ઈઝરાયેલ-હમાસ યુદ્ધ / હમાસ યુદ્ધમાં ભારત માટે માઠા સમાચાર, ઈઝરાયલ તરફથી મેદાને જંગમાં ઉતરેલી ભારતીય મૂળની 2 મહિલા સૈનિકોના મોત

• ઈઝરાયેલ-હમાસ વચ્ચે ચાલી રહેલા યુદ્ધનો આજે 10મો દિવસ 
• યુદ્ધમાં ભારતીય મૂળની બે મહિલા સૈનિકોના પણ મોત
• ઈઝરાયેલ-હમાસ યુદ્ધમાં બચી ગયેલ યુવતીએ આપવીતી કહી 

Israel-Hamas War : ઈઝરાયેલ અને પેલેસ્ટાઈન આતંકવાદી સંગઠન હમાસ વચ્ચે ચાલી રહેલા યુદ્ધનો આજે 10મો દિવસ છે. વાત જાણે એમ છે કે, આ યુદ્ધ વચ્ચે એક મોટા સમાચાર સામે આવ્યા છે કે, અહીં યુદ્ધમાં ભારતીય મૂળની બે મહિલા સૈનિકોના પણ મોત થયા છે. 7 ઓક્ટોબરે ઘટના સમયે બંને મહિલા સૈનિકો દક્ષિણ ઇઝરાયેલમાં હાજર હતા. ઈઝરાયેલની સેના તેમજ ઈઝરાયેલના ભારતીય સમુદાયે આ વાતની પુષ્ટિ કરી છે.

હુમલામાં જીવ ગુમાવનાર મહિલા સૈનિકોના નામ 22 વર્ષીય લેફ્ટનન્ટ ઓર મોસેસ અને ઈન્સ્પેક્ટર કિમ ડોકરેકર છે. ઓર મોસેસ હોમ ફ્રન્ટ કમાન્ડમાં તૈનાત હતા જ્યારે કિમ ડોકરાકર બોર્ડર પોલીસ ઓફિસમાં તૈનાત હતા. 7 ઓક્ટોબરે હમાસના હુમલામાં ડ્યુટી દરમિયાન બંનેના મોત થયા હતા. નોંધનીય છે કે, હમાસ સાથેના યુદ્ધમાં અત્યાર સુધીમાં 286 સૈનિકો અને 51 પોલીસ અધિકારીઓના મોત થયા છે.

ઈઝરાયેલ-હમાસ યુદ્ધમાં બચી ગયેલ યુવતીએ આપવીતી કહી 
ઈઝરાયેલના ભારતીય સમુદાયનું કહેવું છે કે ભારતીય મૂળના મૃતકોની સંખ્યા વધી શકે છે. કારણ કે અત્યાર સુધી હમાસ દ્વારા ઈઝરાયેલના ઘણા લોકોનું અપહરણ કરવામાં આવ્યું છે જેમાંથી કેટલાકની ઓળખ પણ થઈ શકી નથી. ભારતીય મૂળની 24 વર્ષીય મહિલા શહાફ ટોકર 7 ઓક્ટોબરે હમાસના હુમલામાંથી બચી ગઈ હતી. હુમલામાં બચી ગયેલા શહાફ અને તેના મિત્ર યાનીરે આ હુમલા વિશે એક ન્યૂઝ એજન્સી સાથે વાત કરી હતી.

શહાફ અને તેનો મિત્ર યાનીર આઘાતમાં  
વાસ્તવમાં શહાફના દાદા યાકોવ ટોકર 1963માં મુંબઈથી ઈઝરાયેલ પહોંચ્યા હતા. ત્યારથી તેનો પરિવાર ત્યાં રહે છે. હુમલા વિશે વાત કરતા શહાફે કહ્યું કે, તે અને તેનો મિત્ર યાનીર હજુ પણ આઘાતમાં છે. શહાફે જણાવ્યું કે, 7 ઓક્ટોબરના રોજ તે તેના મિત્ર યાનીર સાથે દક્ષિણ ઈઝરાયેલમાં યોજાઈ રહેલી પાર્ટીમાં ગઈ હતી. અચાનક તેણે જોયું કે આકાશમાંથી રોકેટનો વરસાદ થઈ રહ્યો છે.

શહાફે કહ્યું કે, મેં યાનીરને કહ્યું કે આકાશમાંથી મિસાઇલો પડી રહી છે. આ પછી અમે કાર તરફ દોડવા લાગ્યા. દોડતી વખતે મારો પગ લપસી ગયો અને હું જમીન પર પડી ગઈ યાનીરે મને ઉપાડી અને કહ્યું કે બધું બરાબર છે, પણ અમારે અહીંથી જલ્દી ભાગવું પડશે. અમે કારમાં બેઠા અને તેને ચલાવવા લાગ્યા. પોલીસે અમને જમણી તરફ દોડવાનું કહ્યું, પણ તે રસ્તો તેલ અવીવ તરફ જતો ન હતો તેથી અમે પાછા વળીને તેલ અવીવ તરફ જવાનું નક્કી કર્યું.

21થી વધુ લોકો પેટ્રોલ પંપમાં 3 કલાક સુધી છુપાયા
આ સાથે યુવતીએ કહ્યું કે, કહ્યું કે અમને ખબર ન હતી કે અમે બચી જઈશું કે માર્યા જઈશું. આતંકવાદીઓ સંપૂર્ણ પ્લાનિંગ સાથે ભાગી છૂટવાની રાહ જોઈ રહ્યા હતા. આઠ આતંકવાદીઓએ રસ્તો બ્લોક કરી દીધો હતો. આતંકવાદીઓએ તેમને જોતાની સાથે જ તેમના પર ગોળીબાર શરૂ કરી દીધો હતો. આ પછી યાનીર કારને પાછળ રાખીને બીજી તરફ ભાગી ગયો પરંતુ અહીં પણ આતંકવાદીઓ હાજર હતા. કોઈક રીતે બંને તેમની પાસેથી ભાગીને એક ગેસ સ્ટેશન (પેટ્રોલ પંપ) પર પહોંચ્યા અને ત્યાં ત્રણ કલાક સુધી ડરીને છુપાયેલા રહ્યા. તેમની સાથે લગભગ 21 વધુ લોકો ત્યાં હાજર હતા. માત્ર એક જ સિક્યુરિટી ગાર્ડ હતો જેની પાસે બંદૂક હતી.