- સાબરકાંઠાના પરવઠ ગામમાં અધૂરી અંતિમક્રિયાએ મૃતદેહ તણાયો
- હાથમતી નદીમાં પૂર આવી જતા મૃતદેહ ધસમસતા પ્રવાહમાં તણાયો
- ઉપરવાસમાં ભારે વરસાદના કારણે નદીમાં આવ્યું હતું પૂર
સાબરકાંઠાના વિજયનગરમાં ભારે વરસાદને પગલે નદીમાં પુરની સ્થિતિ જોવા મળી હતી. તે સમયે વિજયનગરની હાથમતી નદીમાં એક ઘટનાએ સમગ્ર લોકોને ચોકાવી નાખ્યા હતા. નદી પાસે એક સ્માશન ગ્રુહમાં અંતિમ વિધિ ચાલી રહી હતી. અંતિમ સંસ્કાર દરમિયાન અચાનક નદીમાં પુર આવતા સળગતી ચિતા સહિત મૃતદેહ તણાયો હતો. જેના કારણે અંતિમ સંસ્કારની વિધિ સંપન્ન થઈ શકી ન હતી. કેટલાક સ્થાનિકોએ પુલ પરથી આ સમગ્ર ઘટનાનો વીડિયો ઉતાર્યો હતો.
અગ્નિસંસ્કાર પૂર્ણ થાય એ પહેલાં નદીમાં પૂર આવી જતા સળગતી ચિતા પાણીમાં તણાઇ
ગુજરાતમાં સતત વરસી રહેલા વરસાદના કારણે અનેક નદીઓમાં પૂરની સ્થિતિ જોવા મળી રહી છે. એવામાં ગઇકાલે સોશિયલ મીડિયામાં એક વીડિયો વાયરલ થયો હતો. જેને સૌ કોઇને ચોંકાવી દીધા હતા. સાબરકાંઠાના વિજયનગરની હાથમતી નદીમાં એક સળગતી ચિતાના હજુ તો સંપૂર્ણ અગ્નિસંસ્કાર થાય એ પહેલાં નદીમાં પૂર આવી જતા સળગતી ચિતા પાણીમાં તણાઇ ગઇ.
વિજયનગરના પરવઠ ગામના એક નિવૃત્ત આચાર્યનું મોત નિપજ્યું
વધુમાં જણાવીએ કે, વિજયનગરના પરવઠ ગામ નજીક મંગળવારે સાંજના ગામના જ એક 90 વર્ષીય નિવૃત્ત આચાર્ય નાનજી સાજા ડામોરનું સોમવારે સાંજના 4 વાગ્યે મૃત્યુ થયું હતું. આથી, તેમનો દીકરો કે જે કલોલ નજીક એક ખાનગી સ્થળે નોકરી કરે છે. જેને જાણ કરતા જ તે મોડી રાત્રે આવી પહોંચ્યો હતો. બાદમાં મંગળવારના બપોરે 11:30 વાગ્યે તેમની સમાજના રીતીરીવાજ મુજબ સ્મશાન યાત્રા ઘરેથી નીકાળવામાં આવી અને ગામની સીમમાંથી પસાર થતી હાથમતી બ્રીજ નીચે તેઓના અંતિમસંસ્કાર શરૂ કર્યા. એ જ દરમિયાન ઉપરવાસમાં ભારે વરસાદના કારણે નદીમાં અચાનક પૂર આવી જતા અંતિમક્રિયા પૂર્ણ થાય એ પહેલા જ તેઓની સળગતી ચિતા પાણીમાં વહી ગઇ. જેનો વીડિયો સોશિયલ મીડિયામાં પણ ખૂબ વાયરલ થઇ રહ્યો છે.
છેલ્લા 24 કલાકમાં ગુજરાતના 183 તાલુકામાં વરસાદ વરસ્યો
નોંધનીય છે કે, છેલ્લા 24 કલાકમાં ગુજરાતના 183 તાલુકામાં વરસાદે રમઝટ બોલાવી. જેમાં સૌથી વધુ ખેડાના માતરમાં 3.25 ઈંચ વરસાદ વરસ્યો. તો નડિયાદ અને વસોમાં 3-3 ઈંચ વરસાદ, પોશિના અને કપરાડામાં 2.75 ઈંચ વરસાદ, મહેમદાવાદ અને ખેડામાં 2.25 ઈંચ વરસાદ, હાલોલ, વિજયનગર અને કડાણામાં 2-2 ઈંચ વરસાદ જ્યારે મહુધા, ઈડર, ગોધરા, ખેડબ્રહ્મામાં અને ધરમપુરમાં 2-2 ઈંચ વરસાદ ખાબક્યો છે.
