ચર્ચા / ગાડી પલટાઈ જશે...: ગેંગસ્ટર અતિક અહેમદને લેવા અમદાવાદ આવી UP પોલીસ, અખિલેશ યાદવે એન્કાઉન્ટરને લઈને આપ્યું સૂચક નિવેદન

• અતિક અહેમદ મામલે અખિલેશ યાદવે કહ્યું 
• સપાના વડા અખિલેશ યાદવનું સૂચક નિવેદન
• વાહન પલટી જવાની ચર્ચા મામલે આપ્યું નિવેદન

ઉમેશપાલ હત્યા કેસમાં બાહુબલી અતિક અહેમદ અને તેનો ભાઈ અશરફને દોષિત જાહેર કરાયા છે. જેમાં આરોપી અતિક અહેમદ ગુજરાતની સાબરમતી જેલમાં બંધ છે, જ્યારે અશરફ બરેલીની જેલમાં બંધ છે. ત્યારે સાબરમતી જેલમાં બંધ બાહુબલી નેતા અતીક અહેમદને ઉત્તર પ્રદેશ લઈ જવામાં આવી રહ્યો છે. જેને પગલે પોલીસ રવિવારે ગુજરાત આવી હતી. ત્યારે એન્કાઉન્ટર થવાના ડરથી તેમનું વાહન પલટી જવાની ચર્ચા જાગી રહી છે. આ મામલે સપાના વડા અખિલેશ યાદવનું સૂચક નિવેદન સામે આવ્યું છે. તેમણે પ્રેસ કોન્ફરન્સમાં કટાક્ષ સાથે જણાવ્યું કે, મુખ્યમંત્રી યોગી આદિત્યનાથે મંત્રીઓને કહ્યું હશે કે વાહન પલટી જશે. એટલે તો તેમના મંત્રીઓ આ પ્રકારના નિવેદનો આપી રહ્યા છે.

યુપીના પ્રયાગરાજ લઈ જવાની તૈયારી
સપા પ્રમુખ અખિલેશ યાદવે અતિક અહેમદના મુદ્દે નિવેદન આપતા વધુમાં યાદવે કહ્યું હતું કે વાહન પલટી જવાનો આ રેકોર્ડ હંમેશા એક રેકોર્ડ જ રહેશે. તે ક્યાંય નહીં જાય! જ્યારે રેકોર્ડ માંગશો ત્યારે તે મળશે. મહત્વનું છે કે ગેંગસ્ટર અતીક અહેમદ ઉમેશ પાલ મર્ડર કેસમાં હાલમાં સાબરમતી જેલમાં બંધ છે. જેની પૂછપરછ બાદ યુપીના પ્રયાગરાજ લઈ જવાની તૈયારી છે. જેમાં લગભગ 36 કલાક જેટલો સમય લાગી શકે છે.

અતિકે સુપ્રીમ કોર્ટમાં કરી હતી અરજી
ઉમેશપાલ હત્યાકાંડ મામલે અતિક અહેમદે પોતાની સુરક્ષાને લઈને સુપ્રીમ કોર્ટનો દરવાજો ખટખટાવ્યો હતો. અતિક અહેમદે સુપ્રીમમાં અરજી કરીને કહ્યું હતું કે, 'યુપીમાં દાખલ કેસની સુનાવણી માટે તેને ગુજરાતથી બહાર ન લઈ જવામાં આવે, તેના જીવને જોખમ છે.' અહેમદના વકીલ હનીફ ખાને સુપ્રીમ કોર્ટમાં આ અંગેની અરજી દાખલ કરી હતી. તેમાં અમદાવાદ જેલથી યુપીની જેલમાં ટ્રાન્સફર કરવાનો વિરોધ કરવામાં આવ્યો હતો. અરજીમાં જણાવવામાં આવ્યું હતું કે, યુપી સરકારના કેટલાક મંત્રીઓના નિવેદનથી એવું લાગે છે કે તેનું ફેક એન્કાઉન્ટર થઈ શકે છે.

અતિકને 6 ગાડીઓના કાફલા સાથે બાય રોડ UP લઈ જવાશે. જોકે, ગેંગસ્ટર અતિક સાબરમતી જેલમાંથી બહાર નીકળવા માંગતો નથી, તેને પોલીસ એન્કાઉન્ટરનો ભય સતાવી રહ્યો હોવાથી આનાકાની કરી રહ્યો છે. કોર્ટના આદેશ બાદ પણ અતિક ઉત્તરપ્રદેશ જવા માટે આનાકાની કરી રહ્યો છે.