ઓપરેશન ડિમોલિશન / અમદાવાદમાં ગેરકાયદેસર બાંધકામ વિરુદ્ધ AMC એક્શનમાં, બહેરામપુરાના અલ હબીબ એસ્ટેટ પર ઝીંક્યા હથોડા

• અમદાવાદમાં મ્યુનિશિપલ કોર્પોરેશનનું મિશન ડિમોલિશન
• બહેરામપુરાના અલ હબીબ એસ્ટેટમાં AMC ત્રાટક્યું
• કોર્પોરેશન દ્વારા જીપીએમસી એક્ટ 1949 હેઠળ કાર્યવાહી કરાઈ

અમદાવાદ મ્યુનિશિપલ કોર્પોરેશનના એસ્ટેટ વિભાગની ટીમ દ્વારા રોજેરોજ શહેરમાં ઓપરેશન ડિમોલિશન હાથ ધરાય છે. જે અંતર્ગત ગેરકાયદે બાંધકામો હટાવાઈ રહ્યાં છે. આ ઝુંબેશ અંતર્ગત તંત્ર ગઈકાલે દક્ષિણ ઝોનના બહેરામપુરા વોર્ડમાં આવેલા અલ હબીબ એસ્ટેટમાં હથોડા ઝીંક્યા હતા. જેના કારણે આવા બાંધકામકર્તાઓમાં ભારે ફફડાટ ફેલાઈ ગયો હતો.

દક્ષિણ ઝોનની એસ્ટેટ વિભાગની ટીમ દ્વારા દક્ષિણ ઝોનના બહેરામપુરા વોર્ડમાં ડ્રાફ્ટ ટીપી સ્કીમ નં. 63 (ઈસનપુર વેસ્ટ)માં રે.સ. નંબર 226+ 227+228+231 પૈકીમાં નારોલ સર્કલ પાસે આવેલા અલ હબીબ એસ્ટેટના પ્લોટ નં.23 માં અંદાજે 1300 ચો. ફૂટ ક્ષેત્રફળમાં કરવામાં આવેલા ગ્રાઉન્ડ ફ્લોર તેમજ ફર્સ્ટ ફ્લોરના ઇન્ડસ્ટ્રિયલ પ્રકારના ગેરકાયદે બાંધકામ સામે મ્યુનિ. કોર્પોરેશન દ્વારા જીપીએમસી એક્ટ 1949 હેઠળ કાર્યવાહી કરાઈ હતી. 

તંત્રની નોટિસનો અનાદર કરી બાંધકામકર્તાએ બાંધકામ પૂર્ણ કરી તેનો વપરાશ ચાલુ કર્યો હતો, જેના કારણે તંત્રે આ મિલકતમાંથી સાત જેટલી આઇશર ગાડીનો ઉપયોગ કરી માલ-સામાન ખાલી કરાવ્યો હતો તેમજ દાણીલીમડા પોલીસ સ્ટેશનના ચુસ્ત પોલીસ બંદોબસ્ત હેઠળ ગેરકાયદે બાંધકામ તોડી પાડ્યું હતું.

જ્યારે પૂર્વ ઝોનના રામોલ-હાથીજણ વોર્ડમાં આવેલી ટીપી સ્કીમ નં. 106 (રામોલ-વસ્ત્રાલ)માં તંત્રના રિઝર્વ પ્લોટમાં 14 કાચાં-પાકાં ઝૂંપડાં અને એક 150 ચો.મી.ની દેરીનું દબાણ થયું હતું. સત્તાવાળાઓએ આ તમામ દબાણને દૂર કરી 5327 ચો.મી. ક્ષેત્રફળના મ્યુનિ. રિઝર્વ પ્લોટને ખુલ્લો કરાયો હતો.

આ ઉપરાંત ગોમતીપુર વોર્ડમાં રાજેન્દ્ર પાર્કથી 132 ફૂટ રોડ સુધીના 18 મીટર ટીપી રોડમાંથી ચાર રહેણાક પ્રકારનાં કુલ 110 ચો.મી.ના બાંધકામને હટાવ્યાં હતાં તેમજ 18 વ્હીકલને લોક મારી રૂ. 2400નો વહીવટી ચાર્જ વસૂલ્યો હતો. વસ્ત્રાલ વોર્ડ અને ભાઈપુરા વોર્ડમાં 12 વ્હીકલને લોક મારી રૂ.3000 નો તેમજ નિકોલ વોર્ડમાં 16 વ્હીકલને લોક મારી રૂ.8000નો વહીવટી ચાર્જ વસૂલ્યો હતો.