- સરનામું પૂછવાના બહાને યુવકને બેભાન કરી લૂંટ્યો
- દિલ્હી જઈને યુવકે નોંધાવી ફરિયાદ
- યુવકે ફરિયાદ નોંધાવતા પોલીસે બે ઠગની કરી ધરપકડ
અમદાવાદમાં દિલ્હીના યુવકને સરનામું પૂછવાના બહાને બે ઠગ ભાઈઓએ લૂંટી લીધો હોવાની ફરિયાદ નોંધાતા નારણપુરા પોલીસે ગણતરીની કલાકોમાં જ બંને ઠગ ભાઈઓને દબોચીને જેલના સળીયાની પાછળ ધકેલી દીધા છે.
દિલ્હીની કંપનીના માર્કેટિંગ મેનેજર સાથે લૂંટ
અમદાવાદ શહેરના નારણપુરા વિસ્તારમાં આવેલી એક હોટલમાં દિલ્હીની ઓબિટી ટેકસટાઇલ કંપનીના માર્કેટિંગ મેનેજર મુકેશભાઈ કુકરેતી એક મહિના પહેલા કામ માટે અમદાવાદ આવ્યા હતા અને હોટેલમાં રોકાયા હતા. અમદાવાદનું કામ પૂર્ણ કરી મુકેશભાઈ બીજે દિવસે વડોદરા જવા નીકળ્યા હતા. પોતાની હોટલથી મેટ્રો સ્ટેશન તરફ ચાલીને જઈ રહ્યા હતા, તે દરમિયાન નારણપુરા ઈન્કમટેકસ અંડરબ્રિજ પાસે એક કાર ચાલકે મુકેશભાઈ પાસે સરનામું પૂછવામાં બહાને પોતાની કાર ઊભી રાખી હતી.
યુવકને બેભાન કરીને ચલાવી લૂંટ
આ દરમિયાન કાર ચાલકની બાજુમાં બેઠેલા વ્યક્તિએ મુકેશભાઈનો હાથ પકડી કહ્યું હતું કે તમારા હાથમાં સરસ સુગંધ આવે છે તેમ કહેતા મુકેશભાઈએ પોતાનો હાથ સુંઘતા બેભાન થઈ ગયા હતા અને કાર ચાલકે મુકેશભાઈની સોનાની વિટી અને રોકડા 18000 લઇને નાસી છૂટ્યા હતા. મુકેશભાઈએ દિલ્હી પહોંચી ઓનલાઇન અરજી કરી હતી અને એક મહિના બાદ ફરિયાદ નોંધાવી હતી. પોલીસે ફરિયાદ બાદ ગણતરીના કલાકોમાં આરોપીની ધરપકડ કરી છે.
લૂંટ કરવાના ઈરાદે જ નીકળ્યા હતા બંને ભાઈઓઃ ACP
સમગ્ર મામલે બી ડિવિઝન પોલીસ સ્ટેશનના ACP એચ.એમ.કણસાગરાએ જણાવ્યું કે, પકડાયેલા આરોપી ગોવિંદ મદારી અને તેનો ભાઈ પ્રકાશ મદારીની પૂછપરછમાં સામે આવ્યું કે બંને ભાઈઓ કોઈ પણ વ્યક્તિ પાસેથી લૂંટ કરવાના ઇરાદે નીકળ્યા હતા. ગોવિંદ મદારીએ શરીર ઉપર ભભુત લગાડી હતી અને સાધુ બાવા જેવો વેશ ધારણ કર્યો હતો અને હાથમાં અતર જેવી સુગંધિત પ્રવાહી છાંટ્યું હતું કે જેનાથી સામેની વ્યક્તિ થોડી વાર માટે બેભાન થઈ જાય.
પોલીસે હાથ ધરી બંનેની પૂછપરછ
હાલતો પોલીસે મુકેશભાઈની ફરિયાદને આધારે બંને ભાઈઓની ધરપકડ કરી છે. પોલીસ તપાસમાં એ પણ સામે આવ્યું છે કે બંને ભાઈઓએ અગાઉ પણ બોડકદેવ વિસ્તારમાં કોઈ સાથે છેતરપિંડી કરી હોવાની ફરિયાદ નોંધાઈ ચૂકી છે. ત્યારે હવે પોલીસે વધુ તપાસ હાથ ધરી છે કે બંને ભાઈઓએ અન્ય કોઈ ગુનો આચર્યા છે કે નહીં તે મુદ્દે વધુ પૂછપરછ હાથ ધરવામાં આવી છે..
