પગલા / રાજસ્થાન હોસ્પિટલ આગ દુર્ઘટનાના પડઘા: રાજ્યની તમામ હોસ્પિટલોમાં ચેકિંગ હાથ ધરી અપાશે આ મહત્વનો આદેશ

• અમદાવાદની રાજસ્થાન હોસ્પિટલમાં આગ કેસ
• રાજ્યની તમામ હોસ્પિટલમાં હાથ ધરાશે ચેકિંગ
• આરોગ્ય વિભાગ રાજ્યની તમામ હોસ્પિટલમાં થશે ચેકિંગ

અમદાવાદની રાજસ્થાન હોસ્પિટલમાં આગની ઘટનાને લઈને તંત્ર સફાળું જાગ્યું છે. અમદાવાદની આ આગ સમગ્ર રાજ્યમાં ચર્ચાનો મુદ્દો બની છે. જેને લઈને હવે સબંધિત વિભાગ દ્વારા રાજ્યની તમામ હોસ્પિટલમાં ચેકિંગ હાથ ધરવામાં આવશે. આરોગ્ય વિભાગ દ્વારા રાજ્યની તમામ હોસ્પિટલમાં ચેકિંગ હાથ ધરવામાં આવશે અને ચેકીંગ દરમિયાન જો કોઈ તૃટી સામે આવશે. તો જરૂરી પગલાં લેવામાં આવશે.

હોસ્પિટલમાંથી બિનજરૂરી વસ્તુઓ દૂર કરવા સૂચના આપવામાં આવશે
વધુમાં રાજસ્થાન હોસ્પિટલમાં બેઝમેન્ટમાં ભંગાર મુક્યો હોવાથી આગ લાગી હોય તેવી પ્રાથમિક માહિતી મળી હતી. જેને લઈને આ ચેકીંગ દરમિયાન રાજ્યની હોસ્પિટલમાંથી બિનજરૂરી વસ્તુઓ દૂર કરવા સહિતની સૂચનાઓ પણ આપવામાં આવશે. નોંધનીય છે કે રાજસ્થાન હોસ્પિટલમાં ગત રવિવારે આગ ભભૂકી ઊઠ્યાં બાદ તંત્રને ચેકીંગનું જ્ઞાન લાધ્યું છે. બીજી બાજુ એ તો સ્વીકારવું જ રહ્યું કે આરોગ્ય હોય કે કોઈ પણ વિભાગ હોય તેમાં દુર્ઘટના કે અઘટિત ઘટના બાદ જ તંત્રને કામગીરીનું શૂરાતન ચડે છે. ભૂતકાળમાં પણ આવા બનાવો બાદ જ કાર્યવાહી કરાઇ છે. આથી દુર્ઘટના બાદ પગલાં લેવાએ જાણે તંત્રની તાસીર બની ગઈ હોય તેવો ઘાટ સર્જાયો છે.

અમદાવાદની રાજસ્થાન હોસ્પિટલમાં આગ અકસ્માત: રાજ્યની તમામ હોસ્પિટલોમાં ચેકિંગ હાથ ધરાશે, આરોગ્ય વિભાગ રાજ્યની તમામ હોસ્પિટલમાં થશે ચેકિંગ, હોસ્પિટલમાંથી બિનજરૂરી વસ્તુઓ દૂર કરવા સૂચના આપવામાં આવશે#Gujarat #ahmedabad #rajasthanhospital #fire #vtvgujarati pic.twitter.com/zvgJj8Jw1I

— VTV Gujarati News and Beyond (@VtvGujarati) July 31, 2023

રાજસ્થાન હોસ્પિટલમાં રવિવારે લાગી હતી આગ

મહત્વનું છે કે ગઈકાલે (તા. 30 જુલાઈ) ના રોજ સવારે અમદાવાદની રાજસ્થાન હોસ્પિટલમાં ભીષણ આગ લાગતા અફરાતફરી મચી હતી. અંગેની જાણ થતાની સાથે જ ફાયર વિભાગની 29 ગાડીઓ ઘટના સ્થળે પહોંચી ગઈ હતી જ્યાં અમદાવાદ પૂર્વના ટ્રાફિક DCP સફિન હસન સહિતના તમામ અધિકારીઓ પણ ઘટનાસ્થળે પહોંચી ગયા હતા. શહેરના શાહીબાગ વિસ્તારમાં આવેલી રાજસ્થાન હોસ્પિટલના બેઝમેન્ટમાં ભીષણ આગ  હોસ્પિટલમાં આગ લાગ્યા બાદ ઘટનાની જાણ ફાયરને થતા 29 જેટલી ગાડીઓ ઘટનાસ્થળે દોડી આવી છે. હોસ્પિટલમાં દાખલ 60 જેટલા દર્દીઓને 10થી વધુ એમ્બ્યુલન્સ દ્વારા અન્ય હોસ્પિટલમાં ખસેડવામાં આવ્યા હતા.

બીજી બાજુ બેઝમેન્ટમાં પાર્ક કરેલા વાહનો બળીને ખાખ થઈ ગયા હતા. આગને કાબૂમાં લેવા માટે રોબોટની મદદ લેવામાં આવી હતી. રાજસ્થાન હોસ્પિટલ બહારનો રોડ બંધ કરવામાં આવ્યો હતો. બેઝમેન્ટમાં ભંગાર મુક્યો હોવાથી આગ લાગી હોય તેવી પ્રાથમિક માહિતી મળી રહી છે.