કાર્યવાહી / VIDEO: બ્લેક ફિલ્મ... વ્હાઇટ કારમાં ફરતા પોલીસ જવાનને વકીલે કરાવ્યું કાયદાનું ભાન, ખુદ PIએ આવીને ફટકાર્યો દંડ

• પોલીસકર્મીને નથી ટ્રાફિક નિયમનું ભાન 
• વકીલે ટ્રાફિકના નિયમનું કરાવ્યું ભાન
• કારના કાચમાં બ્લેક ફિલ્મ હોવાથી દંડ વસૂલ્યો

સુરત પોલીસ કર્મચારીને દંડ: સુરતમાં પોલીસકર્મીને વકીલે ટ્રાફિકના નિયમનું ભાન કરાવ્યું હોવાની ઘટના સામે આવી છે. વાત જાણે એમ છે કે, સુરતમાં એડવોકેટ મેહુલ બોઘરાનો એક વિડીયો સોશિયલ મીડિયા પર વાયરલ થઈ રહ્યો છે. જેમાં વકીલે નિયમોની પાલન નહીં કરનારા પોલીસકર્મી પાસે દંડ ભરાવ્યો હોવાનું સામે આવ્યું છે. પ્રાથમિક વિગતો મુજબ પાંડેસરા પોલીસ સ્ટેશનના પોલીસકર્મીની કારમાં બ્લેક ફિલ્મ કાચને હોવાથી તેમને દંડ ભરવો પડ્યો હતો. 

સુરતમાં કાયદો અને વ્યવસ્થાની સ્થિતિ જાળવવા પોલીસ સતત કાર્યરત હોય છે. જોકે હાલમાં એક વિડીયો સામે આવ્યો છે કે, જેમાં ખુદ પોલીસ કર્મચારીએ નિયમનું પાલન ન કર્યું હોવાથી દંડ ભરવાનો વારો આવ્યો છે. આ ઘટનાની વિગત એવી છે કે, સુરતના પાંડેસરા પોલીસ સ્ટેશનના કર્મચારીએ પોતાની કારમાં બ્લેક ફિલ્મ કાચ લગાવ્યા હતા. જેને લઈ વકીલ મેહુલ બોઘરાએ આ અંગે PIને જાણ કરી હતી. 

ડિંડોલી સર્કલ પર PIએ સ્થળ પર પહોંચી દંડ વસૂલ કર્યો 
પાંડેસરા પોલીસ સ્ટેશનના કર્મચારીની કારમાં બ્લેક ફિલ્મ કાચ હોવાને લઈ ડિંડોલી સર્કલ પર PI સ્થળ પર પહોંચ્યા હતા . જ્યાં પહોંચી તેમણે પોલીસ કર્મચારી પાસેથી સ્થળ પર જ 3 હજાર દંડ વસૂલ્યો હતો. વિગતો મુજબ કારમાં પોલીસનું ટેગ અને કાળા કાચ હતા. આ સાથે પીયુસી અને વીમો પણ ન હોવાનું સામે આવ્યા બાદ ડિંડોલી સર્કલ પર PIએ જ કારના કાચ પરની બ્લેક ફિલ્મ હટાવડાવી અને દંડ ફટકાર્યો હતો.