સરાહનીય / લોન આસાનીથી મળે છે.! PM સ્વનિધિ હેઠળ લોન મંજૂર અને વિતરણમાં AMC દેશમાં પ્રથમ સ્થાને, જાહેર થયા આંકડા

• PM સ્વનિધિ હેઠળ લોન મંજૂર અને વિતરણમાં AMC દેશમાં પ્રથમ સ્થાને
• લખનૌ મ્યુનિ. કોર્પોરેશન બીજા ક્રમાંકે
• શેરી ફેરિયાઓને રૂ. ૧૩૩.૭૫ કરોડની લોન મંજૂર કરાઈ

પ્રધાનમંત્રી સ્ટ્રીટ વેન્ડર આત્મનિર્ભર નિધિ એટલે કે પીએમ સ્વનિધિ યોજના હેઠળ લોન મંજૂર અને ડિસ્બર્સમેન્ટ કરાવવામાં અમદાવાદ મ્યુનિ. કોર્પોરેશન હાલ સમગ્ર દેશમાં પ્રથમ ક્રમાંકે છે, એટલે કે PM સ્વનિધિ હેઠળ લોન મંજૂર કરવામાં અને વિતરણ કરવામાં AMC દેશમાં પ્રથમ સ્થાને રહ્યું છે. જ્યારે લખનૌ મ્યુનિ. કોર્પોરેશન બીજા ક્રમાંકે અને કાનપુર મ્યુનિ. કોર્પોરેશન ત્રીજા ક્રમાંકે છે.કોવિડ-૧૯ સંદર્ભના તબક્કાવાર લોકડાઉન બાદ શેરી ફેરિયાઓને કાર્યકારી મૂડી માટે લોન મળી રહે તે આશયથી કેન્દ્ર સરકાર દ્વારા પ્રધાનમંત્રી સ્ટ્રીટ વેન્ડર્સ આત્મનિર્ભર નિધિ યોજના અમલમાં મુકાઈ છે.

પ્રથમ વખત નિયમિત લોન ભરપાઈ કરનારને બીજી ટર્મ માટે અપાઈ છે લોન
અમદાવાદ મ્યુનિ. તંત્રના યુસીડી વિભાગ દ્વારા શેરી ફેરિયાઓ જેવા કે શાકભાજી, ફળ, ખાણીપીણી, ચાની લારીવાળા, પાથરણાંવાળાં, જીવન-જરૂરી અન્ય વસ્તુઓની ફેરી કરીને અથવા ફૂટપાથ-ખુલ્લી જગ્યામાં વેચાણ કરનારા તમામના ધંધા-રોજગારને માઠી અસર થઈ હતી. આ લોકોના ધંધા-રોજગારને પુનઃ બેઠો કરવા માટે પીએમ સ્વનિધિ યોજના જૂન-૨૦૨૦થી અમલમાં મુકાઈ છે. આ યોજના હેઠળ મ્યુનિ. તંત્ર દ્વારા વર્ષ ૨૦૨૦-૨૧થી ચાલુ વર્ષ ૨૦૨૩-૨૪માં ફેરિયાઓને કોઈ પણ જામીનગીરી વગર રૂ. ૧૦ હજારની લોનસહાય બેન્ક મારફતે આપવામાં આવે છે, જે કાર્યકારી મૂડી ભંડોળ તરીકે શેરી ફેરિયાઓને મળે છે. પ્રથમ વખત નિયમિત લોન ભરપાઈ કરનારને બીજી ટર્મ માટે રૂ. ૨૦ હજાર, ત્રીજી ટર્મ માટે રૂ. ૫૦ હજારની લોન અપાય છે.

૧૦ હજારની પ્રથમ લોન પેટે કુલ રૂ. ૮૭.૩૩ કરોડ
અત્યાર સુધીમાં કુલ ૧,૩૮,૬૫૩ શેરી ફેરિયાઓની અરજીને મ્યુનિ. યુસીડી ખાતાની વોર્ડ ઓફિસ ખાતેથી ઓનલાઇન ફોર્મ ભરી વિવિધ સરકારી, ખાનગી અને સહકારી બેન્કમાં સ્પોન્સર કરાઈ છે.તંત્ર  દ્વારા ૮૭,૩૩૭ શેરી ફેરિયાઓને રૂ. ૧૦ હજારની પ્રથમ લોન પેટે કુલ રૂ. ૮૭.૩૩ કરોડ, પ્રથમ લોન ભરપાઈ કરનાર ૧૯,૬૯૯ શેરી ફેરિયાઓને રૂ. ૨૦ હજારની લોન પેટે કુલ રૂ. ૩૯.૪૦ કરોડ અને ૧,૪૦૪ શેરી ફેરિયાઓને રૂ. ૫૦ હજારની ત્રીજી લોન પેટે રૂ. ૩.૦૨ કરોડ મળી કુલ ૧,૦૮,૪૪૦ શેરી ફેરિયાઓને રૂ. ૧૩૩.૭૫ કરોડની લોન બેન્ક મારફતે મંજૂર કરાઈ છે.