ન્યાયિક / સરકારી કર્મચારીઓને 3 મહિનાથી વધારે સસ્પેન્ડ ન રાખી શકાય- અલ્હાબાદ હાઈકોર્ટનો મોટો ચુકાદો

• યુપીના કર્મચારીઓ પર અલ્હાબાદ હાઈકોર્ટનો મોટો ચુકાદો
• કોઈ પણ સરકારી કર્મચારીને 3 મહિનાથી વધારે બરખાસ્ત ન રાખી શકાય
• 3 મહિના બાદ તેમને નોકરીએ પાછા લેવા પડે છે
• પોલીસ ઇન્સ્પેક્ટર કેશવ વર્માની બરખાસ્તગી મામલે ચુકાદો

યુપીમાં પોલીસ ઈન્સ્પેક્ટર કેશવ વર્માની બરખાસ્તગી મામલે મોટો ચુકાદો આપતાં અલ્હાબાદ હાઈકોર્ટે એવું કહ્યું છે કે બરખાસ્તગીના 3 મહિના બાદ કોઈ કર્મચારીને સેવામાં પાછા લેવા પડે છે એટલે કે તેમને 3 મહિનાથી વધારે બરખાસ્ત ન રાખી શકાય. જસ્ટિસ નીરજ તિવારીએ પોલીસ ઇન્સ્પેક્ટર કેશવ વર્માએ દાખલ કરેલી અરજી પર આ આદેશ આપ્યો હતો. અરજદાર નિરીક્ષકને ઉત્તર પ્રદેશ ગૌણ શ્રેણીના પોલીસ અધિકારીઓ (સજા અને અપીલ નિયમો) 1991 ના નિયમ 17 (1) (એ) ની જોગવાઈઓ હેઠળ સસ્પેન્ડ કરવામાં આવ્યા હતા. અરજદાર ઇન્સ્પેક્ટર તરફથી હાજર રહેલા વરિષ્ઠ એડવોકેટ વિજય ગૌતમે દલીલ કરી હતી કે સસ્પેન્શન ઓર્ડર નિયમો અને કાયદાઓની વિરુદ્ધ છે. સસ્પેન્શન ઓર્ડર પસાર થયાને 3 મહિનાથી વધુ સમય વીતી ગયો છે, પરંતુ વિભાગે હજી સુધી અરજદારને કોઈ ખાતાકીય તપાસ ચાર્જશીટ આપી નથી. 

પોલીસ ઇન્સ્પેક્ટર કેશવ વર્માની બરખાસ્તગી મામલે ચુકાદો 
પ્રયાગરાજના હાંદિયા પોલીસ સ્ટેશનમાં તૈનાત પોલીસ ઇન્સ્પેક્ટર કેશવ વર્માને આ વર્ષે 11 એપ્રિલે સસ્પેન્ડ કરવામાં આવ્યા હતા. 3 મહિના પછી પણ તેમને કોઈ ખાતાકીય ચાર્જશીટ આપવામાં આવી ન હતી કે તેમને સેવામાં પાછા લેવામાં આવ્યાં નહોતા. પોતાની બરખાસ્તગી રદ કરાવવાને લઈને કેશવ વર્મા હાઈકોર્ટ પહોંચ્યાં હતા. કોર્ટે અરજી પર સુનાવણી કરતા વર્માના સસ્પેન્શન પર રોક લગાવતા પ્રયાગરાજ એસએસપી પાસે 4 અઠવાડિયામાં જવાબ માંગ્યો છે.

પોલીસ ઈન્સ્પેક્ટરે અપહરણ થયેલી મહિલાને છોડાવવા કંઈ કર્યું નહોતું 
અરજદાર પોલીસ ઈન્સપેક્ટર ફતેહપુરના કલ્યાણપુરમાં પોલીસ ઇન્સ્પેક્ટર તરીકે તૈનાત હતા, ત્યારે તેમણે મહિલા અપહરણ કેસના આરોપીની આરોપીની ધરપકડ કરી હતી. જોકે, તેમણે અપહૃત મહિલાને શોધી કાઢવા માટે કંઈ કર્યું નહોતું. હાઈકોર્ટે પણ મહિલાના અપહરણ પર ગંભીર ચિંતા વ્યક્ત કરીને તેને તાત્કાલિક છોડાવવાનો આદેશ આપ્યો હતો. કોર્ટે આ કેસમાં કેશવ વર્માને સમન્સ પણ પાઠવ્યું હતું. આ કારણે અરજદારને સસ્પેન્ડ કરવામાં આવ્યા હતા.