કાર્યવાહી / ગુજરાતીઓને સસ્તામાં ફોરેન ટૂરના નામે ચાર કરોડનો ચૂનો! પોલીસે 100 લોકોની તો પૂછપરછ કરી

• અમદાવાદના કેસી હોલીડેના સંચાલકની ધરપકડ
• દુબઈ ટૂરના નામે લોકો સાથે કરી હતી છેતરપિંડી
• કિરણ ચૌહાણે 250 જેટલા લોકો સાથે કરી હતી ઠગાઈ
• કોર્ટે આરોપીના 5 દિવસના રિમાન્ડ મંજૂર કર્યા

અમદાવાદના કેસી હોલીડેના કિરણ ચૌહાણની સેટેલાઈટ પોલીસે કરોડોની ઠગાઈ મામલે ધરપકડ કરી પાંચ દિવસના રિમાન્ડ મેળવ્યા છે. કિરણ ચૌહાણ અને સહ આરોપી મિહિર શાહે ભેગા મળી દુબઈ, સિંગાપુર સહિતની હોલીડે ટૂર ઓછા ભાવની આપી લોકો સાથે છેતરપિંડી આચરી હતી. જેમાં 250 જેટલા લોકો સાથે આશરે 4 કરોડથી વધુની છેતરપિંડી કરી હોવાનું પોલીસ માની રહી છે સાથે જ સેટેલાઈટ પોલીસે અત્યાર સુધીમાં 100થી વધુ લોકોના નિવેદનો નોંધ્યા છે. જેમાં અલગ-અલગ ટૂરના નામે કરોડો રૂપિયા પડાવ્યા હતા સાથે જ ટૂરમાં ગયેલા લોકોને અપૂરતી સુવિધાઓ આપવામાં આવી હોવાનું સામે આવ્યું છે.

પોલીસે નોંધ્યા 100 લોકોના નિવેદનો
આ અંગે સેટેલાઈટ પોલીસ સ્ટેશનના પી.આઈ કે.વાય વ્યાસે જણાવ્યું કે, કેસી હોલીડે ટૂર એન્ડ કંપનીના માલિક અને તેના મળતિયાઓ દ્વારા સસ્તામાં વિદેશની ટૂર બહાર પાડી લોકોને લાલચ આપી બુકિંગના પૈસા લઈને છેતરપિંડી આચરવામાં આવી હતી. લોકોને જે દિવસે ટૂર પર જવાનું હોય એ દિવસે ટિકિટ ન આપીને અને ટૂરમાં ગયેલા લોકોને અપૂરતી સુવિધાઓ આપી છેતરપિંડી આચરવામાં આવી હતી. જે અંગે ગુનો નોંધવામાં આવ્યો હતો. આશરે 250 જેટલા લોકો ભોગ બન્યા હોવાનું પ્રાથમિક દ્રષ્ટીએ દેખાઈ રહ્યું છે. જે પૈકીના 100 લોકોના નિવેદનો નોંધવામાં આવ્યા છે. જેમાં ટોટલ 4 કરોડથી વધારેની છેતરપિંડી થઈ હોવાનું પ્રાથમિક દ્રષ્ટીએ જણાઈ આવે છે. 

કોર્ટે આરોપીના 5 દિવસના રિમાન્ડ મંજૂર કર્યા
સેટેલાઈટ પોલીસ સ્ટેશનના પી.આઈસ જણાવ્યું કે,  કેસી હોલીડેના માલિક કિરણ ચૌહાણની ધરપકડ કરી કોર્ટમાં રજૂ કરી તેના રિમાન્ડ મેળવવામાં આવ્યા છે. તેની પાંચ દિવસની કસ્ટડી મેળવવામાં આવી છે. ઝડપાયેલા આરોપી કિરણ ચૌહાણની પૂછપરછ કરતા અને ભોગ બનનારના નિવેદનમાં એ વાત સામે આવી કે આરોપીઓએ કેટલાક લોકોના પાસપોર્ટ પણ પોતાની પાસે રાખ્યા હતા. જે પાસપોર્ટ ક્યાં છે અને કોની પાસે છે સાથે જ તે પાસપોર્ટનો કોઈ દુર ઉપયોગ થયો છે કે કેમ તે અંગે પોલીસ દ્વારા તપાસ હાથ ધરવામાં આવી છે. આ આરોપી વિરુદ્ધ કૃષ્ણનગરમાં પણ ફરિયાદ નોંધાઇ હતી

મહત્વનું છે કે, આ ગુનામાં અન્ય આરોપી મિહિર શાહની આગોતરા જામીન અરજી પર સુનાવણી ચાલુ છે, માટે તેની ધરપકડ થયા બાદ આ છેતરપિંડી અંગે ઘણી નવી હકીકત સામે આવી શકે છે.