સ્પોર્ટ્સ / IND vs SA: ટીમ ઇન્ડિયાના બેટિંગ ઓર્ડરમાં ફેરફાર, KL રાહુલે કહ્યું 'જો રિષભ પંત પ્લેઇંગ 11...'

IND vs SA ODI Series: ભારત અને સાઉથ આફ્રિકા વચ્ચેની પહેલી વનડે મેચ 30 નવેમ્બરે રાંચીમાં રમાશે. મેચ પહેલા, ભારતીય ટીમના કેપ્ટન કેએલ રાહુલે એક પ્રેસ કોન્ફરન્સ સંબોધી હતી જ્યાં તેણે પ્લેઇંગ ઇલેવન સાથે જોડાયેલા સવાલોના જવાબ આપ્યા. રાહુલે જણાવ્યું કે જો રિષભ પંત પ્લેઇંગ ઇલેવનનો ભાગ હશે તો તે વિકેટકીપર તરીકે રમશે.

સાથે જ કેએલ રાહુલે પુષ્ટિ કરી છે કે તે આગામી ODI સીરીઝમાં નંબર 6 પર બેટિંગ કરશે. નિયમિત ODI કેપ્ટન શુભમન ગિલ ઈજાને કારણે સીરીઝનો ભાગ નથી. કેએલ રાહુલ અગાઉ ઓસ્ટ્રેલિયા સામેની ODI સીરીઝમાં અને તે પહેલાં ચેમ્પિયન્સ ટ્રોફી 2025માં છઠ્ઠા નંબર પર બેટિંગ કરતો જોવા મળ્યો હતો. માહિતી પ્રમાણે, કેએલ રાહુલે કહ્યું - 'હું એ જ સ્થાન પર, નંબર 6 પર બેટિંગ કરીશ. અમે સ્પિન બોલિંગને વધુ સારી રીતે રમવાનો પ્રયાસ કરીશું." કેએલ રાહુલ ટેસ્ટ મેચમાં ઓપનિંગ કરે છે, પરંતુ તે વનડેમાં મિડલ ઓર્ડર સાથે સારી રીતે અનુકૂલન સાધી ચૂક્યો છે. છઠ્ઠા નંબર પર, રાહુલની વનડે સરેરાશ 40થી વધુ છે. જોકે, તેણે આ સ્થાન પર હજુ સુધી એક પણ પચાસ કે સદી ફટકારી નથી.

સાથે જ મેનેજમેન્ટ રુતુરાજ ગાયકવાડને તક આપવાનું વિચારી રહ્યું છે. એવામાં લગભગ નિશ્ચિત છે કે રોહિત શર્મા અને યશસ્વી જયસ્વાલ ઓપનિંગ કરવા આવશે. જયારે વિરાટ કોહલી પહેલાથી જ નંબર 3 પર છે. વાઇસ-કેપ્ટન શ્રેયસ ઐયરની ગેરહાજરી પણ નંબર 4 પરના સ્થાન અંગે ગંભીર સવાલો ઉભા કરે છે. શક્ય છે કે રિષભ પંત તે સ્થાન પર રમશે. રાહુલે પહેલેથી જ કહ્યું છે કે તે નંબર 6 પર બેટિંગ કરશે, તેથી ઋતુરાજ ગાયકવાડ માટે મધ્યમ ક્રમમાં સ્થાન બનાવી શકાય છે.

દરમિયાન, ઓસ્ટ્રેલિયામાં રમાયેલી ત્રણ મેચની વનડે સીરીઝમાં શુભમન ગિલે રોહિત શર્મા સાથે ઇનિંગની શરૂઆત કરી હતી. જોકે, જયસ્વાલ પાસે હવે વનડેમાં પોતાને સાબિત કરવાની તક હશે. રવિન્દ્ર જાડેજા અને વોશિંગ્ટન સુંદર બે સ્પિન-બોલિંગ ઓલરાઉન્ડર હોઈ શકે છે, જ્યારે અર્શદીપ સિંહ અને હર્ષિત રાણા પેસ આક્રમણ સંભાળી શકે છે. કુલદીપ યાદવ મુખ્ય સ્પિનર ​​તરીકે રમી શકે છે.

આ પણ વાંચો: રોહિત શર્મા-વિરાટ કોહલી 2027 ના વર્લ્ડ કપમાં રમશે? BCCI લેશે અંતિમ નિર્ણય!

સાઉથ આફ્રિકા સામે ભારતની વનડે ટીમ

રોહિત શર્મા, યશસ્વી જયસ્વાલ, વિરાટ કોહલી, તિલક વર્મા, કેએલ રાહુલ (કેપ્ટન), રિષભ પંત, વોશિંગ્ટન સુંદર, રવીન્દ્ર જાડેજા, કુલદીપ યાદવ, નીતીશ કુમાર રેડ્ડી, હર્ષિત રાણા, રુતુરાજ ગાયકવાડ, પ્રસિદ્ધ કૃષ્ણા, અર્શદીપ સિંહ, ધ્રુવ જુરેલ

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ