Bhojpuri star: ભોજપુરી સ્ટાર પવનસિંહએ ચૂંટણી લડવાની જાહેરાત કરી છે. તેણે પોતાના સોશિયલ મીડિયા એકાઉન્ટ પરથી ટ્વીટ કરીને કહ્યું, 'હું મારા સમાજ, જનતા અને માતાને આપેલા વચનને પૂર્ણ કરવા માટે ચૂંટણી લડીશ. આપ સૌના આશીર્વાદ અને સહકારની અપેક્ષા છે.
વાયદો પૂરો કરવા ચૂંટણી લડવાની જાહેરાત
પશ્વિમ બંગાળના આસનસોલથી ચૂંટણી લડવાનો ઇનકાર કરી ચુકેલા ભોજપુરી સ્ટાર પવનસિંહએ યુટર્ન લેતા ફરી ચૂંટણી લડવાની જાહેરાત કરી છે. પવનસિંહએ સોશિયલ મીડિયા પ્લેટફોર્મ X પર લખ્યુ "હું મારા સમાજ, જનતા જનાર્દન અને માતાને કરેલો વાયદો પૂરો કરવા માટે ચૂંટણી લડીશ. તમારા સૌના આર્શીવાદ અને સહયોગની અપેક્ષા છે. જય માતાજી."
પહેલા ચૂંટણી લડવાનો ઇનકાર કર્યો
લોકસભા ચૂંટણીને લઇને દેશમાં રાજકીય ગરમાવો પ્રસર્યો છે ત્યારે ભારતીય જનતા પાર્ટી (BJP) એ 195 ઉમેદવારોની યાદી જાહેર કરી હતી. જેમાં પશ્ચિમ બંગાળની 20 બેઠકોનો સમાવેશ થતો હતો. આ 20 સીટોમાં આસનસોલ સંસદીય સીટ પણ સામેલ હતી. જ્યાંથી ભોજપુરી ફિલ્મ ઇન્ડ્સ્ટ્રીઝના અભિનેતા પવનસિંહને મેદાનમાં ઉતાર્યા હતા. પરંતુ ટિકિટ મળ્યાના 24 કલાકમાં અભિનેતાએ ચૂંટણી લડવાનો ઇનકાર કરતા સૌ કોઇ ચકિત થઇ ગયા હતા. તમને જણાવી દઇએ કે તૃણમૂલ કોંગ્રેસના શત્રુઘ્ન સિન્હા આસનસોલ બેઠક પરથી લોકસભાના સાંસદ છે.
જેપી નડ્ડા સાથે મુલાકાત કરી
આસનસોલ બેઠક પરથી ચૂંટણી લડવાનો ઇનકાર કર્યા પછી પવનસિંહએ બીજેપીના અધ્યક્ષ જેપી નડ્ડા સાથે મુલાકાત કરી હતી. બેઠક બાદ જે પણ નિર્ણય કરીશ તે સમય આવ્યે દરેકને જણાવીશ. ત્યારે તેમને પુછવામાં આવ્યુ કે તમે કોઇ બીજી બેઠક પરથી ચૂંટણી જંગમાં ઉતરશો તો પવનસિંહએ કહ્યુ હતુ કે જે પણ થશે સારુ જ થશે.
કોણ છે પવનસિંહ
પવનસિંહ પ્લેબેક સિંગર છે. તેઓ તેમના ભોજપુરી ગીત, લોલીપોપ લગેલુ માટે જાણીતા છે. ભોજપુરી ફિલ્મોમાં બે આંતરરાષ્ટ્રીય પુરસ્કાર મળ્યા છે. પવનસિંહનો જન્મ 5 જાન્યુઆરી 1986ના રોજ બિહારના અરાહમાં થયો હતો. તેઓ રાજપૂત પરિવારમાંથી આવી રહ્યા છે. પવનસિંહને ચાહનારો મોટો વર્ગ છે. ફિલ્મોમાં એક્ટિંગ અને સિંગિંગની સાથે તેમની સંપત્તિ પણ કરોડોમાં છે.
આસનસોલ બેઠકનું રાજકિય ગણિત
ભાજપ 2014થી આસનસોલ બેઠક પરથી ચૂંટણી જીતી રહ્યું છે. પરંતુ 2021માં તત્કાલિન ભાજપના સાંસદ બાબુલ સુપ્રિયો પાર્ટી છોડીને ટીએમસીમાં જોડાયા હતા. આ કારણોસર અહીં પેટાચૂંટણી યોજાઈ હતી જેમાં ભાજપનો પરાજય થયો હતો. 2022માં અહીં યોજાયેલી પેટાચૂંટણીમાં તૃણમૂલ કોંગ્રેસના શત્રુઘ્ન સિન્હા સાંસદ તરીકે ચૂંટાયા હતા.
