આદેશ / ઓવરલોડ પર એક્શન.! બેટ દ્વારકા જનારા લોકો માટે મોટો નિર્ણય, ફેરી બોટમાં ટિકિટ ફરજીયાત, જુઓ નવો ભાવ

• દ્વારકા મીડીયાના અહેવાલ બાદ તંત્ર જાગ્યું
• ફેરી બોટમાં પ્રવાસીઓને ટિકિટ ફરજીયાત કરાઇ
• ટિકિટ વિના બોટમાં બેસવા નહી દેવાય

દેવભૂમિ દ્વારકાથી બેટ સુધી ચાલતી ફેરી બોટ સેવા છાશવારે ચર્ચામાં આવતી હોય છે. મુસાફરો પાસેથી રુપિયા ઉઘરાવા ઉપરાંત નીતિનીયમને નેવે મૂકી પેસેન્જર ભરવા બાબતે અનેક વખત સવાલો ઉઠ્યા હતા, ત્યારે આ મામલે તંત્ર દ્વારા હવે આકરો નિર્ણય કરવામાં આવ્યો છે. આ અંગેનો એક વીડિયો અગાઉ વાયરલ થયો હતો, જેમાં પેસેન્જર પાસેથી વધુ પૈસા ઉપરાંત ક્ષમતા કરતા વધુ પેસેન્જર બેસાડાયા હતા. ત્યારે આ વાયરલ વીડિયો બાદ તંત્ર સફાળું જાગ્યું છે અને ફેરી બોટમાં બેસતા પેસેન્જરે ફરજિયાત ટિકિટ આપવાનું નક્કી કર્યું છે.

અગાઉ સીધા જ બોટ કર્મચારી પૈસા ઉઘરાવી લેતો

છેલ્લા કેટલાક સમયથી દેવભૂમિ દ્વારકા નજીક આવેલા બેટ દ્વારકામાં ભગવાન શ્રી કૃષ્ણના દર્શન કરવા આવતા ભક્તો પાસેથી મનઘડત લીધે પૈસા પડાવી લેવામાં આવતાં હતા. ઓખાથી બેટ દ્વારકા જતી વખતે ફેરી બોટમાં બેસીને પહોંચવાનું હોય છે. અહીં બોટ ધારકોને લાયસન્સ આપી પેસેન્જર ભરવા માટે મંજુરી આપવામાં આવી છે, જો કે કેટલાક લેભાગુ તત્વો દ્વારા બોટમાં ક્ષમતા કરતાં પધુ પેસેન્જર ભરતાં હતા.  આ અંગેનો એક વીડિયો પણ વાયરલ થયો હતો. બાદ તંત્ર સફાળું જાગ્યું છે અને ફેરી બોટમાં બેસતા પેસેન્જરે ફરજિયાત ટિકિટ આપવાનું નક્કી કર્યું છે.

પ્રાપ્ત વિગત પ્રમાણે થોડા સમય પહેલા જ ફેરી બોટમાં ક્ષમતા કરતાં વધુ પેસેન્જર અને વધુ નાણા ખંખેરી લેવામાં આવતા હોવાની અનેક ફરિયાદો ઉઠવા પામી હતી. જે બાદ હવે ફેરી બોટમાં પ્રવાસીઓને ટિકિટ ફરજિયાત કરવામાં આવી છે. ટિકિવ વગર પેસેન્જરને બોટમાં બેસાડવામાં આવશે નહીં. અને કેપેસિટી જેટલા જ મુસાફરો બેસાડવા પડશે. આ સિવાય પુખ્તવયના લોકો માટે 20 અને બાળકોના 10 રૂપિયા ટિકિટ દર નક્કી કરવામાં આવ્યો છે. તેનાથી વધુ નાણા ઉઘરાવી શકાશે નહીં. ઉલ્લેખનીય છે કે અગાઉ સીધા જ પેસેન્જર બોટમાં બેસાડવામાં આવતા કર્મચારીઓ રૂપિયા લેતા હતા. જે હવે બંધ કરાશે.