નિવેદન / ‘તારક મહેતા....'માં નવી દયાબેન બનશે આ ગુજરાતી એક્ટ્રેસ? પ્રોડ્યુસરે કર્યો ખુલાસો

‘તારક મહેતા કા ઉલ્ટા ચશ્મા’માં દિશા વાકાણી હવે પરત નહીં જ આવે તે નક્કી થઇ ગયુ છે. થોડા દિવસથી ચર્ચા છે કે, એક્ટ્રેસ અમી ત્રિવેદી ‘દયાબેન’ના પાત્રમાં જોવા મળશે. જોકે આ વિશે અમીએ પહેલા જ કહી દીધુ છે કે શોના મેકર્સ દ્વારા હજુ સુધી કોઇ કોન્ટેક્ટ કરવામાં આવ્યો નથી. હવે શોમાં અમી ત્રિવેદીની કાસ્ટિંગ અંગે ‘તારક મહેતા કા ઉલ્ટા ચશ્મા’ના પ્રોડ્યુસર આસિત મોદીએ ખુલાસો કર્યો છે. 

એક ઈન્ટરવ્યૂમાં આસિત મોદીએ કહ્યું, “હજુ સુધી અમે દયાબેનના રોલ માટે કોઇ એક્ટ્રેસને ફાઇનલ નથી કરી. હજુ પણ યોગ્ય એક્ટ્રેસની શોધ ચાલી રહી છે.'' આસિત મોદીના આ નિવેદન પરથી સ્પષ્ટ થાય છે કે, તેઓ દિશા વાકાણીનું રિપ્લેસમેન્ટ શોધી રહ્યા છે એટલે કે અમી ત્રિવેદીનું નામ આ રોલ માટે ફાઇનલ નથી. 

અગાઉ અમી ત્રિવેદીએ એક ઈન્ટરવ્યૂમાં કહ્યું હતું, “મને રોલ માટે અપ્રોચ કરવામાં નથી આવી. પરંતુ મારા ફ્રેન્ડ્સ મને સલાહ આપી રહ્યા છે કે મારે આ રોલ કરવો જોઇએ. દયાબેનનું કેરેક્ટર હું સારી રીતે કરી શકીશ તેવું મારા ફ્રેન્ડ્સનું માનવુ છે, પણ હજુ રોલ ઓફર થયો નથી અને મેકર્સે પણ મારો કોન્ટેકટ નથી કર્યો.''

જણાવી દઈએ કે, અમી ત્રિવેદી મનોરંજન જગતનું જાણીતું નામ છે. ‘કિટ્ટૂ સબ જાનતી હૈ’, ‘કુમકુમ-પ્યારા સા બંધન’, ‘જાને ક્યા બાત હુઈ’, ‘ખિચડી’, ‘સજન રે જૂઠ મત બોલો’, ‘પાપડ પોળ’, ‘ચિડિયા ઘર’, ‘સાત ફેંરો કી હેરાફેરી’ વગેરે જેવા ટીવી શોમાં અમીએ કામ કર્યુ છે. દિશા વાકાણીની વાત કરીએ તો 2017 સપ્ટેમ્બર મહિનાથી શોમાંથી ગાયબ છે. મેટરનિટી લીવ પર ગયેલી દિશા શોમાં પરત નથી આવી. લાંબો સમય સુધી રાહ જોયા બાદ શોના મેકર્સે નવી એક્ટ્રેસ શોધવાની શરૂઆત કરી છે.