આદેશ / આતંકીઓનો ટાઈમ આવી ગયો.! પુંછ હુમલાના સાત આતંકવાદીઓને ખતમ કરવા 2,000 કમાન્ડોનું ‘મેગા ઓપરેશન’

• પુંછ હુમલાના આતંકીઓનું આવી બન્યું 
• આતંકવાદીઓને ખતમ કરવા પોલીસ અને સુરક્ષાદળોનું ‘મેગા ઓપરેશન’ 
• ૨,૦૦૦થી વધુ કમાન્ડો જોડાયા

જમ્મુ-કાશ્મીરના પુંછ જિલ્લામાં ગુરુવારે થયેલા એક આતંકી હુમલામાં પાંચ જવાનો શહીદ થયા હતા. આ ખતરનાક હુમલાને અંજામ આપનારા સાત આતંકવાદીઓને ખતમ કરવા માટે જમ્મુ-કાશ્મીર પોલીસ અને સુરક્ષાદળોએ એક સંયુક્ત ‘મેગા ઓપરેશન’ હાથ ધર્યું છે, જેમાં ૨,૦૦૦થી વધુ કમાન્ડો જોડાયા છે. 

ગાઢ જંગલોમાં હુમલાખોર આતંકીઓ છુપાયા
સુરક્ષાદળોને એવા ઈનપુટ્સ મળ્યા છે કે પુંચ જિલ્લાના બાટા-ડોરિયા વિસ્તારનાં ગાઢ જંગલોમાં આ હુમલાખોર આતંકીઓ છુપાયા છે અને તેથી તેમને ઝડપીને ખતમ કરવા માટે એક મોટું ઓપરેશન પુરજોશમાં ચાલી રહ્યું છે. આ આેપરેશનમાં ડ્રોન અને હેલિકોપ્ટરને પણ કામે લગાડવામાં આવ્યાં છે. આકાશમાંથી ડ્રોન જંગલોમાં સતત વોચ રાખી રહ્યાં છે, જ્યારે MI હેલિકોપ્ટર પણ હુમલાખોરોની ખોજ કરી રહ્યાં છે એટલું જ નહીં, સ્નિફર ડોગ્સની સ્ક્વોડને પણ કામે લગાડવામાં આવી છે. 

હુમલામાં સ્ટીલ બુલેટનો પણ ઉપયોગ કર્યો

આ સ્પેશિયલ મેગા ઓપરેશનમાં આર્મીની સાથે પોલીસ, ઈન્ટેલિજન્સ એજન્સીઓ અને ખાસ કરીને નેશનલ ઈન્વેસ્ટિગેશન એજન્સી (NIA) પણ કો-ઓર્ડિનેટ કરી રહી છે. આ ઓપરેશનની ગંભીરતા એ હકીકત પરથી સમજાય છે કે સેનાના કમાન્ડોને શૂટ એટ સાઈટ (દેખો ત્યાં ઠાર)ના ઓર્ડર પણ આપી દેવામાં આવ્યા છે.દરમિયાન, આ હુમલા અંગે એક મોટો ખુલાસો થયો છે. ઈન્ટેલિજન્સ બ્યૂરો (આઈબી)ના રિપોર્ટમાં જણાવાયું છે કે આતંકીઓએ હુમલા માટે સ્ટિકી બોમ્બનો ઉપયોગ કર્યો હતો અને આ હુમલાને કટરાના હુમલાની પેટર્ન પર અંજામ આપવામાં આવ્યો હતો. આઈબીએ ગૃહ મંત્રાલય અને NIA સાથે તમામ હકીકતો સાથે આ રિપોર્ટ શેર કર્યો છે. આ રિપોર્ટમાં જણાવાયું છે કે આતંકીઓએ ૩૬ રાઉન્ડ ફાયરિંગ કર્યું હતું. તેમણે હુમલામાં સ્ટીલ બુલેટનો પણ ઉપયોગ કર્યો હતો.