ખેલ-જગત / GMDC ગ્રાઉન્ડમાં ક્રિકેટ રમતા યુવાનોને હવે મળશે ટીમ ઈન્ડિયામાં જવાની તક, ખુદ ધોની આપશે આ મોકો

ગુજરાતભરના એવા બાળકો માટે ખુશીના સમાચાર છે. જેમને ક્રિકેટમાં પોતાનું કેરિયર બનાવું છે. તેમના ઉત્સાહને હવે પંખ લગાવવાનું કામ MS ધોની ક્રિકેટ એકેડેમી પૂરું કરશે. અમદાવાદમાં 8 ફેબ્રુઆરીથી MS ધોની ક્રિકેટ એકેડેમીની શરૂઆત થઈ રહી છે. જેના માટેની રજિસ્ટ્રેશન કરાવવું ફરજિયાત છે. જે પ્રક્રિયા શરૂ પણ કરી દેવાઈ છે.

ગુજરાતના બાળકોમાં ક્રિકેટ માટે અનેરો પ્રેમ છે. પરંતુ ક્રિકેટમાં કારકિર્દી બનાવવા માટે પ્રોફેશનલ ક્રિકેટની સમજ હોવી જરૂરી છે. અને તેના માટે એકેડેમી સાથે જોડાઈ અને વર્ષો સુધી ટ્રેનિંગ પણ લેવી પડે છે. ત્યારે 7થી 19 વર્ષના જે બાળકો પોતાનું ભવિષ્ય ક્રિકેટ સાથે બનાવવા માગે છે. તેમને ધોની ક્રિકેટ એકેડેમીમાં ભારત ટીમના પૂર્વ કેપ્ટન મહેન્દ્રસિંહ ધોની ગુજરાતની મુલાકાતે આવી માર્ગદર્શન પૂરુ પાડશે. તો આ સાથે ઈન્ટરનેશનલ ક્રિકેટમાં પોતાનું યોગદાન આપી ચૂકેલા પૂર્વ ખેલાડીઓ પણ માર્ગદર્શન આપવા માટે આવશે. કોચિંગ લેનાર વિદ્યાર્થીને જિલ્લા અને રાજ્ય કક્ષાએ રમવાની તક મળશે.

આર્કા સ્પોર્ટ્સ અને શ્રી એન્ટરપ્રાઇઝના સંયુક્ત ઉપક્રમે અમદાવાદમાં MS ધોની ક્રિકેટ એકેડમીનો આરંભ થશે. અમદાવાદના GMDC મેદાનમાં MS ધોની ક્રિકેટ એકેડમી તૈયાર થઈ રહી છે. જે યુવાનો આ એકેડમીમાં રજિસ્ટ્રેશન કરાવવા માગે છે. તેમને રૂપિયા 6,500 ફી તરીકે ભરવાના રહેશે. જેમાં ક્રિકેટ કીટ, ડ્રેસ સહિતની સામગ્રીઓ આપવામાં આવશે. 

રજિસ્ટ્રેશન બાદ ફીનું માળખું

એકેડમીમાં ટ્રેનિંગ માટે 3 મહિનાના 10,000 રૂપિયા
6 મહિના માટે 20,000 રૂપિયા
1 વર્ષ માટે 36,000 રૂપિયા 
અઠવાડિયાના 6 દિવસ ક્રિકેટ ટ્રેનિંગ રહેશે 

આર્કા સ્પોર્ટ્સની સ્થાપના વિશે જાણવામાં આવે તો, વર્ષ 2014માં મિહિર દિવાકરે આ સંસ્થાની સ્થાપના કરી હતી. મિહિર દિવાકર સર પણ પોતે એક સ્પોર્ટ્સમેન છે. અને તેઓ વર્ષ 2000ની અન્ડર-19 વર્લ્ડ કપ વિજેતા ટીમનો હિસ્સો હતા. તેઓ હવે MS ધોની સાથે મળીને દેશભરના અનેક રાજ્યમાં ક્રિકેટ ક્ષેત્રે કારકિર્દી બનાવવા માગતા યુવાનોને ટ્રેનિંગ આપશે.