- જિલ્લા પંચાયતોમાં હોદ્દેદારોની વરણી કરાઈ
- રાજકોટ જિલ્લા પંચાયતના નવા પ્રમુખ પ્રવીણા રંગાણી
- પાટણ જિલ્લા પંચાયતના પ્રમુખ તરીકે હેતલ ઠાકોરની વરણી
અમદાવાદ અને વડોદરા સહિત સુરત, રાજકોટ, જામનગર અને ભાવનગરમાં નવા મેયરો અને નવ નિયુક્ત હોદ્દેદારોની વરણી કર્યા બાદ જિલ્લા પંચાયતોમાં પણ પ્રમુખ સહિતના પદો પર નિમણૂક કરવામાં આવી છે. જિલ્લા પંચાયતમાં હોદ્દેદારોની વરણીને લઈ રાજકારણમાં ગરમાવો જોવા મળ્યો છે, અનેક જિલ્લાઓમાં આરોપ પ્રતિઆરોપ વચ્ચે હોદ્દેદારોની નિમણૂક કરવામાં આવી છે. જેમાં ક્યાંક તોડ-જોડની પણ રાજનીતિ જોવા મળી હતી. જાણીએ ક્યાં કોની વરણી થઈ
વડોદરા જિલ્લા પંચાયતના પ્રમુખ ગાયત્રીબા મહીડાની વરણી
વડોદરા જિલ્લા પંચાયતના નવા હોદ્દેદારોના નામ જાહેર કરાયા છે, જેમાં જિલ્લા પંચાયત પ્રમુખ તરીકે ગાયત્રીબા મહીડાની વરણી થઈ છે. જ્યારે ઉપપ્રમુખ તરીકે અશ્વિન પટેલની નિયુક્તિ કરાઈ છે.
તાપીમાં પ્રમુખની આવતીકાલે વરણી થશે
તાપી જિલ્લા પંચાયતના નવા હોદ્દેદારોની વરણી આવતીકાલે કરવામાં આવશે. ભાજપ દ્વારા પ્રમુખ માટે જાલમસિંહ વસાવાના નામનું મેન્ડેટ આપવામાં આવ્યા છે.
પ્રમુખ અને ઉપપ્રમુખની વરણી
ભાવનગર જિલ્લા પંચાયતમાં પ્રમુખ અને ઉપપ્રમુખની વરણી કરાઈ છે. જેમ કે, પ્રમુખ તરીકે રૈયાબેન મૈયાણીઅને ઉપપ્રમુખ તરીકે વિક્રમ ડાભીની નિયુક્તિ કરાઈ છે
રાજકોટમાં નવા સુકાનીઓની વરણી
રાજકોટ જિલ્લા પંચાયતના નવા સુકાનીઓની વરણી કરાઈ છે. જેમાં પ્રમુખ તરીકે પ્રવીણા રંગાણીની વરણી કરાઈ છે જ્યારે ઉપપ્રમુખ તરીકે રાજુ ડાંગરની નિયુક્તિ થઈ છે. કારોબારી ચેરમેન તરીકે પી.જી.કિયાડાની વરણી થઈ છે.
પાટણ જિલ્લા પંચાયતના પ્રમુખ હેતલ ઠાકોર
પાટણ જિલ્લા પંચાયતના નવા પ્રમુખ તરીકે હેતલ ઠાકોરની વરણી થઈ છે. અઢી વર્ષની ટર્મ માટે ફરી ભાજપના મહિલા પ્રમુખની વરણી કરાઈ છે. પાટણ જિલ્લા પંચાયતમાં કુલ 32 સભ્યોનું સંખ્યાબળ છે. જેમાં ભાજપ પાસે 21 અને કોંગ્રેસ પાસે 11 સભ્યો છે.
સાબરકાંઠા જિલ્લા પંચાયતના પ્રમુખ અને ઉપપ્રમુખના નામો જાહેર છે. જેમાં પ્રમુખ તરીકે ભારતીબેન પટેલ અને ઉપ્રમુખ તરીકે તારાબા ઝાલાની પસંદગી થઈ છે.
ગીર સોમનાથમાં પ્રમુખ-ઉપપ્રમુખની વરણી
ગીર સોમનાથ જિલ્લા પંચાયતના પ્રમુખ-ઉપપ્રમુખની વરણી કરાઈ છે. જિલ્લા પંચાયતના પ્રમુખ તરીકે મંજૂબેન મુછાળની પસંદગી થઈ છે જ્યારે ઉપપ્રમુખ તરીકે રાજવીરસિંહ ઝાલાની બિનહરીફ વરણી થઈ છે.
