રાજકોટ ઇન્ટરનેશનલ એરપોર્ટ મુદ્દે જય વસાવડાનો વધુ એક વીડિયો આવ્યો છે. અગાઉના વીડિયોમાં જય વસાવડાએ જનતાને પડતી મુશ્કેલીના ઉલ્લેખ કર્યો હતો. જે મામલે રાજકારણ ગરમાતા જય વસાવડાએ બીજો વીડિયો મૂકી ફોડ પાડ્યો છે. તેમણે કહ્યું કે મને પક્ષ વિપક્ષના રાજકારણમાં સહેજ પણ રસ નથી. પરંતુ કેટલાંકે આમાં પોલિટિક્સ શરૂ કરી. 'મારો સવાલ એક જ છે કે જો કેટલીક સુવિધાઓ અધુરી છે તો લોકાર્પણ માટે આટલી ઉતાવળ કરવાની ક્યા જરૂર હતી?
મને પક્ષ વિપક્ષના રાજકારણમાં રસ નથી : જય વસાવડા
વધુમાં તેમણે કહ્યું કે નરેન્દ્રભાઈ મોદીનો હું મોટો ચાહક છું અને એમના નામ સાથે જોડાયેલી વસ્તુમાં અસુવિધા હોય તે મને ચાહક તરીકે યોગ્ય ન લાગે એટલા માટે મારે વાત મુકવી પડી! પાણી ઉપરાંત સાઈનબોર્ડ, રસ્તા સહિતની સુવિધાનો અભાવ હોવાનો તેમણે વીડિયોમા ઉલ્લેખ કર્યો હતો.
એરપોર્ટ શરૂ કરવામાં ઉતાવળ કરાઇ : વી. પી. વૈષ્ણવ
રાજકોટ ઇન્ટરનેશનલ એરપોર્ટ પર ચેમ્બર ઓફ કોમર્સના પ્રમુખ વી. પી. વૈષ્ણવે પણ સવાલ ઉઠાવ્યા હતા. તેઓએ કહ્યું કે 'નવુ એરપોર્ટ શરૂ કરવામાં ઉતાવળ કરાઇ હોય તેવું લાગી રહ્યું છે'
'એરપોર્ટ ઇન્ટરનેશનલ કક્ષાનું પણ સુવિધાઓ હજુ એ કક્ષાની નથી'. તથા 'જાન્યુઆરી ફેબ્રુઆરીમાં નવું એરપોર્ટ શરૂ કરવામાં આવનાર છે'
'ત્યાં સુધી રાજકોટનું ડોમેસ્ટિક એરપોર્ટ ચાલુ રાખવું જોઇએ'. 'અમે CM, સાંસદ, એરપોર્ટ ઓથોરિટીને સુવિધા અંગે માગ કરી' હોવાનો તેઓએ ઉલ્લેખ કર્યો હતો.
નવા બનેલા એરપોર્ટની સુવિધાને લઇ જય વસાવડાએ પ્રશ્નો ઉઠાવ્યા બાદ રાજકોટ એરપોર્ટને લઇ ભાજપના સાંસદ રામ મોકરિયાનું પણ નિવેદન સામે આવ્યું છે. તેમણે નાની-મોટી બાબત હોય તો પ્રશ્ન ઉકેલવા સૂચના આપી હોવાનું કહ્યું છે. તેમણે કહ્યું કે એરપોર્ટનું કામ ચાલી રહ્યું છે આ માત્ર કામ ચલાઉ એરપોર્ટ શરૂ થયું છે. બીજી તરફ પોતે પણ 2 દિવસમાં એરપોર્ટની મુલાકાત લેશે તેવો મોકરિયાએ દાવો કર્યો હતો.
