- રૂપિયા 80 લાખની વીમા પોલિસી પકાવવા ભિક્ષુકની હત્યા
- આરોપીએ પોતાના નામે લીધેલી પોલિસી પકાવવા 2006માં ભિક્ષુકની હત્યા કર્યાનો ખુલાસો
- આરોપી અનિલસિંઘ ઉર્ફે રાજકુમારે પોતાના મૃત્યુનું નાટક રચી લીધા વીમાના પૈસા
80 લાખ રૂપિયાની પોલિસી પકવવા આરોપીએ ભિક્ષુકની હત્યા કરી હોવાના કેસનો પર્દાફાશ થયો છે. અમદાવાદ ક્રાઈમ બ્રાન્ચે આરોપી અનિલસિંઘ વિજયપાલસિંઘ ચૌધરીને દબોચી લીધો છે. જેની તપાસમાં ચોંકાવનારા ઘટસ્ફોટ થયા છે. વર્ષ 2006 થી આરોપી અમદાવાદમાં રાજકુમાર વિજયકુમાર ચૌધરીના નામે મનમોહનનગર નિકોલ ખાતે રહેતો હતો. પોલીસ ઝપટે ચડેલ આ આરોપી પાસેથી રાજકુમારના નામના તમામ ડોક્યુમેન્ટ પણ મળી આવ્યા છે. જેની તપાસ કરતા તે તમામ દસ્તાવેજ ખોટા બનાવવામાં આવ્યા હોવાનું ખુલ્યું છે.
અમદાવાદમાં નકલી પુરાવા બનાવીને જીવન જીવી રહ્યો હતો આરોપી
વધુમાં અમદાવાદ ક્રાઈમ બ્રાન્ચે ગુનો નોધી તપાસ કરતા 17 વર્ષ પહેલા આગ્રામાં થયેલી હત્યાનો ભેદ ઉકેલાયો છે. જોકે આગ્રા પોલીસ તે બનાવને માત્ર એક અકસ્માત સમજી તપાસ કરતી હતી. પરંતુ ક્રાઈમ બ્રાન્ચે તે હત્યાના ખતરનાક ગુનાનો ભેદ ઉકેલ્યો અને 80 લાખનો વીમો પકવવા માટે એક ભિક્ષુકની હત્યા કરાઈ હોવાનો ખુલાસો કર્યો અને આરોપીની ધરપકડ કરી છે.
ઝડપાયેલ આરોપી અનિલસિંઘ ઉર્ફે રાજકુમારની બોગસ દસ્તાવેજોના ગુનામાં ધરપકડ કરી પૂછપરછ કરતા હકીકત સામે આવી કે અનિલસિંઘ તેના પિતા વિજયપાલસિંઘ તેનો ભાઈ અને તેના મિત્રએ મળી વર્ષ 2004 માં હત્યાનું કાવતરું રચ્યું હતું. જે કાવતરાના ભાગરૂપે 2004 માં અનિલના નામે LIC ની જીવન મિત્ર નામની 20 લાખની પોલિસી લેવામાં આવી હતી, જે પોલીસીમાં જો પોલિસી ધારકનું અકસ્માતે મૃત્યુ થાય તો ચાર ગણા એટલે કે 80 લાખ રૂપિયા મળવાના હતા. જેથી વર્ષ 2006 ના જાન્યુઆરી મહિનામાં અનિલના પિતા વિજય પાલે અનિલના નામે એક સેન્ટરો ગાડી લીધી અને તેનો પણ વીમો ઉતરાવ્યો હતો.
80 લાખ રૂપિયાની પોલીસી પણ પકવી લીધી
બાદમાં 31 જુલાઈ 2006 ના રોજ અનિલે ઘનકોરથી ગાઝિયાબાદ જતી ટ્રેનમાં ભિક્ષુકવૃત્તિ કરતા યુવકને જમાડવાના બહાને પોતાની સાથે લઈ ગયો, અને બેભાન કરી પોતાની ગાડીનો અકસ્માત સર્જી તેને આગ લગાવી દીધી હતી. જોકે તે ગાડીમાં મૃતક અનિલ નહીં પરંતુ ભિક્ષુક હતો, તે વાત જાણતા હોવા છતાં અનિલના પરિવારે કે મૃતદેહ સ્વીકાર્યો હતો અને તેના અંતિમ સંસ્કાર પણ કર્યા હતા. પરિવાર તથા સમાજ માટે અનિલને મૃત જાહેર કરી તેને 80 લાખ રૂપિયાની પોલીસી પણ પકવી લીધી હતી.
31 જુલાઈ 2006 માં થયેલી હત્યાની માહિતી આગ્રા પોલીસને આપી
બાદમા તે 17 વર્ષથી અમદાવાદમાં આવી રાજકુમારના નામે રહેવા લાગ્યો હતો. જોકે હત્યારાની ક્રાઈમ બ્રાન્ચને માહિતી મળી અને તપાસ કરતા આગ્રામાં થયેલા ભિક્ષુકની હત્યાનો ભેદ ઉકેલાયો છે. હવે આ બનાવટી દસ્તાવેજો ક્યાં બનાવ્યા કોની પાસે બનાવ્યા તેની તપાસ કરી રહી છે. સાથે જ 31 જુલાઈ 2006 માં થયેલી હત્યાની માહિતી આગ્રા પોલીસને આપતા પોલીસે અકસ્માતના ગુનામાં હત્યાની કલમો ઉમેરી અનિલસિંઘ તેના પિતા વિજયપાલસિંઘ સહિત ગુનામાં સંડોવાયેલા અન્ય આરોપીઓની શોધખોળ અને ધરપકડની કાર્યવાહી શરૂ કરી છે.
પત્ની અને બાળકોથી પણ આ વાત છુપાવી
ખાસ વાત તો એ છે કે આરોપી અનિલ ઉર્ફે રાજકુમાર એટલો ચાલાક હતો કે, હત્યાને અંજામ આપી ગણતરીના કલાકોમાં અમદાવાદ આવી ગયો અને અને છેલ્લા 17 વર્ષથી તેની પત્ની અને બાળકોથી પણ આ વાત છુપાવી હતી. સાથે જ જો તેના પરિવારના કોઈ વ્યક્તિને મળવું હોય તો દિલ્હી અથવા સુરત મળવા આવી જતો હતો.
