કાર્યવાહી થશે? / શાળાઓ શરૂ થતાં જ સંચાલકોએ ખિસ્સા ભારે કરવાના ચાલુ કર્યા, રાજકોટની 3 સ્કૂલની ફીમાં વધારો, FRC નેવે

• રાજકોટની 3 સ્કૂલની ફીમાં વધારો
• સેન્ટમેરી,SNK અને નિર્મલા સ્કૂલે ફીમાં કર્યો વધારો
• સ્કૂલોએ FRCની મંજૂરી વિના 30% સુધી ફી વધારી

રાજ્યની કોઈપણ શાળાએ ફીમાં વધારો કરવો હોય તો FRCની મંજૂરી લેવાની હોય છે.. પરંતુ રાજકોટની સેન્ટમેરી, SNK અને નિર્મલા સ્કૂલે તો કોઈપણ પ્રકારની મંજૂરી વગર જ ફીમાં 30 ટકા જેટલો ધરખમ વધારો કરી દીધો છે. જેને લઈને વાલીઓમાં રોષ ફેલાયો છે.અચાનક સ્કૂલો દ્વારા ફી વધારો કરવામાં આવતા મોટી સંખ્યામાં વાલીઓ અને એનએસયુઆઈ કાર્યકરો દ્વારા FRCની ઓફિસ સામે જ વિરોધ નોંધાવવામાં આવ્યો હતો. 

સૌરાષ્ટ્ર ઝોનની 5 હજાર 500માંથી 250 સ્કૂલોએ ફી વધારો માંગ્યોઃ FRCના સભ્ય અજય પટેલ
સ્કૂલોમાં ફી વધારા અંગે FRCના સભ્ય અજય પટેલે જણાવ્યું હતું કે, અનેક શાળાઓની ફી વધારાની દરખાસ્ત આવી છે.  "સૌરાષ્ટ્ર ઝોનની 5 હજાર 500માંથી 250 સ્કૂલોએ ફી વધારો માંગ્યો છે. તેમજ રાજકોટમાં 4 થી 5 શાળાઓએ ફી માં વધારો કર્યો છે.  ફીમાં વધારો અપાયો નથી છતાં કેટલીક શાળાઓએ ફી વધારો કર્યો છે. ફીમાં વધારો કરનારી સ્કૂલોએ વિદ્યર્થીઓને ફી પરત કરવી પડશે.  ફી વધારા મામલે અલગ બાબતોની તપાસ કરવામાં આવશે. 

હાલ તો FRCનું એવું કહેવું છે કે, સ્કૂલોએ ફી વધારી હશે તો તે પરત કરવી પડશે. તેવામાં જોવાનું એ રહેશે કે, મનમાની પર ઉતરી આવેલી આ સ્કૂલો સામે આગામી કોઈ કાર્યવાહી થાય છે કે, નહીં..