- લોકસભામાં 144 બેઠકો પર ભાજપનો પ્લાન '
- 40 બેઠકો પર મેગા રેલી યોજશે વડાપ્રધાન મોદી
- અમિત શાહ અને જેપી નડ્ડાને 104 સીટોની જવાબદારી સોંપાઈ
ગુજરાત વિધાનસભાની ચૂંટણીમાં જબરદસ્ત જીત બાદ હવે ભાજપ દ્વારા દેશની લોકસભાની તૈયારીઓ પણ ધીમે ધીમે શરૂ કરી દેવામાં આવી છે. જેના ભાગરૂપે ભાજપ દ્વારા 144 લોકસભા બેઠકો માટે ખાસ રણનીતિ તૈયાર કરવામાં આવી છે આ 144 બેઠક એ છે જેમાં મોદી લહેર હોવા છતાં ગત લોકસભાની ચૂંટણી ભાજપને હારનો સામનો કરવો પડ્યો હતો. હવે આગામી ચૂંટણીમાં આ બેઠકો જીતવા માટે વડાપ્રધાન મોદી, ગૃહમંત્રી અમિત શાહ અને રાષ્ટ્રીય અધ્યક્ષ જેપી નડ્ડાના શિરે જવાબદારી સોંપાઈ છે.
યુપી-બિહાર ઉપરાંત તેલંગાણા અને ઓડિશા પર ખાસ નજર
યુપી-બિહાર ઉપરાંત તેલંગાણા અને ઓડિશાની લોકસભા સીટો પર ખાસ ધ્યાન કેન્દ્રિત કર્યું છે. 2019ની ચૂંટણીમાં ભાજપે 303 બેઠકો જીતી હતી. ત્યારે આગામી લોકસભામાં ભાજપે 350 બેઠકોનો લક્ષ્યાંક રાખ્યો હોવાની સૂત્રો પાસેથી માહિતી મળી રહી છે.જે માટે ભાજપે 40 મંત્રીઓની અલગ ટીમ બનાવી છે, આ ટીમના સભ્યને ક્લસ્ટર ઈન્ચાર્જ કહેવામાં આવ્યું છે. વધુમાં દરેક મંત્રીને 2-3 લોકસભા બેઠકો સોંપાઈ છે. મંત્રીઓની ટીમ ભૌગોલિક, આર્થિક, સામાજિક અને જાતીય સમીકરણ માટે બ્લુ પ્રિન્ટ તૈયાર કરશે.ન્યૂઝ એજન્સીના સમાચાર દ્વારા મળતી વિગત અનુસાર વડાપ્રધાન નરેન્દ્ર મોદી 40 સીટો પર મેગા રેલી કરી શકે છે. આ ઉપરાંત બાકીની 104 સીટો પર અમિત શાહ અને જેપી નડ્ડા રેલીઓ કરશે.
ઉત્તર પ્રદેશની 20 બેઠકો પર પણ મોદી-યોગી જોડી ખીલી શકી નથી
ઉત્તર પ્રદેશમાં લોકસભાની 20 બેઠકો એવી છે કે જ્યાં 2019માં પણ મોદી અને યોગીની જોડી એકસાથે ખીલી ન શકી. તેમાંથી મૈનપુરી, રાયબરેલી, ગાઝીપુર અને આંબેડકર નગર બેઠકો મુખ્ય છે. વધુમાં 2022માં રાષ્ટ્રપતિની ચૂંટણી બાદ નીતીશ કુમારે બિહારમાં ભાજપને મોટો ઝટકો આપ્યો હતો. નીતિશે ભાજપ સાથે ગઠબંધન તોડીને આરજેડી સાથે મળીને સરકાર બનાવી. આ પછી બિહારમાં ભાજપની ખેંચતાણ વધી ગઈ છે. જ્યારે 2019માં નીતીશ અને ભાજપની જોડીએ 40માંથી 39 બેઠકો જીતી હતી. એનડીએ ગઠબંધનને કિશનગંજની એક સીટ પર હારનો સામનો કરવો પડ્યો હતો.
કર્ણાટક બાદ ભાજપની નજર માત્ર તેલંગાણા પર
વધુમાં દક્ષિણ ભારતમાં કર્ણાટક બાદ ભાજપની નજર માત્ર તેલંગાણા પર છે. 2019ની ચૂંટણીમાં ભાજપે તેલંગાણામાં 17માંથી 5 બેઠકો જીતી હતી. વધુમાં 2021ની વિધાનસભા ચૂંટણીમાં હાર્યા બાદ બંગાળમાં રાજ્ય એકમ નબળું પડી ગયું છે. 2019માં ભાજપે બંગાળમાં 42માંથી 18 બેઠકો જીતી હતી. તો 2019 માં તમિલનાડુ એકમાત્ર મોટું રાજ્ય હતું જ્યાં ભાજપ એક પણ સીટ જીતી શકી નથી. અહીં ભાજપની ટિકિટ પર ચૂંટણી લડનાર કેન્દ્રીય મંત્રી પણ ચૂંટણી હારી ગયા હતા. બીજી બાજુ 2019માં ભાજપ અને શિવસેનાએ સાથે મળીને મહારાષ્ટ્રની ચૂંટણી લડી હતી. 48 બેઠકોમાંથી બંને પક્ષોએ 41 બેઠકો જીતી હતી.પરંતુ છેલ્લા 3 વર્ષમાં મહારાષ્ટ્રનું આખું સમીકરણ બદલાઈ ગયું છે. ઓડિશાના મુખ્યમંત્રી નવીન પટનાયક રાષ્ટ્રપતિની ચૂંટણીમાં ભાજપને સમર્થન આપનારા પ્રથમ નેતા હતા. ઓડિશામાં લોકસભાની 21 બેઠકો છે. જેમાં ગત ચૂંટણી માં ભાજપે અહીં 8 બેઠકો જીતી હતી.
આ ઉપરાંત કર્ણાટક, આસામ અને પંજાબમાં 4-4 બેઠકો, ઝારખંડ પર પણ ધ્યાન કેન્દ્રિત કરે છે કર્ણાટક, આસામ અને પંજાબમાં 4-4 લોકસભા સીટો છે, જેના પર ભાજપે જીતવા માટે ખાસ રણનીતિ અપનાવી હોવાનું જાણવા મળી રહ્યું છે.
