ગઠીયાઓ બેફામ / પોલીસના સતત પેટ્રોલિંગ વચ્ચે અમદાવાદમાં બાઇકર્સ યુવતીનો આઇફોન ખેંચી રફુચક્કર, કામગીરી પર સવાલ

• બાઈકર્સ યુવતીના હાથમાંથી આઈફોન ખેંચી ગયા
• સેટેલાઇટ વિસ્તારમાં મોડી રાતે બનેલો બનાવ
• આનંદનગર પોલીસે ગુનો દાખલ કર્યો

તથ્ય પટેલે સર્જેલા અકસ્માત બાદ પુરઝડપે વાહન હંકારતા યંગસ્ટર સામે પોલીસે તવાઇ બોલાવી છે ત્યારે સ્નેચર્સને કોઇ ફરક પડતો ના હોય તેવું લાગી રહ્યું છે. પોલીસે આજે ઠેર-ઠેર નાકાબંધી કરી દીધી અને રફતારથી વાહન ચલાવતા નબીરાઓ તેમજ યંગસ્ટર વિરુદ્ધ કાર્યવાહી કરી છે. આ સ્થિ‌તિમાં મોબાઇલ સ્નેચિંગની ઘટના બને તો પોલીસની કામગીરી ઉપર અનેક સવાલ ઊભા થાય છે. સ્નેચર્સ પણ ધૂમ સ્ટાઇલથી વાહન ચલાવીને ફરાર થાય છે તો તે પોલીસના હાથે કેમ નથી આવી રહ્યા? અમદાવાદ શહેરના સેટેલાઇટ વિસ્તારમાં મોડી રાતે મોબાઇલ સ્નેચર્સ યુવતીના હાથમાંથી આઇફોન સ્નેચિંગ કરીને નાસી જતાં મામલો પોલીસ સ્ટેશન સુધી પહોંચ્યો છે. 

યુવતીનો આઈફોન લઈને ગઠીયાઓ નાસી ગયા 
સેટેલાઇટ વિસ્તારમાં આવેલા કલાસાગર-2માં રહેતી અક્ષિતા ભારદ્વાજે આનંદનગર પોલીસ સ્ટેશનમાં મોબાઇલ સ્નેચર્સ વિરુદ્ધ ફરિયાદ નોંધાવી છે. અક્ષિતા ભારદ્વાજ મૂળ ઉત્તરપ્રદેશની છે અને આંબલી-બોપલ રોડ પર આવેલી એક કંપનીમાં નોકરી કરે છે, જ્યાં તે પીજીમાં રહે છે. અક્ષિતા પોતાના રૂમ પરથી ગઈકાલે નજીકમાં આવેલી રેસ્ટોરાંમાં ચા પીવા માટે ગઇ હતી. ચા પીને અક્ષિતા તેના મિત્ર શિવાંગ સાથે ફોન પર વાત કરતા-કરતા રૂમ તરફ જઇ રહી હતી ત્યારે બાઇક પર આવેલા શખ્સોએ તેનો મોબાઇલ સ્નેચિંગ કરી લીધો હતો. અક્ષિતાનો આઇફોન લઇને ગ‌ઠીયાઓ નાસી ગયા હતા. અક્ષિતાએ વાત કરવાનું એકદમ બંધ કરી દેતાં શિવાંગને કંઇક બનાવ બન્યો હોવાની ખબર પડી ગઇ હતી, જેથી તે તરત જ અક્ષિતા પાસે પહોંચી ગયો હતો. બંને જણાએ મોડી રાતે મોબાઇલ સ્નેચર્સ વિરુદ્ધ આનંદનગર પોલીસ સ્ટેશનમાં ફરિયાદ કરી છે. પોલીસે આ મામલે ગુનો દાખલ કરીને તપાસ શરૂ કરી છે.

 
યુવતીએ આનંદનગર પોલીસ સ્ટેશનમાં નોંધાવી ફરિયાદ
સમગ્ર ઘટનામાં ચોંકાવનારી વાત એ છે કે સેટેલાઇટ, વસ્ત્રાપુર, આનંદનગર સહિતના પોશ વિસ્તારમાં પોલીસે પેટ્રો‌લિંગ વધારી દીધું છે, જ્યારે ઠેર-ઠેર ચેકિંગ પણ કરી રહી છે ત્યારે આવી ‌સ્થ‌િતમાં બાઇક પર આવીને ત્રણ શખ્સોએ આઇફોન સ્નેચિંગ કરી લીધો છે. પોલીસની આ કામગીરી પર અનેક સવાલ ઊભા થયા છે. સવાલ એ ઊભો થાય છે કે શું પોલીસ મોડી રાતે જે ચેકિંગ કરે છે તે માત્ર નબીરાઓને પકડવા માટેનું હોય છે.