દુખમાં આર્થિક ટેકો / જૂનાગઢમાં જર્જરિત ઇમારત ધરાશાયી થતાં 4ના મોત, CM ભૂપેન્દ્ર પટેલ કરી સહાયની જાહેરાત, જુઓ કેટલી

• CM ભૂપેન્દ્ર પટેલે દુર્ઘટનાને લઇને વ્યક્ત કર્યુ દુઃખ
• દુર્ઘટનામાં 4 મૃતકોના પરિવારજનોને સહાયની કરી જાહેરાત 
• રાજ્ય સરકાર દ્વારા મૃતકોના પરિવારજનોને 4 લાખની અપાશે સહાય

જૂનાગઢમાં વરસાદી આફત વચ્ચે જર્જરીત ઈમારત ધરાશાયી થયાની મોટી દુર્ઘટના સામે આવી હતી. આ ઘટનામાં એકી સાથે ચાર લોકોને કાળ આંબી જતા અરેરાટી મચી ગઈ છે. સમગ્ર પંથકમાં ગમગીની છવાઈ છે. ત્યારે જર્જરિત ઇમારત ધરાશાયી થયાની દુર્ઘટના અંગે CM ભૂપેન્દ્ર પટેલે પણ દુઃખ વ્યક્ત કરી તાત્કાલીક સહાયની જાહેરાત કરી છે. મૃતકોના પરિવારજનોને 4 લાખની સહાય સરકાર દ્વારા ચુકવવામા આવશે.

જૂનાગઢમાં મકાન તૂટી પડવાની ઘટના અત્યંત દુ:ખદ છે. આ દુર્ઘટનામાં જીવ ગુમાવનાર મૃતકોના સ્વજનો પ્રત્યે સંવેદનાની લાગણી વ્યક્ત કરું છું. મૃતકોના આત્માની શાંતિ અર્થે ઈશ્વરને પ્રાર્થના કરું છું. રાજ્ય સરકાર મૃતકોના પરિવારજનને રૂ. 4 લાખની સહાય કરશે.

— Bhupendra Patel (@Bhupendrapbjp) July 24, 2023

શું હતો સમગ્ર કેસ?

જૂનાગઢમાં જર્જરિત 2 માળનું બિલ્ડીંગ ધરાશાયી થતા બિલ્ડિંગમાં રહેતા લોકો કાટમાળ નીચે દટાઈ જવા પામ્યા હતા. ત્યારે આ અંગેની જાણ NDRF  ની ટીમ તેમજ મહાનગર પાલિકાને થતા પાલિકા દ્વારા તાત્કાલિક બચાવ કામગીરી હાથ ધરી હતી. ત્યારે કાટમાળમાં દટાઈ જતા કુલ ચાર વ્યક્તિઓનાં મોત નિપજ્યા હતા. વરસાદી માહોલ વચ્ચે જૂનાગઢના કડિયાવાડમાં દુર્ઘટના સર્જાઈ હતી. કડિયાવાડમાં મકાન ધરાશાયી થતાં 4 લોકો કાટમાળ નીચે દટાયા હતા. મકાન ધરાશાયી થતા લોકોના ટોળેટોળા ઉમટી પડ્યા છે. મેયર સહિતના પદાધિકારીઓ પણ ઘટના સ્થળે દોડી આવ્યા છે.

મકાન ધરાશાઈ થતા કાટમાળમાં દટાયેલા 4 લોકોનાં મોત
મકાન ધરાશાયી થતાં  રેસ્ક્યુની કામગીરી હાથ ધરવામાં આવી છે. NDRFની ટીમ દ્વારા રેસ્ક્યુની કામગીરી હાથ ધરવામાં આવી છે. JCB સહિત સ્થાનિકો પણ રેસ્ક્યુની કામગીરીમાં જોડાયા છે. 108 એમ્બુલન્સ પણ ઘટના સ્થળે પહોંચી છે. ત્યારે કાટમાળમાં દટાયેલા ચાર લોકોનાં મોત નિપજ્યા હોવાનુ બહાર આવતા અરેરાટી મચી જવા પામી છે.