નિયમોનો ઉલાળીયો / VIDEO: અમદાવાદમાં વધુ એક જગ્યાએ લગાવાયા ટાયર કિલર બમ્પ, છતાં રોંગ સાઈડ આવતા લોકોએ જુઓ કેવા બહાના બતાવ્યા

• વધુ એક જગ્યાએ લાગ્યા ટાયર કિલર બમ્પ 
• ચાણક્યપુરી બ્રિજના છેડે લગાવાયો બમ્પ 
• બમ્પ છતાં ચાલકોનું રોંગસાઇડ ડ્રાઇવિંગ 

Ahmedabad News: અમદાવાદ શહેરમાં વધુ એક જગ્યાએ ટાયર કિલર બમ્પ લગાવવામાં આવ્યા છે. ચાણક્યપુરી બ્રિજના એક છેડે લગાવવામાં આવેલા ટાયર કિલર બમ્પનું સારું પરિણામ મળ્યા બાદ હવે આ બ્રિજના બીજા છેડે પણ ટાયર કિલર બમ્પ લગાવવામાં આવ્યા છે. રોંગ સાઈડમાં વાહન ચલાવતા લોકોને સીધાદોર કરવા માટે ટાયર કિલર બમ્પ લગાવાયા છે. છતાં પણ કેટલાક વાહનચાલકો હજુ પણ રોંગ સાઈડમાં વાહનો ચલાવી રહ્યા છે. બ્રિજ નીચે ટાયર કિલર બમ્પ લગાવ્યા હોવા છતાં પણ લોકો ટાયર કિલર બમ્પ ઉપરથી વાહન હંકારી રહ્યા છે. તેઓને જાણે આ ટાયર કિલર બમ્પથી કોઈ ફરક જ ન પડી રહ્યો હોય તેવું લાગી રહ્યું છે.  

બમ્પ લગાવ્યા છતાં રોંગ સાઇડમાં ચલાવી રહ્યા છે વાહનો 
અકસ્માત ટાળવા અમદાવાદ પોલીસ ટ્રાફિક ડ્રાઈવ ચલાવી રહી છે, તો બીજી બાજુ શહેરમાં ટાયર કિલર બમ્પ લગાવાયા છે. આજે VTV ન્યૂઝની ટીમ રિયાલિટી ચેક કરવા માટે આજે જ્યારે ચાણક્યપુરી બ્રિજ પાસે પહોંચી હતી, ત્યારે કેટલાક વાહનચાલકો રોંગસાઈડમાં વાહન ચલાવતા જોવા મળ્યા હતા. તો કેટલાક વાહનચાલકો આ ટાયરકિલર બમ્પને જોઈને યુ-ટર્ન મારતા પણ જોવા મળ્યા હતા. જોખમ હોવા છતાં પણ વાહનચાલકો રોંગસાઈડમાં ટાયર કિલર બમ્પ પરથી સહેજ પણ ડર્યા વગર વાહન પસાર કરતા જોવા મળ્યા હતા. 

કિલર બમ્પની પણ અસર નહીં!
બ્રિજ પાસે લોકો રોંગ સાઈડમાં વાહન હંકારી રહ્યા હતા અને લોકોને પૂછતા અવનવા બહાના બતાવી રહ્યા હતા. લોકોનો આશ્ચર્યજનક તર્ક હતો કે સીધા રસ્તે કિલોમીટર ફરવું પડે છે. કિલોમીટર ફરવું ન પડે માટે તેઓ રોંગ સાઈડ વાહન ચલાવી રહ્યા છે. તો કેટલાક લોકોને પૂછતા એવો જવાબ આપ્યો કે બધા રોંગ સાઈડ જ જાય છે. તો એક વાહન ચાલકે એવું જણાવ્યું હતું કે મને દેખાતું નથી એટલે હું આ સાઈડ આવી ગયો. તો અન્ય એક વાહન ચાલકે એવું જણાવ્યું હતું કે અમારી ભૂલ થઈ ગઈ હતી. 

રોંગ સાઈડ ડ્રાઈવિંગનું પરિણામ જોઈ લો!
- 2022: રોંગ સાઈડ ડ્રાઈવિંગથી અકસ્માતે મૃત્યુના 62 બનાવ
- 2021: રોંગ સાઈડ ડ્રાઈવિંગથી અકસ્માતે મૃત્યુના 63 બનાવ
- 2020: રોંગ સાઈડ ડ્રાઈવિંગથી અકસ્માતે મૃત્યુના 63 બનાવ
- 2019: રોંગ સાઈડ ડ્રાઈવિંગથી અકસ્માતે મૃત્યુના 62 બનાવ