લોકસભા ચૂંટણીને મતદાનને ગણતરીના કલાકો બાકી રહ્યા છે. ત્યારે ક્ષત્રિય સમાજની ભાજપ પ્રત્યેની નારાજગી હજુ પણ જોવા મળી રહી છે. ક્ષત્રિયોની અસ્મિતાની લડાઇને લઇ ભાજપને પણ ફાડ પેઠી છે. સમગ્ર ગુજરાતમાં છેલ્લા 37 દિવસથી ઠેરઠેર ક્ષત્રિયો ભાજપ સામે મોરચો માંડીને બેઠા છે. આજે અમદાવાદના નરોડા ખાતેથી શરૂ થયેલી ક્ષત્રિય ધર્મરથ યાત્રા નરોડા, કૃષ્ણનગર, બાપુનગર વિસ્તારમાં ફરી હતી અને સાંજે વસ્ત્રાલ ખાતે પૂર્ણ થઈ હતી. ક્ષત્રિયોના ધર્મરથનું ઠેર ઠેર સ્વાગત કરવામાં આવ્યુ હતું. આ નારી અસ્મિતાની લડાઇ સાથે નિકળેલી યાત્રામાં ‘જય ભવાની ભાજપ જવાની’ના નારા લગાવવામાં આવ્યા હતા.
ભાજપ દ્વારા રાજારજવાડા પર બહેન દિકરીને લઇને કરાયેલા અભદ્ર ટિપ્પણી બાદ ગુજરાતમાં નહી સમગ્ર દેશમાં ક્ષત્રિયો ભાજપનો વિરોધ કરી રહ્યા છે. આટલું જ નહી ભાજપે પરસોત્તમ રૂપાલાની ટિકિટ રદ નહી કરતા રાજપૂતો વધુ ભળક્યા છે. અને ભાજપ વિરુદ્ધ મતદાનની ખુલ્લેઆમ જાહેરાત કરી ભાજપનો ઠેર ઠેર વિરોધ કરી રહ્યા છે. છેલ્લા 37 દિવસથી ગુજરાતમાં ક્ષત્રિયોના સંમેલનો અને યાત્રા ચાલી રહી છે. ત્યારે આજે સવારે અમદાવાદના નરોડા ખાતેથી શરૂ થયેલી ક્ષત્રિય ધર્મરથ યાત્રા નરોડા, કૃષ્ણનગર, બાપુનગર સહિત અમદાવાદના વિવિધ વિસ્તારોમાં ફરી હતી. ક્ષત્રિય સમાજના હજારોની સંખ્યામાં ભાઈઓ અને બહેનો જોડાયા હતા. યાત્રામાં ‘જય ભવાની ભાજપ જવાની’ના નારા લગાવવામાં આવ્યા હતા.
આ પણ વાંચોઃ વિશ્લેષણ / ...તો એટલે ગુજરાતમાં ક્ષત્રિયોના વિરોધ વચ્ચે પણ રૂપાલાની ટિકિટ રદ ન કરાઇ! જાણો ઇનસાઇડ સ્ટોરી
રાજકોટ લોકસભા બેઠકના ઉમેદવાર પુરુષોત્તમ રૂપાલાએ આપેલા વિવાદસ્પદ નિવેદનને લઈને ક્ષત્રિય સમાજમાં ભારે રોષની લાગણી છે. સવારે અમદાવાદના નરોડા જય માતાજી ચોક શરૂ થયેલી આ યાત્રા નરોડા ગામ ખાતે પહોંચી ત્યારે ભવ્ય સ્વાગત કરવામાં આવ્યું હતું. કેસરી ઝંડા સાથે બાઈકો અને ગાડીઓના કાફલામાં નીકળેલી આ યાત્રા શહેરના પૂર્વ વિસ્તારમાં ફરી હતી.નારી અસ્મિતાની લડાઈ માટે ક્ષત્રિય સમાજની બહેનો-દીકરીઓ પણ હવે રસ્તા પર ઉતરી છે. હાથમાં તલવાર લઈને તલવાર રાસ વડે સમાજની દીકરીઓએ તેમની શક્તિ બતાવી હતી.
