ગજબ / ચિતા પર સુઈને ફોટો પડાવ્યો, હત્યારોપીએ રચી પોતાના 'મોતની પટકથા', બકરો સુવડાવીને કર્યાં અંતિમ સંસ્કાર

યુપીના ગાઝીપુરમાં એક હેરાનીભર્યો બનાવ સામે આવ્યો છે. હત્યાના આરોપીએ સજાથી બચવા માટે પોતાનું મોતનું નાટક રચ્યું હતું અને આ માટે તેણે પોતાની અંતિમયાત્રા કાઢી, અને સ્મશાનભૂમિ પર ચિતાનો ફોટો પડાવ્યો હતો પરંતુ જ્યારે અગ્નિદાહ આપવાનો સમય આવ્યો ત્યારે તે ઉઠી ગયો અને તેને બદલે એક બકરાને સુવડાવી દીધો અને તેને બાળી નાખ્યો અને દેખાવ એવો કર્યો કે પોતાના અંતિમ સંસ્કાર થઈ ગયા છે પરંતુ તેની આ નાટકલીલા ન ચાલી અને આખરે પોલીસે તેને જીવતો ઝડપી પાડ્યો હતો.

પોલીસે કરી 'મરેલા' આરોપીની ધરપકડ

પોલીસે રવિવારે હત્યાના કેસમાં સુનાવણી દરમિયાન મૃત હોવાનો ડોળ કરીને ફરાર થઈ ગયેલા આરોપી રાજુ ઉર્ફે રાજકુમાર રાજભર (38)ની ધરપકડ કરી હતી. કોતવાલી નગર પોલીસ, સ્પેશિયલ ઓપરેશન ગ્રુપ (SOG) અને સર્વેલન્સ ટીમે તેને ખ્વાજા જહાંપુર વિસ્તારમાંથી પકડી પાડ્યો હતો. પૂછપરછ બાદ, તેની સામે FIR દાખલ કરવામાં આવી હતી, અને કોર્ટમાં રજૂ કર્યા બાદ, તેને ન્યાયિક કસ્ટડીમાં જેલમાં મોકલી દેવામાં આવ્યો હતો.

સ્મશાનગૃહમાં સજાવી નકલી ચિતા

હત્યા કેસમાં સજા ટાળવા માટે, આરોપીએ સરકારી રેકોર્ડમાં પોતાને મૃત જાહેર કરવાનો પ્રયાસ કર્યો. આ માટે, 30 મે, 2025 ના રોજ ગાઝીપુર જિલ્લાના એક સ્મશાનગૃહમાં એક ચિતા તૈયાર કરવામાં આવી હતી. પરિવારના સભ્યો હાજર હતા, અને એવું બહાર આવ્યું છે કે આરોપીનો ચિતા પર પડેલો ફોટો પાડવામાં આવ્યો હતો. મૃત્યુ પ્રમાણપત્ર જારી થતાં જ હત્યાનો કેસ બંધ કરી દેવામાં આવ્યો હતો પરંતુ આખરે આ કેસ ફરી ખુલ્યો અને પોલીસે તેને જીવતો પકડી લીધો હતો.

આ પણ વાંચોઃ અરુણાચલમાં સિયાંગ ડેમ પર ભારે બબાલ, કેન્દ્ર સરકાર RAFના 250 જવાનો રાજ્યમાં મોકલશે

2016 માં કરી હતી હત્યા

અધિક પોલીસ અધિક્ષક અનૂપ કુમારે જણાવ્યું હતું કે ખ્વાજા જહાંપુરના રહેવાસી રાજુ ઉર્ફે રાજકુમાર રાજભર અને તેનો મિત્ર સુદર્શન રાજભર એક હત્યાના કેસમાં આરોપી છે. સુદર્શન ગાઝીપુર જિલ્લાના દુલ્લાહપુર પોલીસ સ્ટેશન વિસ્તારના લાલ ભીતાર મોહલ્લાનો રહેવાસી છે. બંને સામે કોર્ટમાં કેસ ચાલી રહ્યો છે. પોલીસના જણાવ્યા અનુસાર, યોગેશ સિંહની ૧૯ ડિસેમ્બર, ૨૦૧૬ ના રોજ કોતવાલી વિસ્તારમાં મુનશીપુરા રેલ્વે લાઇન નજીક ગોળી મારીને હત્યા કરવામાં આવી હતી. યોગેશ સિંહ દોહરીઘાટ પોલીસ સ્ટેશન વિસ્તારના નાગરીપર ગામના રહેવાસી હતા. તેમના ભત્રીજા અવિનાશ સિંહની ફરિયાદના આધારે પોલીસે રાજુ અને સુદર્શન વિરુદ્ધ એફઆઈઆર નોંધી હતી. તપાસ બાદ, કોર્ટમાં ચાર્જશીટ દાખલ કરવામાં આવી હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ