વાતાવરણમાં પલટો / લાંબા વિરામ બાદ અમદાવાદમાં વરસાદનું આગમન: જાણો આગામી ચાર દિવસની શું છે આગાહી

• અમદાવાદમાં લાંબા વિરામ બાદ વરસાદ
• વસ્ત્રાપુર, SG હાઈવે પર વરસાદ પડ્યો
• શહેરના અનેક વિસ્તારોમાં ધીમીધારે વરસાદ

ગુજરાતના કેટલાક વિસ્તારોમાં સામાન્ય વરસાદ પડવાની હવામાન વિભાગની આગાહી વચ્ચે આજે સવારે 11 વાગ્યા પછી અમદાવાદમાં એકાએક વાતાવરણમાં પલટો આવ્યો હતો. શહેરમાં વાદળછાયા વાતાવરણની વચ્ચે વરસાદ પડ્યો હતો. શહેરમાં લાંબા વિરામ બાદ ફરી વરસાદ પડતા શહેરના રસ્તાઓ પાણી-પાણી થઈ ગયા છે. તો લાંબા સમય પછી શહેરમાં વરસાદ પડતા વાતાવરણમાં ઠંડક પ્રસરી છે. 

આ વિસ્તારોમાં ખાબક્યો વરસાદ 
આજે સવારે 11 વાગ્યા પછી અમદાવાદ શહેરના વાતાવરણમાં અચાનક પલટો આવ્યો હતો. જે બાદ શહેરમાં ધીમીધારે વરસાદ શરૂ થયો હતો. અમદાવાદના સેટેલાઈટ, બોડકદેવ, વસ્ત્રાપુર, SG હાઈવે સહિતના વિસ્તારમાં વરસાદ પડતા રસ્તાઓ ભીના થઈ ગયા હતા. જોકે, શહેરમાં થોડીવારમાં વરસાદ બંધ પણ થઈ ગયો હતો. 

4 દિવસ વરસાદની હવામાન વિભાગની આગાહી
આપને જણાવી દઈએ કે, હવામાન વિભાગ દ્વારા આગામી 4 દિવસ હળવા વરસાદની આગાહી કરવામાં આવી છે. હવામાન વિભાગના ડાયરેક્ટર મનોરમા મોહંતીના જણાવ્યા અનુસાર હાલની સ્થિતિએ માત્ર રાજસ્થાન તરફ એક સિસ્ટમ સક્રિય છે. આ સર્ક્યુલેશનના કારણે સામાન્ય વરસાદ પડી શકે છે. જ્યારે ગુજરાતમાં અન્ય કોઈ સિસ્ટમ સક્રિય ન હોવાથી રાજ્યમાં એકથી બે સ્થળે જ ભારે વરસાદી ઝાપટું પડી શકે છે. ઉપરાંત અન્ય વિસ્તારોમાં સામાન્ય વરસાદની જ સંભાવના જોવા મળી રહી છે.

અંબાલાલ પટેલે પણ કરી છે આગાહી
બીજી તરફ વરસાદની આગાહી કરતા અંબાલાલ પટેલે કહ્યું છે કે, આગામી 15 ઓગસ્ટ સુધી રાજ્યનાં જુદા જુદા ભાગોમાં હળવો વરસાદ પડવાની સંભાવના છે. તો જન્માષ્ટમી દરમિયાન પણ રાજ્યના કેટલાક ભાગોમાં ઝાપટા પડવાની શક્યતા છે. શ્રાવણ અમાસથી ભાદરવા મહિના સુધી વરસાદ રહેશે. સાથે જ તેમણે કહ્યું છે કે 15 ઓગસ્ટથી દેશના હવામાનમાં પલટો આવવાની સંભાવના છે. 

'ફરી વરસાદી સિસ્ટમ સક્રિય થાય તેવી સંભાવના'
તેઓએ જણાવ્યું છે કે, ગુજરાતમાં 20 ઓગસ્ટથી સપ્ટેમ્બરની શરૂઆત સુધી સારો વરસાદ પડી શકે છે. પવનની ગતિ ધીમી થયા બાદ ફરી વરસાદી સિસ્ટમ સક્રિય થાય તેવી શક્યતા છે. તેઓએ જણાવ્યું છે કે, ખેડૂતો માટે હાલ ઉઘાડ છે, હાલ વરસાદી ઝાપટાં પડશે. પવન ઓછો થયા બાદ વરસાદ માટે સિસ્ટમ બનશે. આપને જણાવી દઈએ કે, અન્ય કેટલાક હવામાન નિષ્ણાંતોએ વરસાદના ચોથા રાઉન્ડ દરમિયાન તા.19થી 21 ઓગસ્ટ વચ્ચે ભારે વરસાદ પડવાની આગાહી કરી છે.