દારૂબંધીના પોકળ દાવા / ગુજરાત યુનિવર્સિટીમાં ગાંજા બાદ હવે દારૂની 20 ખાલી બોટલો મળી આવતા વિવાદ, તંત્ર સવાલના ઘેરામાં

• ગુજરાત યુનિવર્સિટી વિદ્યાનું ધામ કે નશાનું તે મોટો સવાલ
• ગુજ. યુનિવર્સિટીમાં મળી દારૂની ખાલી બોટલો 
• ગાંજાનો છોડ મળ્યો ત્યાંથી મળી દારૂની ખાલી બોટલો

Ahmedabad News: રાજ્યની સૌથી મોટી ગુજરાત યુનિવર્સિટી નશાનું હબ બની હોય તેવું લાગી રહ્યું છે. યુનિવર્સિટી કેમ્પસમાંથી ગઈકાલે ગાંજાના છોડ મળી આવ્યા બાદ હવે યુનિવર્સિટીના કેમ્પસમાંથી 20થી વધુ દારૂની ખાલી બોટલ મળી આવતા વિવાદ સર્જાયો છે. ગાંજાના છોડ બાદ દારૂની ખાલી બોટલો મળી આવતા ગુજરાત યુનિવર્સિટી વિદ્યાનું ધામ કે નશાનું તે મોટો સવાલ છે. તો રાજ્યમાં દારૂબંધીના દાવા પર ફરી એક વખત સવાલ ઉભા થયા છે. 

20થી વધુ દારૂની ખાલી બોટલ મળી આવી
અમદાવાદની ગુજરાત યુનિવર્સિટીની હોસ્ટેલના D બ્લોકની પાછળ ઘાસમાં દારૂની ખાલી બોટલોનો ઢગલો મળી આવ્યો છે. હોસ્ટેલના D બ્લોકની પાછળ જ નહીં આગળથી પણ દારૂની ખાલી બોટલો મળી આવી છે. જ્યાંથી ગાંજાનો છોડ મળ્યો ત્યાંથી 20થી વધુ દારૂની ખાલી બોટલ મળી આવી છે. યુનિવર્સિટીના કેમ્પસમાં દારૂની ખાલી બોટલોનો ઢગલો પડ્યો છે અને યુનિવર્સિટીના મેનેજમેન્ટ આ બાબતથી સાવ અજાણ જ છે. યુનિવર્સિટી કેમ્પસમાંથી દારૂની ખાલી બોટલો મળી આવતા ગાંધીના ગુજરાતમાં દારૂબંધી માત્ર કાગળ પર જ હોય તેવું લાગી રહ્યું છે. 

ગઈકાલે મળી આવ્યા હતા ગાંજાના છોડ
આપને જણાવી દઈએ કે, ગુજરાત યુનિવર્સિટી હોસ્ટેલના કેમ્પસમાં D બ્લોકની બાજુમાંથી ગતરોજ ગાંજાના બે અલગ અલગ છોડ મળી આવ્યા હતા. જેની ઉંચાઈ 6.5 ફૂટ અને 5.5 ફૂટ હોવાનું સામે આવ્યું હતું. આ અંગેને સમાચાર પ્રકાશિત થતાં જ ગુજરાત યુનિવર્સિટીમાં FSL અને પોલીસની ટીમ દોડી આવી હતી અને તપાસ હાથ ધરી હતી. ત્યારે કેમ્પસમાં ગાંજાના છોડ કેવી રીતે ઉગ્યા અને દારૂની ખાલી બોટલો કેવી રીતે આવી એ મોટો સવાલ? શું વિદ્યાના ધામમાં યુવાનો નશાના રવાડે ચઢી ગયા છે? યુવાનોને નશાના રવાડે ચઢાવનારા તત્વો કોણ છે? યુવાનોને ગેરમાર્ગે કોણ દોરી રહ્યું છે? એ તમામ મુદ્દે યોગ્ય તપાસ થવી જોઈએ.