રસી / અમદાવાદની ઝાયડસ કંપનીની કોરોના વેક્સિન તૈયાર-અરજી કરાઇ, મહિનામાં આટલા કરોડ ડોઝની તૈયારી

• કોરોના સામેની રસીને લઈને મહત્વના સમાચાર
• ઝાયડસની ઝાયકોવિડ રસી તૈયાર
• ઈમરજન્સી વપરાશની માંગી મંજૂરી

ત્રીજા તબક્કાના ટ્રાયલ પછી ઈમરજન્સી વપરાશ માટે કરાઈ અરજી

ગુજરાત સહિત આખા ભારતમાં કોરોના વાયરસની બીજી ઘાતક લહેર ચાલી રહી છે. દરરોજ હજારોની સંખ્યામાં લોકો મોતને ભેટી રહ્યા છે તથા લાખોની સંખ્યામાં નવા કેસ સામે આવી રહ્યા છે. દેશભરમાં ઑક્સીજનથી લઈને બેડની અછત ઊભી થઈ ગઈ છે, અને દર્દીઓ સુવિધાના અભાવે મોતને ભેટી રહ્યા છે, એવામાં ભારત સરકાર તથા જુદા જુદા રાજ્યોની સરકાર દ્વારા વધુમાં વધુ વેકસીનેશન માટે કામ કરવામાં આવી રહ્યું છે એવામાં અમદાવાદની ઝાયડસ કંપની દ્વારા તૈયાર કરવામાં આવેલ કોરોના વેક્સિન તૈયાર થઈ ગઈ છે અને તેની મંજૂરી માટે અરજી કરવામાં આવેલ છે. 

ઝાયકોવિડના 1 કરોડ ડોઝ પ્રતિમાસ બનાવવાની તૈયારી

ગુજરાતની ઝાયડસ કંપની દ્વારા કોરોના વાયરસની રસી તૈયાર કરવામાં આવી છે અને ત્રીજા ટ્રાયલ બાદ હવે ઈમરજન્સી વપરાશ માટે અરજી કરવામાં આવી છે. જૉ કેન્દ્ર સરકારની સંસ્થા દ્વારા આ રસીને મંજૂરી આપી દેવામાં આવે તો તરત જ દેશના લોકોને રસી મળી રહેશે. આટલું જ નહીં કંપનીએ આ રસીના એક કરોડ ડોઝ પ્રતિ મહિને બનાવવાની તૈયારી દર્શાવી છે. 

અત્યારે બે રસી લોકોને આપવામાં આવી રહી છે 

નોંધનીય છે કે હાલમાં ભારતને બે રસીને મંજૂરી મળી હતી કોવિશિલ્ડ અને કોવેક્સિન, બાદમાં રશિયાની સ્પુટનીક વીને પણ ભારતમાં વાપરવા માટે મંજૂરી આપી દેવામાં આવી છે. હવે આશા છે કે ભારતને વધુ એક રસી મળી રહેશે. કોરોના વાયરસ સામે લડવા માટે દુનિયાના મોટા ભાગના વૈજ્ઞાનિકો અને નિષ્ણાતો માને છે કે ભારતમાં વહેલામાં વહેલું રસીકરણ કરવું જોઈએ.