પત્તા કપાતા રોષ / ગુજરાતમાં ભાજપને 'પોતાના જ નડશે'! મામાએ કહ્યું એક વોટથી જીતીશ તોય હું સિકંદર! કુલ ત્રણ નેતા કરશે નવા જૂની

• વડોદરા જિલ્લાની ત્રણ બેઠક પર ભાજપમાં બળવાના એંધાણ 
• વાઘોડિયા અને પાદરા બાદ કરજણ બેઠક પર બળવાની સ્થિતિ 
• સતીશ નિશાળિયા, દિનેશ પટેલ અને મધુ શ્રીવાસ્તવ નારાજ 

ગુજરાત વિધાનસભાની ચૂંટણી માટે ભાજપ દ્વારા ગતરોજ ઉમેદવારોની પ્રથમ યાદી જાહેર કરવામાં આવી છે. ભાજપ દ્વારા એક સાથે 160 ઉમેદવારોના નામ જાહેર કરવામાં આવ્યા છે. જેમાં કુલ 38 સીટિંગ ધારાસભ્યોના પત્તા કપાયા છે. વડોદરા શહેર-જિલ્લાની 10 બેઠકોમાં એક મંત્રી સહિત ત્રણ ધારાસભ્યોના પત્તા કપાયા છે. જે ધારાસભ્યોના પત્તા કપાયા છે, તેવા ધારાસભ્યોમાં અને તેમના સમર્થકોમાં નિરાશા જોવા મળી છે. યાદી જાહેર થયા બાદ વડોદરા જિલ્લાની ત્રણ બેઠક પર ભાજપમાં બળવાના એંધાણ વર્તાય રહ્યા છે. વડોદરાની વાઘોડિયા, પાદરા અને કરજણ બેઠક પર બળવાની સ્થિતિ દેખાઈ રહ્યા છે. 

વાઘોડિયા બેઠક પર મધુ શ્રીવાસ્તવની જગ્યાએ અશ્વિન પટેલને ટિકિટ
ભાજપ દ્વારા વડોદરાની વાઘોડિયા સીટ પરથી દબંગ ધારાસભ્ય મધુ શ્રીવાસ્તવની શરણાગતિ નહિ માની તેની સામે જિલ્લા પ્રમુખને ટિકિટ આપવામાં આવતા સમગ્ર મામલો દિવસભર ટોક ઓફ ધ ટાઉન બન્યા હતો. ત્યારે મધુ શ્રીવાસ્તવ અપક્ષ ઉમેદવારી નોંધાવશે કે નહિ તે બાબતે તેઓએ કાર્યકરો જેમ કહેશે તેમ કરીશ તેવું કહ્યું હતું. ત્યારે મોડી સાંજે મધુ શ્રીવાસ્તવ દ્વારા અપક્ષ ઉમેદવારી નોંધાવવાની જાહેરાત કરતા સમગ્ર મામલો હવે ચર્ચાનો વિષય બનવા પામ્યો છે.

વાઘોડિયા બેઠક પર અપક્ષ ઉમેદવારી નોંધાવશે મધુ શ્રીવાસ્તવ 
વડોદરામાં દબંગ ધારાસભ્યની છાપ ધરાવતા વાઘોડિયા મધુ શ્રીવાસ્તવ જેઓ અવાર નવાર તેઓની વિવાદિત નિવેદનોને લઈને ચર્ચામાં આવતા હોય છે. જેઓને ટિકિટ ન આપી ભાજપ દ્વારા જિલ્લા પ્રમુખ અશ્વિન પટેલને ટિકિટ આપતા મામલો ગરમાયો હતો. ત્યારે સાંજના સુમારે મહાદેવ તળાવ નજીક આવેલ મધુ શ્રીવાસ્તવની ઓફીસે બેઠક મળી હતી. જે બેઠકમાં નિર્ણય કરવામાં આવ્યો કે મધુ શ્રીવાસ્તવ અપક્ષ ઉમેદવારી નોંધાવશે. વધુમાં તેમણે જણાવ્યું હતું કે વર્ષોથી પાર્ટીએ કામ કર્યું પણ પાર્ટી એ મારી કદર ના કરી. આ નિર્ણય કાર્યકર્તાઓ સાથેની મીટીંગ બાદ લીધો છે. ત્યારે તેમણે પક્ષને ફેર વિચારણા કરવા કહ્યું છે.

કરજણ બેઠક પર બળવાની સ્થિતિ
 ભાજપમાં કરજણ બેઠક પર બળવાની સ્થિતિ જોવા મળી રહી છે. ભાજપે ટિકિટ ન આપતાં પૂર્વ MLA સતીશ નિશાળિયા નારાજ થયા છે. અક્ષય પટેલને ભાજપે ટિકિટ આપતાં સતીશ નિશાળિયા નારાજ થયા છે. પોતાનાં કાર્યાલયમાંથી સતીશ નિશાળિયાએ ભાજપનાં બેનર પણ હટાવી દીધા છે. તદુપરાંત સતીશ નિશાળિયાએ અમદાવાદમાં કોંગ્રેસ નેતાઓ સાથે બેઠક કર્યાની પણ ચર્ચા ચાલી રહી છે. એટલે કે કહી શકાય કે સતીશ નિશાળિયા કોંગ્રેસની ટિકિટ પર કરજણ બેઠક પરથી ચૂંટણી લડી શકે છે. સતીશ નિશાળિયાનાં ચૂંટણી લડવાથી અક્ષય પટેલની મુશ્કેલી પણ વધી શકે.

પાદરા ભાજપમાં ભડકો
ભાજપ દ્વારા ઉમેદવારોની યાદી જાહેર કરાયા બાદ વડોદરા જિલ્લાની પાદરા વિધાનસભા બેઠકના પૂર્વ ધારાસભ્ય દિનેશ પટેલ (દિનુ મામા) નારાજ થયા છે. પાદરાની બેઠક ઉપર પ્રબળ દાવેદાર મનાતા ભાજપના પૂર્વ ધારાસભ્ય અને બરોડા ડેરીના વર્તમાન ચેરમેન દિનેશ પટેલના બદલે ભાજપે પાદરા નગરપાલિકાના પ્રમુખ વિજયસિંહ ઝાલાને ટિકિટ આપતા ભડકો થયો છે. દીનુ પટેલે અપક્ષ ચૂંટણી લડવાની જાહેરાત કરી છે. તેઓએ મીડિયાને જણાવ્યું હતું કે, હું આગામી 17 નવેમ્બરના રોજ ઉમેદવારીપત્ર ભરીશ અને હું પાદરા બેઠક ઉપર જંગી મતથી જીત મેળવીશ.

અગાઉ પણ અપક્ષ ચૂંટણી લડી ચૂક્યા છે દિનેશ પટેલ
અત્રે ઉલ્લેખીય છે કે, વર્ષ 2007માં પાદરા બેઠક પરથી દિનેશ પટેલ અપક્ષ તરીકે ચૂંટણી લડ્યા હતા અને જેમાં તેમનો વિજય થયો હતો. ત્યારબાદ તેઓએ ભાજપનો ખેસ ધારણ કરી લીધો હતો. ભાજપમાં ગયા બાદ 2012માં ભાજપે તેઓને ટિકિટ આપી હતી અને તેમાં પણ તેઓ વિજયી બન્યા હતા. જોકે, ગત વિધાનસભાની ચૂંટણીમાં તેમનો પરાજય થયો હતો. તેમને કોંગ્રેસના ઉમેદવાર જસપાલસિંહ ઠાકોર (પઢીયાર)એ હરાવ્યા હતા.