ચોમાસું / દક્ષિણ ગુજરાતમાં મેઘરાજા ફરી ધડબડાટી બોલાવે તેવી આગાહી: જાણો સૌરાષ્ટ્ર અને અમદાવાદ કેવા રહેશે હાલ

• રાજ્યમાં વરસાદની આગાહી 
• આગામી 24 કલાકમાં પડશે વરસાદ 
• અનેક સ્થળોએ વરસાદની આગાહી

ગુજરાતમાં વરસાદ વધુ એકવાર ધબધબાટી બોલાવશે તેવી આગાહી કરવામાં આવી છે. હવામાન વિભાગે આગામી 24 કલાક વરસાદની આગાહી કરી છે. દક્ષિણ ગુજરાતમાં ભારે વરસાદની શક્યતા વ્યક્ત કરી છે. સુરત,ડાંગ,તાપી અને નવસારીમાં ભારે વરસાદ વરસી શકે છે.

સૌરાષ્ટ્રમાં સામાન્યથી મધ્યમ વરસાદની આગાહી  
હવામાન વિભાગના જણાવ્યા અનુસાર 24 કલાક બાદ વરસાદનું જોર ઘટવાની સંભાવના છે તેમજ અમદાવાદમાં સામાન્ય વરસાદની શક્યતા છે. માછીમારોને 5 દિવસ દરિયો ન ખેડવા સૂચનાં આપવામાં આવી છે. દરિયાકાંઠા વિસ્તારમાં પવનની ગતિમાં વધારો થવાની પણ શક્યતા છે તો બીજી તરફ સૌરાષ્ટ્રમાં સામાન્યથી મધ્યમ વરસાદની આગાહી કરવામાં આવી છે. અત્રે ઉલ્લેખનીય છે કે, રાજ્યમાં અત્યારસુધીમાં સિઝનનો 85 ટકા વરસાદ વરસ્યો છે. 

અંબાલાલ પટેલની આગાહી
અંબાલાલ પટેલે જણાવ્યું છે કે, આગામી 24 કલાકમાં અમદાવાદ, ગાંધીનગરમાં ભારે વરસાદ પડશે. સાથે જ પાટડી, દસાડા, વિરમગામ, માંડલમાં પણ વરસાદની શક્યતા છે. તેમણે જણાવ્યું કે, મહેસાણા, સમી, હારીજ, કડી, બેચરાજી, ઝોટાણા, બનાસકાંઠા, અરવલ્લી, સાબરકાંઠામાં વરસાદની શક્યતા છે. મધ્ય ગુજરાતના ભાગોમાં પણ વરસાદ થઈ શકે છે, ગુજરાત દક્ષિણ, સૌરાષ્ટ્ર, કચ્છમાં વરસાદ થઈ શકે છે તેવું હવામાન નિષ્ણાંત અંબાલાલ પટેલે જણાવ્યું છે. તેમણે કહ્યું કે, રાજ્યમાં હવે વરસાદ સાથે પવનનું જોર વધશે. કચ્છના ભાગોમાં 40થી 45 કિમી ઝડપે પવન ફૂંકાશે. ઉત્તર ગુજરાતના ભાગોમાં 25થી 30 કિમી ઝડપે પવન ફૂંકાશે. સાથે જ અમદાવાદમાં પણ 25 કિમી ઝડપે પવન ફૂંકાશે. 

આજે આ જિલ્લાઓમાં ભારે વરસાદની આગાહી
આજે પોરબંદર, દ્વારકા, અમરેલી, ભાવનગર, જૂનાગઢ, ગીર સોમનાથ, સુરત, તાપી, ડાંગ, વલસાડ, દમણમાં ભારે વરસાદની આગાહી કરવામાં આવી છે. સાથે ભરૂચ, વડોદરા, છોટાઉદેપુર, દાહોદ, પંચમહાલ, ખેડા, આણંદ, અમદાવાદ, નર્મદા, અરવલ્લી, મહીસાગર, સાબરકાંઠા, મહેસાણા, ગાંધીનગર, બોટાદ, સુરેન્દ્રનગર, રાજકોટ, કચ્છ, બનાસકાંઠા, સાબરકાંઠા, પાટણ, મોરબી, જામનગરમાં વરસાદની આગાહી હવામાન વિભાગ દ્વારા કરવામાં આવી છે.