજ્ય સરકારે નગરપાલિકા અને મહાનગરપાલિકાના શિક્ષકોને 4200 ગ્રેડ પે આજે મંજૂર કરી દીધો છે. આથી AMC શિક્ષક મંડળે સરકાર અને AMC સ્કૂલ બોર્ડનો આભાર પણ માન્યો છે. મહત્વનું છે કે, છેલ્લાં ઘણા વર્ષોથી શિક્ષકો 4200 ગ્રેડ પે માટે લડત ચલાવી રહ્યાં હતાં.

અગાઉ વિદ્યાસહાયકોની ભરતી અંગે પણ લેવાયો હતો મહત્વનો નિર્ણય

ઉલ્લેખનીય છે કે, તાજેતરમાં જ ગુજરાત સરકારે 2600 વિદ્યાસહાયકોની ભરતી કરવાનો મહત્વનો નિર્ણય લીધો છે. જેમાં ધોરણ 1થી 5 માટે એક હજાર વિદ્યાસહાયકોની ભરતી થશે જ્યારે ધોરણ 6થી 8માં 1600 વિદ્યાસહાયકોની ભરતી કરશે તેવી માહિતી શિક્ષણમંત્રી જીતુ વાઘાણીએ ટ્વિટ કરીને આપી હતી.

આ ભરતીમાં જ ગણિત-વિજ્ઞાન માટે 750 અન્ય ભાષાના વિષયો માટે 250ની ભરતી જ્યારે સામાજિક વિજ્ઞાન વિષય માટે 600 વિદ્યાસહાયકોની ભરતી થશે. અગાઉની જાહેરાત મુજબ વિધવા મહિલા ઉમેદવારોને 5 ટકા વધારાના ગુણ મળશે.