ભાવમાં ભડકો / મોંઘવારીએ પ્રજાનું 'તેલ' કાઢ્યું: દિવાળી ટાંણે કપાસિયા-સિંગતેલના ડબ્બાની કિંમતમાં ધરખમ વધારો

• દિવાળી પહેલા જ ખાદ્યતેલના ભાવમાં ભડકો
• સિંગતેલના ડબ્બાના ભાવમાં રૂ.50નો વધારો
• કપાસિયા તેલના ભાવમાં રૂ.100નો વધારો  

રાજ્યમાં દિવાળી પહેલા જ ખાદ્યતેલના ભાવમાં તોતિંગ વધારો થયો છે. સિંગતેલના ડબ્બાના ભાવમાં 50 રૂપિયાનો અને કપાસિયા તેલના ડબ્બામાં રૂપિયા 100નો વધારો થયો છે. જે બાદ હવે સિંગતેલનો ભાવ 2950એ પહોંચી ગયા છે. જ્યારે કપાસિયા તેલના ડબ્બાનો ભાવ 2400એ પહોંચી ગયા છે. 

ખાદ્યતેલની માંગમાં વધારો થતાં ભાવમાં ધરખમ વધારો
તહેવારોની સિઝનમાં ખાદ્યતેલની માંગમાં વધારો થતાં ભાવમાં ધરખમ વધારો થયો છે. ફરી એકવાર સિંગતેલનો ડબ્બો 3000ને પાર પહોંચવાની સપાટી પર પહોંચી ગયો છે. સીગતેલનો નવો ભાવ રૂપિયા 2950 થયો છે. તો 100 રૂપિયાના વધારા બાદ કપાસિયા તેલનો નવો ભાવ 2400 થયો છે. 

તહેવારો આવતા બજારમાં વધી માંગઃ બિપીન મોહન
આ ભાવ વધારા પર ગુજરાત ખાદ્ય તેલ વેપારી મહામંડળના પ્રમુખ બિપીન મોહને જણાવ્યું કે, આ વખતે હવામાનને કારણે ઉત્પાદન ઓછું થયું છે. તો તહેવારો આવતા બજારમાં  ખાદ્ય તેલની માંગ ઘણી વધી છે. થોડા સમય પહેલા સિંગતેલના ડબ્બાનો ભાવ 3 હજારે પહોંચી ગયો હતો. પરંતુ તેમાં ઘટાડો થયો હતો. હાલ સિંગતેલના ભાવમાં રૂપિયા 50નો વધારો કરવામામ આવતા ભાવ 2950એ પહોંચ્યા છે. તો આગામી ટૂંકાગાળામાં ફરી રૂપિયા 50નો વધારો થઈ શકે છે. જે બાદ સિંગતેલના ભાવ ફરી 3 હજારે પહોચે તેવી શક્યતાઓ છે.

CNGના ભાવમાં પણ થઈ શકે છે વધારો
એવું પણ કહેવામાં આવી રહ્યું છે કે, દિલ્હી બાદ હવે ગુજરાતમાં પણ સીએનજીના ભાવમાં વધારો થઈ શકે છે. રાજ્યમાં CNG ગેસમાં રૂપિયા 3નો વધારો થઈ શકે છે. દિવાળી પહેલા CNG ગેસના ભાવમાં વધારો થઈ શકે છે. જો CNGના ભાવમાં 3 રૂપિયાનો વધારો થશે તો ભાવ 88 રૂપિયાએ પહોંચી જશે.