જોમ અને જુસ્સો / 'ભવ ભવની ભવાઇ', ચૈત્ર મહિનામાં ભવાઈના આયોજનની પરંપરા વિશે જાણ્યું નથી તો કઈ નથી જાણ્યું, ટેકનોલોજી સાથે ટક્કર

• આખોલ ગામે  ભવાઈના આયોજનની પરંપરા જાળવી રાખી
• અઢીસો વર્ષથી પ્રાચીન ભવાઇ ભજવવામાં આવે છે
• દૂર દૂરથી હજારોની સંખ્યામાં લોકો પણ આવે છે નિહાળવા

છેલ્લા કેટલાક વર્ષોથી વિશ્વ આધુનિકતાના રંગે રંગાઈ રહ્યું છે. મનોરંજનના આધુનિક માધ્યમોની અસર હવે છેક ગામડાઓ સુધી પ્રસરી ગઈ છે. પરંતુ આવા સમયે પણ ડીસા તાલુકામાં આવેલા આખોલ ગામે દર ચૈત્ર મહિનામાં ભવાઈના આયોજનની પરંપરા જાળવી રાખી છે. વિસરાતી વિરાસતને યાદ કરવાની ગામની આ પરંપરા અદ્દભુત છે.ડીસા તાલુકામાં આવેલા આખોલ ગામમાં આધુનિક યુગમાં પણ ભવાઇ ભજવાઈ રહી છે. આધુનિક યુગમાં ભવાઇ ભલે ભૂલાવવા માંડી પરંતુ  આખોલ ગામમાં લગભગ અઢીસો વર્ષથી પ્રાચીન ભવાઇ ભજવવામાં આવે છે અને આ ભવાઇ નિહાળવા માટે દૂર દૂરથી હજારોની સંખ્યામાં લોકો પણ આવે છે. પરંતુ ભવાઇ મનોરંજનની સાથે સાથે  જ્ઞાન, મનોરંજન અને સંસ્કૃતિના વહન તરીકે અહીં વર્ષોથી પ્રચલિત રહી છે.

ભવાઈ કળા દ્વારા ભૌગોલિક અને સાંસ્કૃતિક પરિચય
એક સમયે જ્યારે સંચારના સાધનો સીમિત હતા ત્યારે લોકો માટે સંચાર વ્યવસ્થાનું કામ ભવાઈના માધ્યમથી થતું હતું. ત્યારે આ પ્રાચીન ભવાઇકળા આવનારી પેઢીમાં પણ જીવંત રહે તે માટે આખોલ ગામમાં ચૈત્ર માસમાં ભવાઇ ભજવવામાં આવે છે. જેમાં અલગ અલગ પ્રકારના નાટકો રજૂ કરવામાં આવે છે અને સંવાદ અને વેશભૂષાની મદદથી લોકોને અન્ય સંસ્કૃતિથી અવગત કરવામાં આવે છે. આ ભવાઈ કળા દ્વારા સ્થાનિક લોકોને અન્ય વિસ્તારનો ભૌગોલિક અને સાંસ્કૃતિક પરિચય પણ કરાવાય છે.

સંસ્કૃતિને જીવંત બનાવવા માટે આગળ આવવું જરૂરી

આખોલ ગામમાં ભજવાતી ભવાઇનો ઇતિહાસ સદીઓ જૂનો છે. સદીઓ બાદ દરેક ભૌગોલિક પ્રદેશ પ્રમાણે સંસ્કૃતિઓમાં પરીવર્તન થઈ રહ્યું છે. નવી પેઢી પણ એટલા જ જોમ અને જુસ્સાથી ભવાઇ ભજવે છે.ભૂલાતી જતી સંસ્કૃતિને જો નાનકડા ગામના લોકો પણ ગંભીર સમજીને જીવંત રાખવાનો પ્રયાસ કરી રહ્યા હોય ત્યારે શિક્ષિત અને શહેરી લોકો પણ ભારતની ભૂલાતી જતી સંસ્કૃતિને જીવંત બનાવવા માટે આગળ આવવું જરૂરી છે. જેથી ભૂલાતી જતી ભવ્ય ભારતીય સંસ્કૃતિને એકવાર ફરી જીવંત કરી શકાય અને તેનાથી નવી પેઢીને જોડી શકાય.