- વર્લ્ડ કપ 2023ની પ્રથમ સેમિફાઇનલનો જંગ આવતીકાલે
- સેમિફાઇનલના જંગ દરમિયાન વરસાદ નહી બને વેરી
- રોહિત શર્માના હોમ ગ્રાઉન્ડ વાનખેડે સ્ટેડિયમમાં રમાશે મેચ
ક્રિકેટ રસીકો જેની આતુરતા પૂર્વક રાહ જોઇ રહ્યા છે તે વર્લ્ડ કપ 2023ની પ્રથમ સેમિફાઇનલનો જંગ આવતીકાલે ખેલાવા જઈ રહ્યો છે. ત્યારે ટીમ ઇન્ડિયાએ ફાઇનલમાં પ્રવેશવા માટે 15 નવેમ્બર ના રોજ સેમિફાઇનલ મેચમાં ન્યુઝીલેન્ડને ધૂળ ચાટતું કરવું ફરજિયાત છે. આ મેચ રોહિત શર્માના હોમ ગ્રાઉન્ડ વાનખેડે સ્ટેડિયમમાં રમાશે. જેને લઈને ટીમ ઇન્ડિયા શાનદાર પ્રદર્શન કરે તેવો આશાવાદ જોવા મળી રહ્યો છે. ખાસ વાત તો એ છે કે ટૂર્નામેન્ટમાં અત્યાર સુધી ભારતે 9માંથી તમામ 9 મેચ જીતી છે. હવે સેમીફાઈનલ જીતી તેવી ચાહકો સોનેરી આશા સેવી રહ્યા છે.
મેચમાં વરસાદ ત્રાટકે તેવા કોઈ સંજોગો જોવા મળતા નથી
બીજી બાજુ મેચને લઈને વાતાવરણની સ્થિતિ પણ સામે આવી છે. જેમાં Accuweather ના રિપોર્ટ અનુસાર આવતીકાલે બુધવારે મુંબઈમાં તડકો રહેશે. લઘુત્તમ તાપમાન 26 ડિગ્રી અને મહત્તમ તાપમાન 36 ડિગ્રી સેલ્સિયસ રહેશે. આમ મેચમાં વરસાદ ત્રાટકે તેવા કોઈ સંજોગો જોવા મળતા નથી. મેચ દરમિયાન વરસાદની માત્ર સંભાવના 1 ટકા છે. આવી સ્થિતિમાં ચાહકોને સમગ્ર 100 ઓવરનો રોમાંચ જોવા મળશે.બીજી વાત એ પણ છે કે જો વરસાદ પડે તો પણ એક દિવસ રિઝર્વ ડે રખાયો હોવાથી ક્રિકેટ રસિકોને કોઈ ચિંતા નથી.
ભારતે ન્યૂઝીલેન્ડને 4 વિકેટે હરાવ્યું હતું
ટીમ ઈન્ડિયા 2019 વર્લ્ડ કપની સેમિફાઈનલમાં 18 રનથી હારી ગઈ હતી. હવે આ જ ટીમ 4 વર્ષ બાદ ફરી ભારતનો સામનો કરી રહી છે. જેથી ટીમ પાસે ન્યૂઝીલેન્ડથી બદલો લેવાનો અવસર છે. ભારતીય ટીમનો ટોપ ઓર્ડર વર્ષ 2019ની સેમીફાઈનલમાં સંપૂર્ણ રીતે ફ્લોપ રહ્યો હતો. પરંતુ આ વર્ષે ટીમ શાનદાર પ્રદર્શન કરી રહી છે. ટીમ ઈન્ડિયા આ વર્લ્ડ કપમાં અગાઉ પણ ન્યુઝીલેન્ડ સામે ટકરાઈ ચૂકી છે. જેમાં ભારતે ન્યૂઝીલેન્ડને 4 વિકેટે હરાવ્યું હતું.
સેમિફાઇનલ માટે બંને ટીમોની સંભવિત XI:
ભારત: રોહિત શર્મા (કેપ્ટન), શુભમન ગિલ, વિરાટ કોહલી, શ્રેયસ ઐયર, કેએલ રાહુલ (વિકેટકીપર), સૂર્યકુમાર યાદવ, રવિન્દ્ર જાડેજા, મોહમ્મદ શમી, કુલદીપ યાદવ, જસપ્રિત બુમરાહ, મોહમ્મદ સિરાજ.
ન્યુઝીલેન્ડ: રચિન રવિન્દ્ર, ડેવોન કોનવે, કેન વિલિયમસન (કેપ્ટન), ડેરીલ મિશેલ, ટોમ લાથમ (વિકેટકીપર), માર્ક ચેપમેન, ગ્લેન ફિલિપ્સ, મિચેલ સેન્ટનર, ટ્રેન્ટ બોલ્ટ, લોકી ફર્ગ્યુસન અને ટિમ સાઉથી.
