ગીર-સોમનાથ / દારુબંધીના લીરા ઉડ્યા,ખોદી જમીન નિકળ્યો દારુ,ગીર ગઢડાના બેડીયા ગામે અંડરગ્રાઉન્ડ ગોડાઉન ઝડપાયુ, 320 પેટીદારૂ જપ્ત

• ગીર-સોમનાથ જિલ્લામાં દારૂબંધીના લીરા ઉડ્યા
• ગીર-ગઢડાના બેડીયા ગામમાંથી દારૂનું અંડરગ્રાઉન્ડ ગોડાઉન ઝડપાયું
• ગોડાઉનમાંથી 320 પેટી વિદેશી દારૂ જપ્ત

ગીર-સોમનાથ જિલ્લામાં દારૂબંધીના લીરા ઉડ્યા હતા. ગીર-ગઢડાના બેડીયા ગામમાંથી દારૂનું અંડરગ્રાઉન્ડ ગોડાઉન નીકળ્યુ હતુ જેને લઈને પોલીસ પણ ચોંકી ગઈ હતી. પોલીસથી બચવા બુટલેગરે નવતર કિમીયો અજમાવ્યો હતો અને જમીનની અંદર આખો રુમ બનાવી ગોડાઉન બનાવી નાખ્યુ હતુ.ગોડાઉનમાંથી 320 પેટી વિદેશી દારૂ કર્યો જપ્ત કર્યો હતો અને બે આરોપી ધરપકડ કરી હતી. સાથે પોલીસે અન્ય એક રેડમા 36 બોટલ દારુ પકડ્યો હતો.

કુખ્યાત બુટલેગરોએ જમીનમાં ચોરખાનું બનાવ્યુ પણ ખાખીથી ન બચી શક્યા

પોલીસે પ્રથમ વાડીમાં પડેલા એક ટ્રેક્ટર ટ્રોલીમાં તાલપત્રી નીચે છુપાવેલો વિદેશી દારૂની 54 પેટીનો જથ્થો ઝડપી પાડ્યો હતો. ત્યારબાદ ઉનાના ઉમેજ ગામના કુખ્યાત બુટલેગર દીપક ઉર્ફે દીપુ ઉકા જાદવ તથા તેનો ભાણેજ સામેતર ગામનો સિદ્ધરાજ ગોહીલ બંનેની પૂછપરછ કરતાં વાડીના ખૂણામાં નવા બની રહેલા મકાનની બાજુમાં જમીનમાં બનાવેલું ચોરખાનું બતાવ્યું હતું. જેમાં તપાસ કરતા મોટો જથ્થો જોવા મળી આવ્યો હતો. જેને પગલે પોલીસે વિદેશી દારૂની 250 પેટી તથા 20 પેટી બીયરની મળી આવી હતી. આમ આ દરોડામાં કુલ વિદેશી દારૂની 304 પેટી તથા બીયરની 20 પેટીઓ મળી આવી હતી. જેની કુલ કિં. રૂ.15,07,200ના જથ્થા ઉપરાંત વાડીમાંથી દારૂની હેરાફેરી માટે રખાયેલા ટ્રેકટર-ટ્રોલી 3, બે મોબાઈલ મળી કુલ રૂ. 30.17 લાખના મુદ્દામાલને જપ્ત કરવામાં આવ્યો હતો.

દારૂની ખેપ મારવાની પેરવીમાં હતા બુટલેગરો

અંગ્રેજી દારૂની હેરફેરની પ્રવૃત્તિ ડામી દેવા પોલીસ વિભાગ હરક્તમાં આવી કામગીરી કરી રહ્યું છે. ત્યારે ગતરાત્રીના વિદેશી દારૂની હેરફેરના મોટા કૌભાંડનો પર્દાફાશ થયો છે. એલસીબીના પ્રવીણ મોરી, રાજુ ગઢિયાને બાતમી મળેલી કે, ઉમેજ ગામના કુખ્યાત બુટલેગર દીપુ જાદવે પોતાની વાડીમાં મોટી માત્રામાં વિદેશી દારૂનો જથ્થો ઉતાર્યો છે. જેની તે હેરાફેરી કરવાની ફિરાકમાં છે. જેના આધારે એલસીબીના પીઆઈ એ.એસ.ચાવડા, પીએસઆઈ વી.કે. ઝાલાએ સ્ટાફે દોડી જઇ કાર્યવાહી હાથ ધરી હતી.