અમૂલ ડેરી / હલ્દી દૂધ બાદ અમૂલે આ 2 નવા રોગપ્રતિકારક ફ્લેવર દૂધ કર્યા લોન્ચ, 6 મહિના સુધી બગડશે નહીં

• અમૂલે નવા 2 તુલસી દૂધ અને જીંજર દૂધ લોન્ચ
• છ માસ સુધી દૂધની રહેશે લાઇફ લાઇન
• અશ્વગંધા-હની દૂધ પણ લોન્ચ કરશે અમૂલ

કોરોના સામે લડવા દેશના સૌથી મોટા દૂધ ઉત્પાદક સંઘ ગુજરાત કો-ઓપરેટીવ મિલ્ક માર્કેટિંગ ફેડરેશને(GCMMF- અમૂલ) રોગપ્રતિકારક શક્તિ વધારવા હલ્દી દૂધ લોન્ચ કર્યું હતું. ત્યારે વધુ બે રોગપ્રતિકારક શક્તિ ધરાવતા દૂધ જીંજર અને તુલસી દૂધને લોન્ચ કરવામાં આવ્યા છે. આ બન્ને દૂધમાં વાસ્તવિકરીતે આદુ અને તુલસીનો સમન્વય કરવામાં આવ્યો છે. 

હળદરના દુધને ગ્રાહકો તરફથી સારો પ્રતિસાદ મળ્યો

અમૂલના મેનેજીંગ ડિરેક્ટર આર એસ સોઢીએ જણાવ્યું કે, અમારા હળદરના દુધને ગ્રાહકો તરફથી સારો પ્રતિસાદ મળી રહ્યો છે. એટલે જ અમે તુલસી અને આદુની ફ્લેવરમાં દૂધ રજુ કર્યું છે. આ ઉપરાંત અમે હની અને અશ્વગંધાના ટેસ્ટ સાથે સ્વાસ્થ્યવર્ધક વધુ પીણાં રજૂ કરવા સજજ છીએ. અમે મધ ઉત્પાદકો સાથે વાત કરી અને ખરીદી શરૂ કરી છે અને અમારી પ્રોડક્ટ ડેવલપમેન્ટ ટીમ આના પર કામ કરી રહી છે અને તે ટૂંક સમયમાં જ બજારમાં આવશે.

આ દૂધ 6 મહિના સુધી બગડશે નહીં

આ બન્ને દૂધ રૂમ ટેમ્પરેચરે 6 માસની લાઈફ ધરાવે છે. રેડી ટુ ડ્રીંક પીણાંની કેટેગરીમાં ભારે સ્પર્ધા હોવા છતાં વિવિધ પ્રકારની ફ્લેવર, પેકેજીંગ, વિવિધ પેક સાઈઝ અને વિવિધ કિંમતે રજૂઆત કરીને અમૂલે તેની આગેવાની જાળવી રાખી છે. અમૂલના પ્રભાવક  પોર્ટફોલિયોમાં ફલેવર્ડ  મિલ્ક, કોલ્ડ કોફી, મિલ્કશેકસ, સ્મુધીઝ, એનર્જી મિલ્ક, તથા કઢાઈ દૂધ, ગોળ આધારિત જેગરી દૂધ, આયુર્વેદિક મેમરી મિલ્ક, માલ્ટ ડ્રીંક, ડેરી આધારિત મોકટેઈલ્સ ઉપરાંત છાશ, લસ્સી અને ફ્રૂટ ડ્રીંક વગેરે જેવાં પરંપરાગત પીણાંનો સમાવેશ થાય છે.

તુલસી દૂધઃ તુલસીને પવિત્ર ગણવામાં આવે છે અને તે સાચા અર્થમાં રોગનિવારક ગુણધર્મો ધરાવતી હોવાથી તેમાં એન્ટી માઈક્રોબીયલ અને એન્ટીએલર્જીક ગુણધર્મો છે. જેથી તે બેક્ટેરીયાને કારણે કે ફૂગને કારણે થયેલા ચેપનુ નિવારણ કરે છે. સાથોસાથે એલર્જી અને અસ્થમાના ઉપચારમાં પણ ખૂબ જ ઉપયોગી બને છે.

જીંજર એટલે કે આદુનું દૂધઃ આદુનો ઉપયોગ એટલો વ્યાપક છે કે તે ખુદ ઔષધીના ખજાના સમાન છે. એક આયુર્વેદિક સૂત્ર છે કે દરેક વ્યક્તિએ પાચન શક્તિ વધારવા બપોરના અથવા રાત્રી ભોજન પહેલાં તાજુ આદુ ખાવુ જોઈએ. આથી આવાં આયુર્વેદિક ગુણધર્મો ધરાવતાં અનોખાં અને તુરત જ ઉપયોગમાં લઈ શકાય તેવાં પીણાં હવે બજારમાં ઉપલબ્ધ છે. આ બંને દૂધ 125 MLના કેનમાં ઉપલબ્ધ છે અને તેની કિંમત માત્ર 25 રૂપિયા રાખવામાં આવી છે.