કુદરતી સંકટ / ક્યાંક બોટ ઊંધી વળી, તો ક્યાંક વૃક્ષ ધરાશાયી થયા, નદીઓમાં પણ આવ્યું ઘોડાપૂર, વાવાઝોડાએ વિનાશ વેરવાનું કર્યું શરૂ

 

• દરિયો ગાંડોતુર બનતા બોટોને પણ ઘણું નુકસાન 
• દ્વારકામાં હાથી ગેઇટ પાસે હોર્ડિંગ્સ ઉડ્યા
• LCBના જવાનોએ હોર્ડિંગ્સને હટાવ્યા
• રસ્તાઓ પર વીજપોલ ધરાશાયી થયા

અરબી સમુદ્રમાં સક્રિય થયેલા બિપોરજોય વાવાઝોડાની અસર સૌરાષ્ટ્ર અને કચ્છમાં જોવા મળી રહી છે. સૌરાષ્ટ્રના દરિયાકાંઠા વિસ્તારમાં ભારે પવન ફૂંકાઈ રહ્યો છે. દરિયામાં ઊંચા-ઊંચા મોજા ઉછળી રહ્યા છે. દરિયામાં કરંટ જોવા મળી રહ્યો છે. બિપોરજોય વાવાઝોડાને લઈ તંત્ર એલર્ટ થઈ ગયું છે અને દરિયાકાંઠા વિસ્તારોમાં રહેતા લોકોનું સ્થળાંતર કરાયું છે. આ સાથે જ દરિયાકાંઠે રહેતા લોકોના ઘર અને ઝુંપડા ખાલી કરાવ્યા છે અને તમામ લોકોને શેલ્ટર હોમમાં ખસેડવામાં આવ્યા છે. 

દરિયો ગાંડોતુર બનતા બોટોને નુકસાન
દ્વારકા જિલ્લામાં બિપોરજોય વાવાઝોડાની અસરમાં વધારો થયો છે. હર્ષદના દરિયાકિનારાના આસપાસના વિસ્તારમાં અસર જોવા મળી છે. હર્ષદના દરિયામાં કરંટ જોવા મળ્યો છે. આ સાથે દરિયામાં ઊંચા મોજા ઉછળ્યા છે. જેને લઈ દરિયાકિનારે પાણીનું સ્તર વધ્યું છે.  દ્વારકાનો દરિયો ગાંડોતુર બન્યો છે. દ્વારકામાં ભારે પવનના કારણે વીજપોલ ધરાશાયી થયા છે. તો બોટોને પણ ઘણું નુકસાન થયું છે. ઓખા જેટીએ બોટ ઉંધી વળતા હોવાના દ્રશ્યો આવ્યા સામે છે. જેટી નજીક લાંગરેલી બોટને ઉંધી વાળી દીધી છે. વાવજોડાની ઓખા દરિયાના વિસ્તારોમાં અસરો શરૂ થઈ ગઈ છે. દરિયો તોફાની બનતા અનેક બોટોને નુકસાન થયું છે. 

કોસ્ટલ ગાર્ડની ઓફિસની દીવાલ તૂટી
દ્વારકામાં બિપરજોય વાવાઝોડાના કારણે દરિયાએ રૌદ્ર સ્વરૂપ ધારણ કર્યું છે. ઓખાથી જેટી તરફ જવાના રસ્તા પર પાણી ફરી વળ્યા છે. દરિયાના પાણી કિનારા પર પહોંચતા કોસ્ટલ ગાર્ડની ઓફિસની દીવાલ તૂટી છે. ઓખા દરિયા કિનારે પવનની ગતિમાં વધારો થયો છે.  જેટી તરફના રસ્તાઓ પર વીજપોલ ધરાશાયી થયા છે. દરિયાના પાણી જાહેર માર્ગો પર ફરી વળ્યા છે. 

દ્વારકામાં કહેર વર્તાવાનું શરૂ કર્યું
વાવાજોડાએ દ્વારકામાં કહેર વર્તાવાનું શરૂ કર્યું છે. દ્વારકામા હાથી ગેઇટ પાસે રસ્તાઓ પર હોર્ડિંગ્સ ઉડતા LCBના જવાનોએ હોર્ડિંગ્સને હટાવ્યા છે. વાવાજોડા કહેર વચ્ચે ખાખી પણ પોતાની ફરજ અડીખમ નિભાવતી નજરે પડી રહી છે. દ્વારકા LCBના પોલીસ કર્મચારીઓએ હાઇવે પર પડેલ હોર્ડિંગ્સને ઉપાડી સાઈડમાં મૂકી રસ્તો ખુલ્લો કર્યો.

વૃક્ષો અને વિજપોલ  ધરાશાયી 
કચ્છમાં ભારે પવન સાથે વરસાદ વરસી રહ્યો છે. માંડવી અને નલીયામાં ભારે પવન સાથે વરસાદ વરસી રહ્યો છે. ભારે પવનથી રસ્તા પરના વૃક્ષો અને વિજપોલ ધરાશાયી થયા છે. તો ભારે વરસાદના કારણે નદીઓમાં ઘોડાપૂર આવ્યા છે.