- કમોસમી વરસાદની આગાહી કરાઈ
- 24 કલાકમાં વરસાદી માવઠાની શક્યતા
- તાપી, નવસારી, વલસાડમાં વરસાદની આગાહી કરાઈ
રાજ્યમાં હવામાન વિભાગે ફરી માવઠાને લઈ આગાહી કરી છે. ભર ઉનાળે કમોસમી વરસાદની આગાહી કરવામાં આવતા જગતનો તાત ચિંતામાં મુકાયો છે. કમોસમી વરસાદને લઈ રાજ્યના ઘણાં વિસ્તારમાં અગાઉ જ પાક નુકસાની થઈ છે તો બીજી તરફ ફરી કમોસમી વરસાદના કમઠાણ સર્જાતા ખેડૂત ચિંતામાં મુકાયો છે.
ફરી વરસાદની આગાહી
આગામી 24 કલાકમાં કમોસમી વરસાદની હવામાન વિભાગની આગાહી કરી છે જેમાં દક્ષિણ ગુજરાતમાં આગામી 24 કલાકમાં વરસાદી માવઠાની શક્યતા જણાઈ રહી છે. તો બીજી તરફ સુરત, ડાંગ, તાપી, નવસારી, વલસાડમાં વરસાદની આગાહી કરાઈ છે. છોટાઉદેપુર, નર્મદા, દાહોદના અમુક વિસ્તારમાં પણ વરસાદની આગાહી કરાઈ સાથો સાથ દક્ષિણ ગુજરાતના મોટાભાગના જિલ્લાઓમાં વાદળછાયું વાતાવરણ રહેવાની શક્યતા છે. મહારાષ્ટ્રમાં અપર એર સર્ક્યુલેશન સક્રિય થતા દક્ષિણ ગુજરાતમાં હળવા વરસાદની શક્યતા છે.
સુરતમાં ભર ઉનાળે વરસાદ
સુરતના વાતાવરણમાં આજે અચાનક જ પલટો આવ્યો હતો અને સમગ્ર શહેરમાં ઝરમર ઝરમર વરસાદ શરૂ થયો હતો. વરસાદ બાદ આખા શહેરનું વાતાવરણ વાદળછાયું થયું ગઈ છે તો વાદળોના ગડગડાટને કારણે ચોમાસા જેવો માહોલ સર્જાયો છે અને સામાન્ય વરસાદથી ભર ઉનાળે ઠંડક પ્રસરી છે.
લિંબાયતમાં એકાએક વાતાવરણમાં પલટો
માંગરોળ અને લિંબાયત તાલુકાના વાતાવરણમાં એકાએક પલટો આવ્યો છે. માંગરોળ અને લિંબાયતમાં ભરઉનાળે કમોસમી વરસાદ ખાબક્યો છે. બન્ને તાલુકામાં વાદળછાયા વાતાવરણ વચ્ચે વરસાદી છાંટા પડ્યા છે. સુરતના ગ્રામ્ય વિસ્તારના વાતાવરણમાં પણ પલટો આવ્યો છે. ચૈત્ર મહિનાના અંતમાં અષાઢી માહોલ છવાતા ધરતીપુત્રોની ચિંતામાં વધારો થયો છે. ખેતીના વિવિધ પાકોમાં નુકસાનની ભીતિ સેવાઈ રહી છે.
વાંકલ સહિત અનેક વિસ્તારો પડ્યો ઝરમર વરસાદ
આજે બપોરના 12 વાગ્યા પછી સુરતના લિંબાયત અને માંગરોળનું વાતાવરણ પલાટાયું હતું. તાલુકાના વાંકલ સહિત અનેક વિસ્તારોમાં વરસાદી છાંટા પડ્યાં હતા. એક તરફ વરસાદ પડતા વાતાવરણમાં થોડી ઠંડક છવાઈ ગયેલ છે. તો બીજી બાજુ કમોસમી વરસાદને કારણે પાકમાં મોટાપાયે નુકસાન થવાની ભીતિ સેવાઈ રહી છે.
હવામાન વિભાગની જનહિતમાં સૂચના
આજે અમદાવાદમાં 41-42 ડિગ્રી તાપમાન રહી શકે છે. તો અમરેલી 42 અને રાજકોટમાં 41.5 ડિગ્રી તાપામાન નોંધાઈ શકે છે. અમદાવાદ સહિતના જિલ્લાઓ માટે હવામાન વિભાગે જનહિતમાં સૂચના આપી છે. હવામાન વિભાગે કહ્યું કે, જે વિસ્તારોમાં 41-42 ડિગ્રી તાપમાન રહેતું હોય ત્યાં લોકો સચેત રહે. હળવા રંગના કપડાં પહેરવા, માથું ઢાંકવું, વારંવાર પાણી પીવું હિતાવહ છે.
