ઇલેક્શન-2022 / ભાજપ કાર્યકરોને 3 દિવસ રજા પછી 6 મહિના દોડધામ: તાપીમાં CR પાટીલે કર્યું મોટું એલાન

• તાપીમાં સી.આર.પાટીલનું કાર્યકરોને નિવેદન
• 3 દિવસ આરામ કરો પછી કામે લાગી જાઓ
• 1 થી 3મે સુધી રજા, પછી છ મહિના સુધી દોડવાનું છે!

ગુજરાત વિધાનસભાની ચૂંટણી વહેલી યોજાશે તેવા એંધાણ વચ્ચે ભાજપે તૈયારીઓને લઇને ધમધમાટ શરુ કર્યો છે.  એક તરફ  આજથી બે દિવસ  પ્રદેશ ભાજપ પ્રભારી ભૂપેન્દ્ર યાદવ ગુજરાતના પ્રવાસે છે. તો બીજી તરફ કલેક્ટર ઓફિસથી સરકારી કર્મચારીઓની વિગતો મંગવાઈ રહી છે. એક બાદ એક  સરકાર તરફથી વિકાસલક્ષી કાર્યક્રમો કરવામાં આવી રહ્યા છે.  ત્યારે આ  તમામ વચ્ચે ભાજપના પ્રદેશ અધ્યક્ષ સી.આર પાટીલનું મહત્વનું નિવેદન સામે આવ્યું .

 કાર્યકરો માટે 3 દિવસ રજાની  જાહેરાત

વિધાનસભાની ચૂંટણીને લઇને ભાજપે તડામાર તૈયારીઓ તો શરુ કરી દીધી છે. પરંતુ ભાજપ હમેશા કંઇક નવા પ્રયોગો કરતુ આવ્યુ છે. ત્યારે આ વખતે ચૂંટણીની કામગીરીમાં ભાજપ કોઇ કચાશ રાખવા માગતું નથી. હેતુસર રોજબરોજના કાર્યોમાંથી પાર્ટીના કાર્યકરોને થોડો બ્રેક આપવાનું નક્કી કરવામાં આવ્યું છે. આ અંગે  ભાજપ પ્રદેશ પ્રમુખ સી.આર. પાટીલે કાર્યકરો માટે 3 દિવસ રજાની જાહેરાત કરી છે. તાપીમાં આયોજિત એક કાર્યક્રમમાં સી.આર પાટીલે 
1મે થી 3મે સુધી કાર્યકરોને રજા જાહેર કરી.  પ્રદેશ અને જિલ્લા કક્ષાએથી 3 દિવસ સુધી કોઇ પણ કાર્યક્રમ નહી આપવા માટે સૂચન કરવામાં આવ્યું છે.  

3 દિવસનો બ્રેક શા માટે ??

3 દિવસની રજા આપવા પાછળ કારણો જણાવતા સી.આર પાટીલે કહ્યું કે સતત બે વર્ષથી કાર્યક્રમો આપતા આવ્યા છીએ. દરેકને થોડો સ્પેસ આપવાની જરુર હોય છે. ઘણા કાર્યકરોની રજૂઆત હતી કે થોડો બ્રેક આપો. જેથી 3 દિવસની રજા આપવામાં આવી, સી.આર પાટીલનું માનવુ છે કે 3 દિવસની રજા આપવાથી અમે વધુ તાજગી સાથે 2022ની વિધાનસભાની તૈયારી કરી શકીશું. વધુમાં એમ પણ જણાવ્યું કે 3 દિવસ એ લાંબો સમયગાળો નથી પરંતુ રજા બાદ નવી તાજગી સાથે આવનારા દિવસો માટે કામે લાગે તેમ જણાવ્યું હતું.

ભૂપેન્દ્ર યાદવ છે ગુજરાતના પ્રવાસે

ગુજરાતમાં ભૂપેન્દ્ર પટેલની સરકાર રચાયા બાદ પ્રદેશ પ્રભારી ભૂપેન્દ્ર યાદવ પ્રથમ વખત ગુજરાતની મુલાકાતે આવ્યા છે. ગુજરાતમાં વિધાનસભાની ચૂંટણી ભલે ડિસેમ્બરમાં યોજાવાની હોય પરંતુ ભાજપ દ્વારા તે પહેલા તૈયારીઓ આરંભી દેવામાં આવી છે. ભૂપેન્દ્ર યાદવ બે દિવસના ગુજરાત પ્રવાસે છે. બે દિવસના પ્રવાસમાં તેઓ સતત બેઠકો યોજશે. બેઠકમાં રાજકીય, સામાજીક પરિસ્થિતિ અંગે ચર્ચા તથા સમીક્ષા કરવામાં આવશે. બે દિવસના પ્રવાસમાં તેઓ વર્તમાન મંત્રી, પૂર્વમંત્રી, જૂના સંગઠનના હોદ્દેદારો સાથે મુલાકાત કરી વર્તમાન પરિસ્થિતિનો તાગ મેળવશે. સમગ્ર સ્થિતિનો તાગ મેળવ્યા બાદ તેઓ રિપોર્ટ દિલ્લીમાં ભાજપ હાઇ કમાન્ડને આપશે.