કાર્યવાહી / પરીક્ષામાં કોપી કરવી 28 વિદ્યાર્થીનીઓને પડ્યું ભારે: સુરત યુનિ.એ '0' માર્ક્સ સાથે ફટકાર્યો આટલાંનો દંડ

• સુરત યુનિવર્સિટીની  માસ કોપીકેસ મામલે કડક કાર્યવાહી
• વિદ્યાર્થિનીઓને ઝીરો માર્ક સાથે 500 રૂપિયાનો દંડ
• કામરેજની વિશ્વાભારતી કોલેજમાં અંગ્રેજીની પરીક્ષામાં થઈ હતી ચોરી 
• કોલેજના સુપ્રિટેન્ડેન્ટને 3 વર્ષ સુધી પરીક્ષાની કામગીરીથી દૂર રહેવા આદેશ 

સુરત યુનિવર્સિટીથી એક મોટા સમાચાર સામે આવ્યા છે. વાત જાણે એમ છે કે, સુરત યુનિવર્સિટીની પરીક્ષામાં માસ કોપી કેસ મામલે કડક કાર્યવાહી કરી છે. પ્રાથમિક વિગતો મુજબ યુનિવર્સિટી દ્વારા માસ કોપી કેસમાં ઝડપાયેલી 28 વિદ્યાર્થિની સામે કાર્યવાહી કરાઇ છે. જેમાં ફેક્ટ કમિટીની સુનાવણી બાદ ઝીરો માર્ક સાથે 500 રૂપિયાનો દંડ ફટકારાયો છે. 

વીર નર્મદ દક્ષિણ ગુજરાત યુનિવર્સિટી હેઠળની કામરેજની વિશ્વાભારતી કોલેજમાં 6 એપ્રિલના રોજ યોજાયેલ અંગ્રેજી વિષયની પરીક્ષામાં માસ કોપી કેસની ઘટના સામે આવી હતી. યુનિવર્સિટી સ્પેશિયલ સ્ક્વોડે કોલેજમાં ચેકિંગ કરતા કોપી કેસ પકડાયા બાદ આ તરફ તપાસને અંતે હવે માસ કોપી કેસમાં ઝડપાયેલ તમામ 28 વિદ્યાર્થિનીઓ સામે કાર્યવાહી કરવામાં આવી છે. વિગતો મુજબ ફેક્ટ કમિટી દ્વારા સુનાવણી બાદ  28 વિદ્યાર્થિનીઓને ઝીરો માર્ક સાથે 500 રૂપિયાનો દંડ ફટકારવામાં આવ્યો છે. 

માઇક્રો ઝેરોક્ષ અને કાપલી મળી હતી 
6 એપ્રિલના રોજ યોજાયેલ અંગ્રેજી વિષયની પરીક્ષામાં 28 વિદ્યાર્થિનીઓ પાસેથી માઇક્રો ઝેરોક્ષ અને કાપલી મળી આવી હતી. જે બાદમાં યુનિવર્સિટી દ્વારા તપાસ શરૂ કરી કાર્યવાહી કરાઇ છે. જેમાં 28 વિદ્યાર્થિનીઓને ઝીરો માર્ક સાથે 500 રૂપિયાનો દંડ તો યુનિવર્સિટીના કુલપતિએ સુપ્રિટેન્ડેન્ટ સામે પણ કાર્યવાહી કરી છે. મહત્વનું છે કે, સીસીટીવી સહિતના પુરાવા યુનિવર્સિટીને મોકલવામાં આવ્યા હતા. 

કોલેજના સુપ્રિટેન્ડેન્ટ સામે પણ કાર્યવાહી 
વીર નર્મદ દક્ષિણ ગુજરાત યુનિવર્સિટીની અંગ્રેજીની પરીક્ષામાં માસ કોપી કેસ મામલે 28 વિદ્યાર્થિનીઓની સાથે કોલેજના સુપ્રિટેન્ડેન્ટ સામે પણ કાર્યવાહી કરવામાં આવતા ખળભળાટ મચી હતી. વિગતો મુજબ સુપ્રિટેન્ડેન્ટને પણ પરીક્ષાની કામગીરીથી દૂર રહેવાનો આદેશ થયો છે. જેમાં ત્રણ વર્ષ સુધી સુપ્રિટેન્ડેન્ટને પરીક્ષાની કામગીરીથી દૂર રહેવા કુલપતિ દ્વારા આદેશ કરાયો છે.