નિવેદન / ગુજરાતભરમાં હડતાળ પર ઉતર્યા તલાટીઓ, સરકારે કહ્યું અમે બધા પ્રશ્નો ઉકેલ્યા છે, હવે...

• પડતર પ્રશ્નોને લઇને રાજ્યના તલાટીઓ હડતાળ પર
• રાજકોટ-વડોદરા સહિતના તલાટીઓ હડતાળ પર
• પડતર પ્રશ્નો ઉકેલવા સરકાર કટિબદ્ધ- મેરજા

રાજ્યના તલાટીઓ આજથી પડતર માંગણીઓને લઇ હડતાળ પર ઉતર્યા છે. આ હડતાળમાં  વડોદરા જિલ્લાના 300 તલાટીઓ જોડાયા છે..તો  રાજકોટની 591 ગ્રામ પંચાયતના તલાટીઓ જોડાયા છે. જેથી રાજકોટ અને વડોદરા ગ્રામ પંચાયતોનો વહીવટ ખોરવાયો છે. ઉલ્લેખનીય છે કે, આ હડતાળમાં સમગ્ર રાજ્યના 8 હજાર 500 તલાટીઓ જોડાયા છે. જેથી રાજ્યના 18 હજાર 700 ગામમાં હડતાળની અસર થઇ છે. આ અંગે ગુજરાત રાજ્ય તલાટી મહામંડળના પ્રમુખે નિવેદન આપ્યું છે. તેમણે કહ્યું કે, અમારા એક પણ પ્રશ્નનનું નિરાકરણ થયું નથી. જેથી હર ઘર તિરંગા યાત્રાને બાદ કરતાં તમામ કામગીરીનો બહિષ્કાર કર્યો છે.

શું છે તલાટીઓની માંગ ?

• 2004-05 પછીના તમામ તલાટીઓની નોકરી સળંગ ગણવી
• તલાટીઓને ઉચ્ચ પગાર ધોરણના લાભ આપવા
• પ્રથમ ઉચ્ચત્તર પગાર ધોરણ માટે લેવાતી પરીક્ષા રદ કરવામાં આવે
• રેવન્યુ તલાટીને પંચાયત તલાટી મંત્રીમાં મર્જ કરવામાં આવે 
• રેવન્યુને મર્જ કરવા અથવા જોબ ચાર્ટ અલગ કરવામાં આવે
• પ્રથમ-દ્વિતીય ઉચ્ચતર પગાર ધોરણ પરીક્ષા પાસ કરવાની શરતે પાત્રતા તારીખ મુજબ મંજૂર કરવી
• પંચાયત વિભાગ સિવાયની કામગીરી તલાટીને ન આપવામાં આવે

'તલાટીના પ્રશ્ન મુદ્દે સરકાર હકારાત્મક'

રાજ્યમાં પડતર પ્રશ્નોને લઇ તલાટીઓ હડતાળ પર ઉતર્યા છે. આ મુદ્દે પંચાયત મંત્રી બ્રિજેશ મેરજાએ નિવેદન આપતા જણાવ્યું કે  તલાટીઓના પ્રશ્નો ઉકેલાયા છે. આ મુદ્દે સરકાર પણ હકારાત્મક છે. કેટલાક પ્રશ્નોમાં નાણા વિભાગની મંજૂરી લેવી પડે છે. જેથી મંજૂરીના કારણે અમૂક પ્રશ્નો પડતર છે. આ તમામ પ્રશ્નો ઉકેલવા સરકાર કટિબદ્ધ છે. સાથે ગ્રામ્યની વ્યવસ્થા ન ખોરવાવા માટે સરકાર સતર્ક છે.