- રાજ્યના વાતાવરણમાં થઈ રહ્યો છે સતત ફેરફાર
- શહેરના લઘુતમ તાપમાનમાં ૧.૫ ડિગ્રી સેલ્સિયસનો ઘટાડો
- પાંચ-સાત દિવસમાં વરસાદ વરસવાની કોઇ સંભાવના નથી
અમદાવાદ સહિત રાજ્યભરના વાતાવરણમાં સતત ફેરફાર થઈ રહ્યો છે. ઉત્તર ભારતમાં સક્રિય થયેલા વેસ્ટર્ન ડિસ્ટર્બન્સની અસરથી શહેરમાં ભેજ ખેંચાવાની સાથે વાદળોનું પ્રમાણ પણ વધ્યું છે, જેના લીધે અમદાવાદમાં ગરમી અને બફારાના પ્રમાણમાં ઘટાડો થયો હોય તેમ લાગી રહ્યું છે. શહેરના લઘુતમ તાપમાનમાં ૧.૫ ડિગ્રી સેલ્સિયસનો ઘટાડો નોંધાયો છે. બીજી બાજુ હવામાન વિભાગે આપેલી આગાહી પ્રમાણે, આગામી પાંચ દિવસ દરમિયાન લઘુતમ તાપમાનમાં હજુ પણ એક ડિગ્રી સેલ્સિયસનો ઘટાડો થવાની શક્યતા છે.
તાપમાનમાં વધારે ફેરફાર થવાની કોઈ સંભાવના નથી
અમદાવાદ હવામાન વિભાગના ડાયરેક્ટર ડો. મનોરમા મોહંતીના જણાવ્યા પ્રમાણે, આગામી પાંચ-સાત દિવસમાં વરસાદ વરસવાની કોઇ સંભાવના નથી. તાપમાનમાં પણ કોઇ મોટો ફેરફાર થાય એવું લાગતું નથી. આગામી બે દિવસમાં તાપમાન એકાદ ડિગ્રી સુધી નીચે આવી શકે છે. રાજ્યમાં મહત્તમ અને લઘુતમ તાપમાનમાં વધારે ફેરફાર થવાની કોઈ સંભાવના નથી.
૨૧ ડિગ્રી આસપાસ તાપમાન રહેશે
તેમણે જણાવ્યું કે, અમદાવાદમાં સરેરાશ ૩૬-૩૭ ડિગ્રી સેલ્સિયસ તાપમાન રહેવાની શક્યતા છે. હવામાન વિભાગના આંકડાઓ પ્રમાણે, બુધવારે અમદાવાદનું મહત્તમ તાપમાન સામાન્ય કરતાં બે ડિગ્રી વધીને ૩૬.૮ ડિગ્રી સેલ્સિયસ અને લઘુતમ તાપમાન એક ડિગ્રી વધીને ૨૧.૧ ડિગ્રી નોંધાયું હતું. મનોરમા મોહંતીએ જણાવ્યું હતું કે, આ ટ્રાન્ઝિશન મહિનો હોવાથી તાપમાન યથાવત્ રહેશે. બપોરે ગરમી અને વહેલી સવારે તથા મોડી રાતે ઠંડકનો અનુભવ થશે. દિવસે ૩૬ ડિગ્રી, જ્યારે રાતે ૨૧ ડિગ્રી આસપાસ તાપમાન રહેશે.
ઉલ્લેખનીય છે કે, આવા વાતાવરણમાં હાલ અમદાવાદમાં રોગચાળો પણ વકર્યો છે. શહેરમાં મેલેરિયાના ૪૭, ઝેરી મેલેરિયાના નવ ઉપરાંત ચિકનગુનિયાના સાત કેસ નોંધાયા છે. પાણીજન્ય રોગ એવા ઝાડા-ઊલટીના ૨૩૩ કેસ, કમળાના ૧૦૧ તેમજ ટાઈફોઈડના ૨૭૪ કેસ તથા કોલેરાના સાત કેસ નોંધાયા છે.
